مين قال ان الى فات مات؟؟(ارجو المتابعة)

[b][b][b][size=16][size=21]الحلقه الحاديه عشر[/size]

[/size][/b][/b]ندى: انا عايزة اجيلكو الكلية مرة.
شادي: منا قلتلك الخميس الي فات تعالي مع هالة, انتي الي مرضتيش.
ندى: والله كان عندي امتحان بيولوجي في الدرس, مكانش ينفع اجي.
شادي: طيب ابقى تعالي مع هالة بقى, حتى اعرفك على سامح صاحبي, دا هيموت ويشوفك.
قالت بلهجة ذات مغزى.
ندى: وتعرفني على ريكا ولومي بالمرة.
شادي: يا بنتي هحلفلك للمرة الالف انهما اصحابي عادي في الشلة, طب دانا اقل واحد عنده اصحاب بنات في شلته , وريهام وسلمى دول بنات محترمة جدا, لما تيجي والله لعرفك عليهم وانتي هتشوفي بنفسك.
وفكر " وهو انا اقدر اصاحب بنات كتير , دي ماما كانت فضحتني".
ندى: اشمعني انا ماليش اصحاب ولاد؟.
شادي: ومين قال ان ممكن يكونلك اصحاب ولاد اصلا؟, هو انا شوال جوافة مثلا؟.
ندى: شفت , شفت انت بتتعصب ازاي لما بجيب السيرة, لكن انا ماليش حق اغير او ازعل.
شادي: لا يا ماما , انتي حاجة وانا حاجة, انتي بنت, وبعدين هو انا مش مكفيكي ولا ايه؟.
ندى: يعني هو انا مش مكفياك؟.
شادي: انتي بتستعيلي معايا كتير وبتتغابي في حاجات هايفة, اسألي اختك يا ستي , انا لو ليا صحاب غير ريكا ولومي , ابقي تعالي كلميني.
تراجعت ندى امام غضبه , وقالت بدلال.
ندى: منا عارفة يا حبيبي والله, بس انا بحب اغير عليك , بلاش يعني؟.
شادي: لا ياندى, انتي كده مش بتغيري انتي كده بتخنقيني.
ندى: انا بخنقك عشان بحبك؟.
شادي: متبقيش شكاكة كده على طول , انا مش مضطر اكدب عليكي اصلا.
ندى: انا شكاكة؟, طب دانا سايباك على راحتك جدا, انت مشفتش البنات بيعملو ايه مع الي بيحبوهم.
شادي: بقلك ايه يا ندى, انا اصلا مش فاضي وطالع عيني في ام المشروع الي بشتغل فيه دا, روحي , روحي ذاكري عشان معطلكيش.
ندى: استنى يا شادي مش كل ما اكلمك تقفش عليا كده, فيه ايه الي حصل يعني؟.
شادي: مانا كل ما اكلمك الاقيكي بتخنقي فيا وانا مش طالبة معايا خنقة يا ندى النهاردة.
ندى: منا الي كل ما اكلمك الاقيك مشغول في حاجة , مشروع او كورس اوعندك كويز او اي مصيبة تانية, اعمل ايه يعني؟, مانا عارفة الي فيها , ماهالة اهي زيها زيك ومش مشغولة الشغلة الي انت فيها دي يعني.
شادي: والله مش مشكلتي ان اختك بتحب تزنق نفسها على اخر وقت .
ندى: يا سلام وانت بقى الي داخل من اولها معيد في الكلية.
شادي: بصي يا ندى, انا ورايا سهر للصبح على المشروع, روحي اقرفي في حد غيري لو سمحتي.
ندى: استنى هنا يا شادي ,انت هتقفل وتسيبني كده وانت مزعلني.
شادي: اللهم طولك يا روح, عايزة ايه؟, انتي عايزة ايه دلوقتي؟, والله العظيم عندي شغل, وانتي كمان عندك مذاكرة, روحي ذاكري يا ندى وبكرة نتكلم.
ندى: لا مش هروح, ومش هذاكر, الا لما تصالحني وتضحك وتقولي انك بتحبني كمان.
شادي: والله انا مافايق يا ندى خالص.
ندى: وانا مش هسيبك تقفل وانت زعلان مني.
قال باقتضاب.
شادي: حاضر يا ندى, انتي عارفة ان انا بحبك, متزعليش مني, معلش.
ندى: واضحك بقى.
شادي: حاضر اهه, هههه, حلو كده, يلا بقى عشان ماما متقمش تلاقيني بتكلم في التليفون.
ندى: ماشي يا حبيبي, فكر فيا وانت بتشتغل, ماشي؟.
شادي: حاضر.
ندى: وانا قبل مانام هرن عليك.
شادي: طيب يا حبيبتي.
ندى: باي.
شادي: مع السلامة.
**************************
سامح: بس انتي مش زي ما كنت متخيلك خالص.
ندى: كنت متخيلني ازاي يعني؟.
سامح: يعني , مش مهم المهم ان انتي غير .
ندى: احسن ولا اوحش يعني؟.
ضحك قائلا.
سامح: لا متخافيش احسن.
شادي: اديكي شفتي يا ستي سامح الي ليل نهار تسمعي عنه, توأم روحي زي ما بتقولي.
ندى: امال فين ريكا ولومي؟.
اقبلت عليها فتاة جميلة مبتسمة , محجبة , وتوقفت امامها تنظر في فضول, وقالت برقة.
سلمى: ندى؟.
قالت ندى في حرج.
ندى: ايوة.
سلمت عليها الفتاة بحرارة.
سلمى: انا سلمى زميلة شادي, انا سمعت عنك كتير اوي, من شادي ومن هالة كمان.
قالت ندى من بين اسنانها.
ندى: وانا كمان, انتي لومي صح؟.
سلمي: ايوة انا, وريكا جاية في الطريق, انتي قاعدة معانا النهاردة صح؟, اكيد هتشوفيها.
شعرت ندى ببعض الود للفتاة, فقالت.
ندى: انتي عسولة اوي.
ضحكت سلمى برقة تضايقت لها ندى,وهي تقول.
ندى: وانتي فعلا زي ما بيقولو عنك الي في قلبك على لسانك, انتي الي عسولة يا حبيبة قلبي.
سامح: تعالي يا لومي نروح نشوف العيال داخلين المحاضرة ولا لأ؟, انت طبعا مش معانا النهاردة يا شود.
شادي: على عيني يا موحا انت عارف, بس ابقى انت ظبطني وفهمني الي الراجل قاله.
سامح: ولا يهمك, واكتبلك اسمك في الغياب كمان لو حبيت.
وتركاهما وانصرفا.
شادي: انتي عارفة ان دي اول مرة اطنش محاضرة.
ندى: اخص عليا , كده انا مفشلاك.
شادي: ولا يهمك, ايه رأيك في لومي, عسل صح؟, ومحترمة اوي.
ندى: اه شكلها لذيذ.
شادي: هتشوفي ريكا بقى, شفتي لومي حلوة وهادية ازاي, اهي ريكا دي حاجة تانية خالص, وشعنونة ولا الصبيان.
اقبلت في هذه اللحظة ريهام, فتاة سمراء , مع ملامح رقيقة عادية, ولكن صوتها عال,قالت من بعيد وهي تقترب.
ريهام: الواد شادي واقف برة ليه؟, مش فيه محاضرة دلوقتي؟, طب انا وضايعة وعارفين, انت يا دحيح واقف هنا ليه؟.
تلفت شادي حوله وهو يقول.
شادي: اخرسي, صوتك عالي الله يحرقك , مش هتبطلي الفضايح دي؟.
ريهام: ومين الي معاك دي؟.
شادي: بس يا بنتي وطي صوتك دا؟.
اقتربت وسلمت على ندى وكأنها تعرفها منذ زمن.
ريهام: اكيد ندى, عرفتك من صورتك الي معاه, انا ريكا.
سلمت عليها ندى بحذر وهي تتمتم.
ندى: الحمد لله.
ريهام: هو محدش قدر عليه غيرك, اهو الواد دا عمره ما فوت محاضرة, وعلى طول الاول في المشاريع, انا بحقد عليه.
قال شادي بغيظ.
شادي: الله اكبر.
ريهام: شفتي وكمان بيخاف م الحسد, واقفة ليه تعالي نعد.
واخذتها من يدها وكأنها صديقتها , وجلستا في الكافيتيريا وتبعهما شادي, وقضت الوقت معهما الى ان انتهت المحاضرة وجاءت اختها وصديقاتها, وكذلك اصدقاء شادي, وشعرت ندى بجمال حياة الجامعة , وكذلك شعرت بالخطر على شادي.
********************
ندى: معرفش يا نسمة, يعني سامح وشادي, واحمد مأمون و على واحمد فوزي, اربع ولاد , وسلمي وريهام دول بنتين, بس تحسي اعدادي كلهم اصحاب في بعض, يعني هما برضة اصحاب شلة هالة, هبة وهدير وخيري , وايمن وعلاء, واحمد السباعي ومعتز, واحمد عزت و....
قطعتها نسمة.
نسمة: الله الله, انتي شلة اختك كلها صبيان ولا ايه؟.
ندى: يعني بس عيال زي العسل, بس شادي الغلس مسابنيش اعد معاهم, زعقلي عشان بهذر مع ايمن , قالي الواد دا متهذريش معاه تاني, مش كويس.
نسمة: ممممم, وايه كمان؟.
ندى: انتي بتتريأي ولا ايه؟.
نسمة: انا بسمع , يعني رحتي اتبسطتي يعني.
ندى: انتي مالك يا نسمة مبتحبيش احكيلك ليه؟.
نسمة: عشان انتي مش حاسة انك بتغلطي اصلا, يعني صاحبتي شادي ورحتي معاه الجامعة كأن عادي جدا انك تصاحبي ولد, يا حبيبة قلبي مش عشان هالة عاملة كده يبقى ليكي الحق انك تعملي كده ,وبعدين برضة مش عشان ماما عارفة يبقى انتي صح, انا مش عارفة ماما دي سيباكو كده ازاي؟, وموافقة عادي انك تدوري مع شادي, واختك تدور مع عمرو.
ندى: ماما؟, دي ماما دي عسل, امال عايزاها تبقى زي مامة شادي, عاملالنا حصار على طول.
نسمة: انا مش عارفة ازاي هي ساكتة عليكو اصلا, مش كده انها تكون صاحبتكو , مش كده , كده غلط.
ندى: انتي الي عبيطة ومش عارفة تصاحبيها, يا بنتي ماما مش هتعملك حاجة قربي منها واحكيلها.
نسمة: احكيلها ايه يا بنتي , الام ام برضة, مينفعش تكون صاحبة, انا عندي اصحاب, محتاجة امي تكون ام مش صاحبة هي كمان, تنصحني وتمنعني اقع في الغلط, مش تسيبني كده على راحتي.
ندى: يعني انتي عايزة ماما مثلا تضربني عشان بكلم شادي؟.
نسمة: لا , بس على الاقل تاخد منك موقف, او تفهمك ان دا غلط.
ندى: بس شادي مؤدب, وعارفينه عشان كده هي مطمنة, وبعدين انا بحبه اوي يا نسمة, ماما عشان كده سيباني.
عادت نسمة تدفن رأسها في مذكرة الرياضيات, وهي تتمتم.
نسمة: بحبه اوي, والتانية بتحبه اوي, وعارفينه, وكلكو واقعين في مصيبة وانتو ولا داريين.
ندى: انتي بس الي معقدة, خليكي كده, مش هتلاقي برص يبصلك.
نسمة: انا مش فاضية حد يبصلي , ومش عايزة حد يبصلي, انا عايزة اذاكر وانجح, واعيش حياتي صح, كل حاجة في وقتها, مسبقش الاحداث واخد حاجة مش من حقي؟.
ندى: حاجة مش من حقك؟؟.
نسمة: اه, اني احب واحد وانا لسه مش باين هاخده ولا لأ, يبقى انا جيت على حق واحدة تانية ممكن تكون مراته, وانا جيت على حق واحد تاني ممكن يكون جوزي في يوم من الايام.
ندى: لااااااا, دانتي خنكة خالص.
نسمة: ربنا يهديكي انتي يا ندى, انتي لسه في الاول وممكن ترجعي في الي عملتيه, هالة انا فاقدة فيها الامل اصلا, بس انتي مسيرك تعرفي ان انا صح[/b]

[b][size=16][size=21]الحلقه الثانيه عشر[/size]
[/size][/b]توقف شادي يقول بحدة لندى.
شادي: لا يا ندى, لا , هايدي دي ملكيش دعوة بيها اصلا, لا تصاحبيها ولا تسلمي عليها حتى.
جذبته ندى من يده ليواصل السير .
ندى: اهدى بس وافهم, ازاي يعني مكلمهاش, دي صاحبة اختي من زمان ولسه صاحبتها لغاية دلوقتي, مينفعش متكلمش معاها.
شادي: البنت دي انا مش عايزك تعرفيها يا ندى.
ندى: الله يا شادي, انت يعني بتعجزني, مش تطلب حاجة انا اقدر اعملها, قلتلك مش هصاحبها, بس مينفعش يعني ادخل البيت الاقيها جوة مسلمش عليها.
شادي: وايه يعني؟, عشان تفهم انك مبتكلميهاش تقوم تبعد عنك.
ندى: يعني انا ممكن في مرة اجي اقلك متكلمش علي, مانا برضة مبطيقوش , وكان بيعاكسني قبل ما اعرفك, هترضى.
شادي: قلتلك ميت مرة متقارنيش نفسك بيا, انا حاجة وانتي حاجة.
ندى: لا بقى, انا زيي زيك, والمفروض تعاملني زي ما تحب اني اعاملك.
توقف شادي عن السير للمرة الثانية وهو يقول بغضب.
شادي: يعني انا معطل نفسي وسايب مشاريعي وحاجتي ومذاكرتي الي طالع عين اهلي فيها, عشان اجيلك واشوفك, عشان تخنقي عليا وتخلي مزاجي زي الزفت, زي كل مرة, انا غلطان ان انا جيت.
قالت بحدة.
ندى: الله يا شادي, انت كل شوية تقفش وتتقمص, انا زهقت, انت على طول مزاجك زي الزفت مش مني ولا حاجة, مش كده يعني , انا كمان يا اخي عندي مذاكرة وقرف ودروس وثانوية عامة, بس بفضلك على كل دا, انت ليه دايما حاطط مصلحتك قبلي .
شادي: عشان المفروض الصح كده, الواحد يفكر في مصلحته والاولويات , بس انا سبت كل دا ونزلت اشوفك وبرضة بتتخانقي معايا.
ندى: يعني انت عايز تقنعني انك مبتنزلش تخرج مع اصحابك؟, انت هتذلني عشان نزلت تشوفني بعد ماكنت هبوس رجلك عشان اشوفك, مانتاش الوحيد الي دخل هندسة يعني , ومحدش واخد الدنيا على اعصابه زيك كده, عايز تروح يا سيدي روح , كمل حاجتك وذاكر لحسن انا معطلاك.
شادي: ندى انتي مبتقدريش انا مشغول قد ايه, وعلى طول فاكراني فاضي زيك.
قالت بغيظ.
ندى: فعلا انا الي عندي ثانوية عامة فاضية, طب عن اذنك بقى عشان اروح اذاكر , انا الي غلطانة اني ببقيك انت على مذاكرتي ومعتبراك اهم حاجة عندي.
شادي: بقى كده.
والتفت وانصرف في غضب بينما هي سارت في الاتجاة الاخر بسرعة.
*****************
جلست ندى في طرف سريرها تبكي, وبجانبها نسمة جالسة لا تواسيها ولاتكلمها, انما تنظر اليها في انتظار انتهاء بكائها, فدخلت هالة الحجرة في هذه اللحظة ولمحتها, فقالت بدهشة.
هالة: ايه دا بتعيطي ليه؟.
وجذبت نسمة من يدها بعيدا عنها وجلست مكانها.
هالة: قومي كده بدل مانتي قاعدة متنحة, بتعيط ليه دي؟.
وقفت نسمة وهي تعقد ساعديها امام صدرها.
نسمة: اتخانقت يا ستي مع شادي.
هالة: ليه كده؟, عملك ايه؟.
قالت ندى من بين بكائها.
ندى: انا عملت ايه يعني؟, انا غلطانة اني بفضل اني اشوفه على مذاكرتي ومصلحتي, هو ليه كده دايما اناني؟, وبعدين مانتي في هندسة ومش مشغولة اربعة وعشرين ساعة زيه كده.
ضمتها هالة.
هالة: اهدي بس عشان تعرفي تفكري.
ندى: اهو زعل مني ومشي وسابني, كأنه بيقولي اضربي دماغك في الحيطة.
هالة: مشي وسابك ليه؟.
ندى: اصل انا زعقتله,وقلتله روح امشي يلا كمل مشاريعك وبلاويك.
هالة: انا مش فاهمة يعني انتي الي مزعلاه ولا هو الي مزعلك؟.
ندى: احنا الاتنين زعلنا بعض, بس دي اول مرة نتخانق وانا متضايقة ومش عارفة اعمل ايه؟.
تدخلت نسمة قائلة لهالة.
نسمة: والهانم عندها امتحان في الدرس عربي بكرة, ومش عارفة تذاكر, قاعدة تعيط زي مانتي شايفة, منك لله يا شادي.
هالة: طب هو مكلمكيش من ساعتها؟.
ندى: خالص, ولا رن عليا حتى لما روح, ولا انا كمان, بقلك سابني في الشارع , سابني ارجع لوحدي.
هالة: طيب قومي اغسلي وشك واعدي ذاكري.
عادت تبكي بشدة.
ندى: مش قادرة, مش قادرة ابص في كتاب ولا اذاكر حاجة.
قالت نسمة بحدة.
نسمة: انتي يا بنتي هتضيعي نفسك عشانه وهو ولا فارق معاه, سابك اصلا عشان يشوف مصلحته.
هالة: اسكتي انتي , عاملة زي الي بيحط بنزين على النار, احنا عايزين نهديها.
نسمة: هو كان قتلها؟,دا المفروض تفهم من نفسها ان لازم تبقى مذاكرتها ومستقبلها اهم من اي لعب عيال تاني.
اغتاظت هالة من نسمة حين اشتد بكاء ندى , فقامت تدفعها خارج الغرفة.
هالة: انتي بتعملي ايه هنا اصلا؟, روحي على اوضتك بدل مانتي واقفة تشعللي الدنيا وبس, يلا اتفضلي.
قالت نسمة وهي تخرج غصبا.
نسمة: خليكي كده ضيعيها معاكي, ان شاء الله بابا هيشوفك في مرة راكبة عربية عمرو وهيطربأها على دماغك.
دفعتها هالة واغلقت الباب بعنف خلفها وهي تقول.
هالة: ايه دا, البت دي لسانها دا ايه ؟, مش ممكن.
ثم عادت تجلس بجانب ندى تواسيها.
هالة: طب متحاولي تكلميه؟.
ندى: ينفع؟.
هالة: اه , كلميه عادي والكلام هيجيب بعضه هتتصالحو , عشان تعرفي تذاكري بس, لحسن كده مش هتذاكري حاجة.
مسحت ندى دموعها وهي تقول.
ندى: طب هاتيلي الموبايل من على التسريحة.
احضرته هالة , فأخذته واتصلت بشادي, وعاد وجهها يعبس,فقالت هالة .
هالة: هه؟, مبيردش ولا ايه؟.
ندى: لأ, مغلق.
هالة: طب كلميه على البيت.
ندى: لا اتكسف.
هالة: تتكسفي من ايه يا بنتي؟, كلميه عادي, استني اجيبلك التليفون من اوضة زفتة.
وذهبت لتحضر الهاتف من غرفة نسمة وعادت به, وناولت ندى السماعة.
ندى: ايه يا بنتي تتكسفي ليه؟, عادي.
ضربت ندى ارقام هاتف بيت شادي في توتر وانتظرت, الى ان سمعت صوت امه.
الام: الو.
ندى: الو.
الام: ايوة؟.
ندى: لو سمحت ممكن اكلم شادي؟.
بدأ يظهر بعض الدهشة لمشوبة بالعداء في صوت الام.
الام: شادي؟, مين معايا؟.
ندى: انا..,انا ندى.
الام: ندى مين يا حبيبتي؟.
ارتبكت ندى اكثر, وتلعثمت.
ندى: انا....اخت ....هالة الي معاه في الكلية....الي ساكنة جمبكو.
فهمست هالة وهي تستنكر .
هالة: ايه دا هو تحقيق؟.
الام: وعايزاه في ايه يا ماما؟.
تضاعف ارتباك ندى ولم تدر بم تجبها.
ندى: في موضوع كده يا طنط.
ردت الام بلهجة عداء واضحة.
الام: اااااه, في موضوع, لا يا بنتي , شادي نايم دلوقتي, اصله عنده شغل في الكلية كتير, الله يكون في عونه, وانتي كمان يا حبيبتي مش المفروض تكوني بتذاكري دلوقتي, انتي عندك ثانوية عامة, ركزي يا ماما في مذاكرتك عشان ربنا يوفقك كدة وتدخلي كلية حلوة.
شعرت ندى بالكلام يتجمد على لسانها, فلم تتحدث بينما اردفت الام بنفس العداء.
الام: لما يبقى يصحى هبقى اعرفه انك اتكلمتي, ولو فضي يبقى يكلمك, يلا يا حبيبتي مع السلامة,....وابقي سلميلي على مامتك.
شعرت ندى نبرة السخرية في اخر جملة تخترق اذنها , فتسمرت امام السماعة التي يصدر منها صوت اغلاق الخط, فقالت هالة.
هالة: ايه فيه ايه؟, قفلت؟.
وضعت ندى السماعة في استسلام دون ان تتحدث.
هالة: فيه ايه؟.
ندى: امه.........., بهدلتني بالذوق.
هالة: ازاي يعني؟.
ندى: هزأتني يا هالة, قالتلي نايم وانتي المفروض تكوني بتذاكري دلوقتي.
وعادت تبكي مرة اخرى, فقالت هالة.
هالة: يادي النيلة ,ماهي هايدي قالت امه دي عقربة.
ندى: انتي خلتيني اتكلم على البيت ليه؟, انا كنت ناقصاها.
وعادت تبكي بشدة.
هالة: بس بس خلاص, سيبك منها دي ست خنيقة اصلا, المهم قومي بس اغسلي وشك واتعشي, وتعالي ذاكري, وانا لما اشوفه في الكلية بكرة هكلمهولك.
ندى: انا لسه هستنى لبكرة؟.
هالة: وهو انا صحيح لو شفته كمان ممكن اشتمه, بس هكلمه كويس عشان خاطرك.
قالت ندى بأمل وكنها تذكرت شيئا.
ندى: طب استني انا ممكن اكلم لومي تصالحني عليه, هي صاحبته اوي, وهو بيسمع كلامها.
هالة: مابلاش يا بنتي ,متدخليش حد بينكو.
ندى: بس انتي لو اتدخلتي فعلا هتبقي في صفي, وكده ممكن نبوظ الدنيا, بس لومي صاحبتنا احنا الاتنين وهتحلها.
هالة: انتي حرة, كلميها بس على الله تحلها, انتي معاكي رقمها اصلا؟.
ندى: اه , هكلمها .
واتصلت بسلمى في لهفة.

انا كدة نزلت حبة كويسين و انشاء لله هنزل زيهم تاانى قرييييب

___________________________

[b]الحلقه الثالثه عشر[/b]
اغلقت سلمى الهاتف ونظرت الى ريهام الجالسة امامها في الكافيه بصمت, فقالت ريهام بدهشة.
ريهام: كانت عايزة ايه؟.
وضعت سلمى الهاتف على المنضدة امامها وهي تتنهد, قبل ان ترفع كأس المشروب وترتشف منه , ثم قالت.
سلمى: اصلهم متخانقين, وكانت متصلة بيا عشان اصالحهم على بعض.
ريهام: وملقتش الا انتي الي تكلمك.
اعاد الكأس ببطء وهي مأخوذة.
سلمى: شفتي بقى الحظ, عادي يا بنتي انا متعودة على كدة, هو اصلا طول اليوم مبيحكيش الا عليها.
ريهام: بصراحة يا لومي الي بتعمليه ده اكبر غلط, انا خايفة عليكي, ازاي تكوني بتحبيه وعاملة فيها انتيمته, طبعا هيحكيلك على صاحبته على طول.
سلمى: انا معنديش مشكلة انه يحكيلي, بس مكنتش متخيلة انها ممكن تخليني اصلح ما بينهم.
ريهام: انتي الي عملتي دا في نفسك, بتعذبي نفسك يا لومي.
تنهدت سلمى وترقرقت الدموع في عينيها بأسى.
سلمى: مفيش في ايدي حاجة تانية.
ريهام: لا فيه , يا تبعدي عنه, يا تعرفيه, ماهو مينفعش كده, انا مش فاهمة انتي مستنية مثلا يشم على ضهر ايده ويعرف انك بتحبيه؟, الولد مش واخد باله اصلا, ولو اخد باله هيعملك ايه, مانتي عارفة انه بيحب واحدة تانية, ابعدي عنه لحسن تتعلقي بيه اكتر.
سلمى: ريكا , بالله عليكي تسكتي , يعني انتي فاكرة اني مش عارفة الكلام دا كله؟, انا عارفاه, بس اعمل ايه؟ , مش في ايدي حاجة, والله ما في ايدي حاجة, انا غصب عني لقيتني بتشدله وبحبه, حتى وانا عارفة انه بيعاملني كصاحبه مش اكتر, ومش قادرة غير اني اقرب منه اكتر.
نظرت اليها ريهام في شفقة.
ريهام: ربنا يستر عليكي يا لومي, انا بجد مش مستريحة للي بيحصل دا.
تنهدت سلمى للمرة الثالثة, واشاحت بوجهها عن ريهام وهي تفكر فيما قالته لها بحزن.
***********************
شادي: الو ياندى, فيه ايه؟, قالبة الدنيا وبعتالي ميت مرسال ليه؟.
ندى: انت كنت قافل موبايلك ليه؟.
شادي: كنت بشتغل , ومكنتش عايز ازعاج, ايه الي حصل يعني؟.
ندى: امال مامتك قالتلي انك نايم يعني.
قال شادي بانزعاج.
شادي: وانتي كلمتي ماما فين؟.
ردت ندى بحذر.
ندى: لما لقيت موبايلك مقفول, اتكلمت على البيت.
غضب شادي.
شادي: انتي ايه الي خلاكي تعملي كده؟, وانا اقول مالها قالبة عليا ليه؟, ربنا يسامحك يا شيخة انا كده مش هخلص, انا مش مفهمك انك متكلمنيش على البيت.
ندى: انت بتزعقلي انا ليه؟, انت الي كنت قافل موبايلك, انا غلطانة اني بعمل المستحيل عشان اكلمك ومسيبكش زعلان, مع انك انت الي غلطان فيا.
وضع كفه على وجهه.
شادي: يا اللــــــه,تقومي تكلمي ماما يا ندى.
بدأت ندى في البكاء.
ندى: يعني انا كنت اعمل ايه؟, كنت عايزة اكلمك بأي طريقة, وهي كمان ماقالتلكش اني اتصلت.
صمت شادي لحظات ليهدأ, ثم قال.
شادي: خلاص ياندى متعيطيش, ومتزعليش انا اسف, بس بعد كدة متكلمنيش على البيت تاني الا اذا كان فيه حاجة ضروري اوي.
تنهنهت ندى وهي تقول.
ندى: حاضر.
فصمت قليلا ثم قال.
شادي: ايه الي خلاكي تكلمي سلمى؟.
ندى: اعمل ايه يعني؟, منا كنت زعلانة اوي ومعرفتش انام ولا اكل ولا اذاكر امبارح خالص.
شادي: انتي عندك امتحان النهاردة في الدرس صح؟.
ندى: يعني فاكر اهه.
شادي: انا مبنساكيش اصلا يا حبيبتي.
ندى: امال عملت فيا كده ليه؟, وسبتني امبارح اخبط دماغي في الحيطة.
شادي: انا كنت متنرفز منك شوية , فبلاش كنا نتكلم وانا زعلان, قلت نسيب بعض نهدى حبة, ونبقى نتكلم, بس مكنتش عارف انك مجنونة وهتقلبي عليا الدنيا.
ندى: مانت واخدني مجنونة, انا مكنتش قلتلك ان انا عاقلة.
شادي: خلاص يا حبيبتي متزعليش وقومي ذاكري شوية قبل الدرس.
ندى: ماخلاص , مش فارقة بقى, كان زماني ذاكرت امبارح.
شادي: لا يا نيدو يا روح قلبي لازم تذاكي, انتي شاطرة وانا عارف هتلحقي تذاكري, قومي يلا.
ندى: حاضر.
شادي: بحبك يا مجنونة.
ندى: وانا كمان يا دودو , اوعى تقفل موبايلك تاني, وتعذبني عليك كدا تاني.
شادي: حاضر يا حبيبتي, يلا سلام.
ندى: باي.
واغلق الهاتف والتفت فنظرت اليه سلمى وهي تقول بلهفة هادئة.
سلمى: ايه؟, اتصالحتو؟.
شادي: دي هي هبلة اصلا, احنا مكناش اتخانقنا عشان كل دا, انا بس كنت متضايق ومبحبش حد يزعجني وانا مركز مانتي عرفاني.
ردت بأسف مخفي.
سلمى: اه عرفاك.
شادي: بس هي كانت هتموت نفسها , مذاكرتش وهيا عندها امتحان النهادرة.
سلمى: بس هي,.....شكلها بتحبك اوي.
شادي: اوي, وانا كمان بحبها اوي, بس مش بطريقتها دي, كده هي بتيجي على حق حاجات كتير اوي باسم الحب, ومجنونة في تصرفاتها ,المفروض تبقى اعقل من كدا.
سلمى: صدقني الواحدة لما بتحب ممكن تعمل حاجات غريبة جدا, انت ممكن متتصورهاش حتى, والعقل دا بيبقى اخر حاجة بتستخدمها.
شادي: لا مش كده, مفيش بنات كده.
ردت بحزن.
سلمى: صدقني فيه , واكتر من كده كمان.
وسارا جنبا الى جنب , كل غارق في افكاره.
******************
نسمة: تتحسدي, ماسكة الملزمة يعني ونازلة مذاكرة.
ندى: عندي امتحان.
نسمة: لا والله؟, ولسه فاكرة دلوقتي؟.
ندى: يا نيسو يا حبيبتي انتي مش فاهمة ولا عمرك هتفهمي, وانا كمان كنت زيك كده فاكرة, لما كنت اعد اقول لهالة, انتي هبلة وكده , قالتلي لما تحبي هتعرفي, والله انا مفهمتش الا لما حبيت شادي.
جلست نسمة في هدوء, وهي تقول.
نسمة: بصي يا ندى, انا قلتلك وهفضل اقلك انتي بالذات, الي انتي فيه دا مش حب, احنا لسه صغيرين, وبعدين انتي مجنونة في علاقتك بيه بالمنظر دا, ازاي يعني واحد توقفي كل حياتك عليه, لو متكلمتوش متعرفيش تذاكري او تاكلي, دي مش طريقة دي.
ندى: يا نسمة يا حبيبتي , لما تحبي هتعرفي يعني ايه انك مش لوحدك, انك دايما حاسة ان فيه جزء منك في مكان تاني مع حد تاني, وازاي مبتبقيش قادرة تعيشي من غير الجزء دا,لو بعد عنك لحظة , ازاي تبقي حتى النفس مش قادرة تاخديه طول مانتو مش مع بعض.
نسمة: مين حمار فهمك كده, انا اعرف ان الحب بيكون مشاركة مش حد اخد جزء مني ومشي, وان الحد دا يكون قريب وموجود , ومع بعض في حلال ربنا , ويساعدني ويشجعني على مصلحتي لانها اهم عنده من مصلحته هو, ويشجعني على اني اكون احسن.
ندى: طيب ما شادي بيشجعني على المذاكرة دايما وعايزني اتحجب كمان.
نسمة: دا مش حب, دي انانية منه عشان يبرر ازاي هو بيحب مصلحته اكتر منك, وبعدين لما يخليكي تتحجبي لااسبابه العجيبة, طريقة لبسك وعشان الناس ميبصولكيش, دا برضة مش عشانك دا عشانه هو, مش عشان الصح.
ندى: طيب انتي يعني لما اتحجبتي , اتحجبتي للصح؟.
نسمة: امال عشان ايه؟, عشان انا المفروض اعمل كده من غير ما يكون حد هو الي قايلي , او عشان مزعلش الي انا بحبه, يا بنتي حطي اولويات , ربنا ,اهلي , مذاكرتي, شادي, مش تقلبيها كلها من ورا.
ندى: انتي برضة مش فاهمة عشان مجربتيش.
نسمة: انا مش عايزة اجرب , من الي شفته منكو مش عايزة اجرب, انتي فاكرة ان عمرو مجدي هيخطب اختك في الاخر؟,بيتهيألك, عمرو دا انا شفته واتكلمت معاه في عيد ميلاد بنت خاله , و مكانش عارف انها انا اخت هالة, مكانش فاكرني, كنت لسه متحجبة ومعرفنيش, احلفلك بايه انه كان بيعاكس, وكان هيموت ويديني نمرة تليفونه, وانا مرضتش احرجه واقوله انا اخت هالة, ومرضتش اقول لهالة عشان هتقول عليا ببالغ وبألف وهتصدقه لو قالها ايه, بصي يا ندى, انتي عارفة انا بحبك قد ايه, وانتي اقرب الناس ليا , فانا مش عايزة اشوف شادي دا بياخدك مني ومن نفسك وبيضيعك حتى لو باسم الحب, الي بيحب حد, بيحترمه, والي يكلمك من ورا الاهل يبقى مش بيحترمك.
قالت بعناد.
ندى: هو مبيكلمنيش من ورا اهلي, ماما عارفة.
شادي: وياترى مامته عارفة؟.
ارتبكت ندى وهي تقول.
ندى: اكيد عارفة.
نسمة: اقولك انا مامته عارفة ايه, عارفة ان شادي بيكلم بنت صايعة واخداه من مذاكرته وبينزل يقابلها من ورا اهلها, او مصيبة لتكون عارفة ان اهلك عارفين كمان , كده احنا بقى منظرنا وحش اوي.
ندى: بس يا نسمة اسكتي, مهما عملتي مش هتخليني اكره شادي.
نسمة: انا مقلتلكيش اكرهيه, انا قلت حبي نفسك شوية, حبي اهلك حبي ربنا, شادي دا مش كل حاجة ومش باقيلك زي مانتي متخيلة.
ندى: متقوليش كده.
نسمة: انا عارفة اني بكلامي معاكي بقول كلام في الهوا , وانتي حرة تدخلي من هنا وتطلعي من هنا, بس انا مش هسكت وهفضل اقولك طول منا عايشة , عشان ان لسه عندي امل فيكي.
ندى: بقلك ايه يا نسمة, متعمليليش فيها داعية, انتي ملمومة على شوية بنات اليومين دول هيبوظولك دماغك.
نسمة: انا قلتلك وانتي الي عندك اعمليه, ربنا يهديكي.
ندى: خليكي في حالك, انا بحب شادي واستحالة اسيبه.

اللــه ينــــــــور عليكــــــى

يسلـــــــمو

ننتظـــــر المـــــزيد

لو سمحتى يا بنت النيل أنتى لم تكتبى الحلقة السابعة بل كتبتى الحلقة السادسة ثم الحلقة الثامنة لذلك أرجو منكى أن تكتبى الحلقة السابعة حتى تكون القصة كاملة و أرجو منكى الإسراع فى كتبتها

مش لازم ياديززى

حسنًا يا Dizzy Girl

[size=21]الحلقه السابعه[/size]

هالة: حركة وحشة اوي منكو انتو الاتنين, يعني هايدي دلوقتي
لما تعرف هيبقى منظرك ايه؟.
ندى: معرفش.
هالة: وانتي مقلتليش ليه من الاول؟.
ندى: خفت تزعلي.
هالة: ازعل منك عشان صاحبتي؟, يابنتي انتي اختي, وهي كمان مش حب عمرها شادي
دا مثلا,...المهم قوليلي, هو قالك بحبك؟.
ندى: لا.
هالة: امال؟.
ندى: قالي انا كان شكلي هحبك.
هالة: يعني بحبك بس باستهبال شوية.
ندى: معرفش يا لولو, انا اعمل ايه بقى؟.
هالة: سيبك من هايدي, انتي بتحبيه؟.
ندى: معرفش.
هالة: ازاي متعرفيش, انتي معجبة بيه؟.
ندى: ايوة,اوي, وقلبي قعد يدق لما قالي انا معجب بيكي, بس هو غريب يا هالة,
كان بيقول الكلام بالعافية, ولما لقاني هقفل عليه في الكلام اتقمص.
هالة: بس المهم انه نطق, اصل الصبيان الي كرامتهم بتوجعهم دول بيبقو كده,
يبقى الولد شايف نفسه, وشايف انه يحب البنت من بعيد احسن عنده من انه يروح
يصارحها وهي تتنك عليه.
ندى: انا خايفة يا لولو, يعمل فيا زي ما عمل في هايدي,ولو حبيته يسيبني
ويحب واحدة تانية.
هالة: يا حبيبتي هو وهايدي اصلا مكانوش بيحبو بعض, وبيني وبينك كده, هايدي
اصلا بتحب واحد تاني اسمه حمادة السلموني, وتقريبا كده رجعو لبعض دلوقتي.
ندى: يعني ايه؟.
هالة: يعني لو عايزاه يا نيدو دوسي, سيبك من هايدي, ولا يهمك, سبيها عليا.
دخلت نسمة في هذه اللحظة ,فالتفتتا اليها وصمتتا, فتوقفت تنظر اليهما في
شك.
نسمة: مالكو, اتخضيتو كده ليه؟,انا داخلة اجيب الفلاشة.
قالت هالة بمزاح.
هالة: خليكي قاعدة قدام الكمبيوتر طول اليوم زي المتخلفين.
ندى: هما المتخلفين الايام دي الي بيعدو قدام الكمبيوتر, امال الي زيك
بيقولو عليهم ايه.
*************************
ندى: هاخد بيولوجي عند مستر مدحت الي بيدينا في المدرسة.
شادي: انتي برضه لسه مصممة, يا بنتي خدي الكيميا الاول, عشان لو منفعش علمي
علوم تكملي رياضة.
ندى: قلتلك مبحبش الرياضة, انا عندي احول ادبي ولا اخد رياضة اتنين دي, دي
كانت هالة بتصوت منها.
شادي: امال هتدخلي هندسة ازاي؟.
ندى: ومين قال اني عايزة هندسة.
شادي: .........وليه مش عايزة هندسة؟.
ندى: مبحبهاش, وبعدين كفاية اتنين مهندسين في العيلة, دا بابا لو عليه
يطلعنا كلنا مهندسين زيه.
شادي: والله الراجل عنده حق,.......هو انتي نازلة الساعة كام؟.
التفتت ندى تنظر الى الساعة المعلقة خلفها, فلمحت هالة مقبلة وقد انهت
ارتداء ملابسها.
ندى: حالا اهه, هالة خلصت.
شادي: طيب خدي بالك من نفسك, ورنيلي لما تروح.
ندى: اوكاي, عايز حاجة؟.
شادي: لا شكرا, سلميلي على هالة.
ندى: حاضر, باي.
شادي: باي.
واغلقت الخط وهي تلتقط حقيبتها فقالت هالة.
هالة: شادي؟.
ندى: ايوة.
وخرجتا من المنزل واستقلتا المصعد.
هالة: مفيش جديد؟.
ندى: لا.
هالة: مكلمكيش في حاجة تاني؟.
ندى: لا, بس احنا بنتعامل عادي.
هالة: عادي ازاي بقى , دا بيكلمك قبل ما ينزل, واول ما بيرجع, وبترنيله
وانتي نازلة, وبتعرفيه لما ترجعي, وعلى طول مكالمات, لا واللون دا بيبقى
وحش عليكي يا ندى متلبسيهوش تاني, لا البادي دا مفتوح, منين مفيش حاجة
بقى؟.
ندى: ماهو مش انا الي هروح اسأله, اقله انت نسيت الموضوع الي فتحته معايا
ولا ايه؟, هو ومنطقش من يوميها حاجة, اعمله ايه يعني.
هالة: بس خلاص انتو كده بتتعاملو معاملة مرتبطين.
ندى: وايه المشكلة؟.
هالة: يعني انتو كده مرتبطين ولا لأ؟, انا مش فاهمة.
ندى: ولا انا والله, بس انا مبسوطة كدة.
هالة: طيب, انتي حرة, مادام مبسوطة.
*****************
اغلق شادي الخط مع ندى وشرد قليلا, فقال صديقه وهو يقود السيارة.
سامح: ايه ياعم, كل دا كلام, هايدي برضه, انا مش قلتلك اخلع , مش هتسلك
معاك البت دي.
التفت شادي اليه يقول.
شادي: لا مش هايدي, هايدي ايه وبتاع ايه, جيبلي سيرة عدلة وحياة ابوك.
سامح: امال مين الجو؟.
شادي: دي جارتي ,بنت المهندس الي كنت باخد عنده القدرات.
سامح: مين؟, صاحبة هايدي؟, مش دي الي مظبطة مع عمرو مجدي الي في فنية
عسكرية, هو حلقلها ولا ايه؟.
شادي: مش دي, اختها بقى, الصغيرة, الي في اولى ثانوي.
سامح: وانت جاي تعيل على اخر سنة, مش قلنا خلاص بقى, شغل ثانوي دا ننساه,
احنا داخلين على الكليات , يعني, هنشوف اشكال جديدة بقى.
شادي: وايه المشكلة؟, البنت حلوة, وعجباني, وبيني وبينك, انا شكلي بحبها.
سامح: هي وصلت لبحبها, طيب يا سيدي ربنا يكرمك,وانت بقى خلاص مظبط معاها.
شادي: والله مش عارف, انا لغاية دلوقتي معرفش هي حاسة نحيتي بايه, بس احنا
شبه متصاحبين يعني.
سامح: طيب يا سيدي, دوس.
شادي: منا دايس انت عارفني.
سامح: ماهو انا لو مش عارفك مكنتش قلقت عليك, انت من امتى بتكلم بنات, ما
طول عمرك هما الي بيجو لحد عندك يكلموك, وكنا احنا نعد نتحرق دمنا, وانت
تتنك عليهم, وهما زي الصواريخ, وتيجي يعني عند عيلة وتقول معجب بيها, انا
مستغربك.
شادي: انا نفسي مستغرب نفسي.
سامح: هي حلوة اوي للدرجة دي؟.
شادي: لا , حلوة بس عادية.
سامح: يبقى اكيد شخصيتها جامدة.
شادي: بالعكس, دي عبيطة جدا, ولسانها فالت.
سامح: الله, امال ايه الي وقعك فيها.
شادي: تصدق لو قلتلك معرفش, انا لقيتني مرة واحدة بتشد ليها.
سامح: ااااه, ربنا يستر عليك يا معلم, انت لازم بقى تتأكد هي بتحبك ولا لأ,
لانك ضعت خلاص.
شادي: تفتكر هي مبتحبنيش؟.
سامح: انت هتسألني انا ليه؟, اسأل نفسك.
شادي: بس هي كل تصرفاتها بتدل على انها بتحبني.
سامح: برضه لازم تتأكد, مش يمكن انت شايف غلط.
شادي: تفتكر.
سامح: معرفش.
عاد شادي يشرد في قلق وهو يفكر, هل تحبه ندى حقا, ام انها اعتادت عليه ليس
الا.

[b][b]الحلقه الرابعه عشر[/b][/b]

توترت اصابع ندى وهي تقبض على هاتفها في غضب, وهي تستمع الى
صوت الجرس الذي يرن في اذنها برتابة, ثم القت بالهاتف على السرير في
عصبية.
ندى: الغبي مبيردش برضة, انا هتشل يا هالة.
وضعت هالة الكتاب الذي تمسكه بجانبها وهي تقول.
هالة: لأ بقى, انتي هتعدي تروشيني, والله اروح اذاكر عند نسمة في اوضتها,
انا لو منه ما اردش اصلا , دي عاشر مرة تكلميه وهو قالك انا بذاكر
متشغلينيش.
ندى: برضة يرد عليا, افرضي فيه حاجة مهمة وكنت عايزاه ضروري, وفي الاخر
يتخانق معايا لو كلمت مامته على البيت.
هالة: انتي شكلك فاضية ودماغك رايقة ولا انا ولا شادي فاضينلك, روحي يا
بنتي ذاكريلك شوية بايولوجي واطلعي من دماغنا الله يخليكي.
ندى: انتي ليه مش حاسة بيا, طب والله العظيم اتغير , من اول ما الامتحانات
بتاعتكو ما بدأت ودا اتحول, بقى على طول قافل موبايله يا مبيردش, زي مانتي
شايفة, او مزاجة زفت دايما , وبيعاملني كأني حاجة تخنق , انا زعلانة منه
اوي يا هالة.
لم ترفع هالة عينيها عن الكتاب.
هالة: مممم.
صاحت بها ندى.
ندى: انتي يا زفتة مش معايا اصلا.
القت هالة بالكتاب.
هالة: يادي النيلة, يا بنتي سبيني اذاكر حرام عليكي, وروحي ذاكري انتي
كمان, الواد عنده حق, انتي فعلا خنيقة.
ندى: هو مش بيحبني زي ما بحبه, بيعاملني كدة ليه؟.
صاحت بها.
هالة: معرفش.
قالت ندى بتصميم.
ندى: انا هجي بكرة الجامعة بعد الامتحان بتاعكو.
هالة: اتفلقي, بس سبيني اذاكر, بقلك ايه انا هسيبلك الاوضة خالص, وهعد
اذاكر عند نسمة, اهي ارحم منك على الاقل لسانها جوا بقها.
ندى: هتسبيني لوحدي؟, انا كده هتجن من التفكير.
قالت هالة قبل ان تدخل غرفة نسمة.
هالة: ماهو بدل ما اسقط انا.
*****************
نظر شادي مندهشا الى ندى التي كانت في انتظاره اسفل لجنة الامتحان, بمجرد
ما رآها اقبل عليها.
شادي: ندى, ازيك ؟, بتعملي ايه هنا؟.
ندى: جيت اطمن عليك, الامتحان كان ايه؟.
شادي: كان كويس الحمد لله.
ندى: كويس.
وصمتا قليلا, ثم قال.
شادي: انتي جيتي مع هالة؟.
ندى: لأ. هالة جت بدري, انا قلت اجي قبل ما تخرجو عشان معدش لوحدي كتير.
شادي: انتي مش وركي درس النهاردة؟.
ندى: لا دا مراجعة وانا هطنشه مش رايحة.
في هذه اللحظة خرجت سلمى من اللجنة فيمن خرج, فلمحتهما.
سلمى: هاي ندى.
وقبلتها,وهي تسأل.
سلمى: بتعملي ايه هنا؟, اختك عملت ايه في الامتحان؟.
ندى: والله لسه معرفش, مشفتهاش, انا جيت على لجنتكو على طول.
سلمى: صحيح يا شادي, عملت ايه في السؤال التالت؟.
شادي: دا سؤال غبي, انا افتكرت الجدول الي في الباب الرابع بالعافية.
سلمى: جدول ايه يخرب عقلك,الامتحان مفيهوش جداول, انا معملتش جداول, جدول
ايه يا خبر ابيض.
شادي: ياعبيطة السؤال الاول كمان فيه جدول.
سلمى: الصغير الي في اخر الكلام دا انا عملته, بس التالت دا جدول ايه؟.
شعرت ندى بالضجر من الحديث فانتحت جانبا, خاصة بعد وصول معظم الدفعة
لمراجعة الاجابات مع شادي, وشردت قليلا , ثم افاقت على طرقات خفيفة على
كتفها.
هالة: بتعملي ايه هنا؟.
التفتت ندى لاختها التي وضعت كفها على كتفها.
ندى: كنت جايالكو.
هالة: جيالنا مين بقى, انتي جياله هو.
ندى: يعني هو همه, ماهو واقف مع اصحابه ونسي اني هنا اصلا.
هالة: اه صحيح اما اروح اسأله على السؤال التالت عمل فيه ايه؟.
ندى: متتعبيش نفسك ,الاجابة الجدول الي في الباب الرابع الي مرضتيش تذاكريه
امبارح.
هالة: يادي النيلة, دانا كتبته حاجة تانية خالص, هي الجداول دي حد بيذاكرها
اصلا؟.
قالت ندى وعينيها لازالت معلقة بشادي المحاط بأصدقائه.
ندى: ايوة , شادي بيذاكر كل حاجة, مذاكرته اهم حاجة عنده في الدنيا.
وبعد مدة عاد اليها شادي مبتسما.
شادي: محدش في الدفعة عرف حكاية الجدول دي ولا ايه؟, هاي يا هالة.
هالة: انت يا بني دحيح مش بتاع هذار, لو كنت معايا في لجنتي كنت غشيت منك
غش.
شادي: ومين قال اني كنت هغششك اصلا, بقى انا اذاكر واتعب وانتي تاخدي على
الجاهز.
ثم التفت الى ندى التي تعكر مزاجها.
شادي: مالك يا بنتي؟, مبوزة ليه؟.
اشاحت ندى بوجهها في ضيق.
ندى: مفيش.
قالت هالة.
هالة: ااااه, اسيبكو انا لحسن تولعو في بعض قدامي.
وانصرفت,بينما قال شادي لندى في دهشة.
شادي: مالك يا ندى؟,قالبة وشك ليه؟.
ندى: انت بجد مش حاسس انك عامل حاجة؟.
شادي: عامل ايه ياندى خير.
التفتت تقول له بعصبية.
ندى: انت مبتهتمش غير بنفسك وبس , اهم حاجة عندك مذاكرتك وبس , وانا مش مهم
خالص اصلا, كأني ماليش اهمية عندك, انا درجة تانية , والمهم اصحابك
ومصلحتك ومامتك......
شادي: ايه ايه ايه, فيه ايه ياندى؟, طلعتي فيا ليه؟, انتي كنتي كويسة من
شوية , قالتلك ايه هالة غيرتك؟.
ندى: هالة مقالتليش حاجة يا شادي, انا الي اتخنقت, انت ايه يا اخي مبتحبنيش
, دنتا لو مبتحبنيش هتهتم اكتر من كده, هتسأل حتى, ممكن افهم ايه الي
بيحصلك في الامتحانات ؟, بتتغير ليه؟, بتبعد عني بالشكل دا ليه؟.
شادي: ندى ,ندى, انتي مالك؟, متضايقة من حاجة وبتطلعيها عليا؟, مانتي كنتي
كويسة.
ندى: لا انا مكنتش كويسة, بس انت الي مش بتاخد بالك, انا سايبة مذاكرتي
برضة الي وللعلم كتيرة, وجاية عشان اشوفك بعد الامتحان عشان اطمن عليك تقوم
سايبني وواقف مع اصحابك كأني مجتش, وامبارح طول الليل بكلم فيك مبتردش
عليا, دانا لو في المستشفي وبتصل بيك كنت مت وانت مسألتش.
شادي: الله يا ندى مانتي عارفة اني مبحبش حد يزعجني وانا بذاكر, عشان ببقى
مركز.
ندى: والله , ودا لناس وناس بقى, لاني وانا بتصل كنت بلاقيك ساعات مشغول,
الي مش عايز حد يزعجه بيقفل موبايله يا استاذ ,مش بيرد على ناس ناس.
شادي: بالراحة ياندى وطي صوتك وافهمي الاول, انا يابنتي كنت قافل صوت
الموبايل, ولما كنتي بتلاقيه مشغول اكيد انا كنت بتصل بسامح ولا بلومي ولا
بحد بسأله في حاجة , ماهو انا في امتحانات وانتي مسيرك تجربي تفهمي.
قالت وعيناها تدمعان.
ندى: تقوم متردش عليا, مستاهلش منك كلمة واحدة تطمني عليك.
شادي: ايه دا يا ندى؟, لا دانتي زعلانة اوي, لا اهدي, والله العظيم ما كان
قصدي اقلقك او اضايقك, انا بس كنت بتصرف على اساس اني معرفك انك متشغلنيش
بس .
ندى: خلاص يا شادي.
واشاحت بوجهها عنه تبكي.
شادي: انتي بتعيطي؟.
وانتظر حتى هدأت قليلا, ثم قال لها.
شادي: طب انتي فاضية النهاردة؟.
ندى: بتسأل ليه؟, يهمك يعني؟.
شادي: عشان انا عازمك على اغدا , مادام الامتحان كان حلو , وانا لازم
اصالحك.
ندى: ياسلام؟.
شادي: والله العظيم, وحياة عنيكي الحلوين الي انا عيطتهم دول, عشان متزعليش
مني تاني.
*************************
"وبعدها اتمشينا شوية ووصلني وروح"
قالت ندى هذا الكلام وهي مستلقاة على ظهرها بسرير غرفتها ,وتتكلم بهيام.
نسمة: يـــــا حلاوتك.
بينما احمر وجة ميسون صديقة نسمة وهي تستمع الى الحديث الذي يدور, بينما
قالت هايدي وهي تقوم من مكانها بجانب هالة لتضرب ندى على ساقها.
هايدي: فوقي يابت , انتي شاربة حاجة ولا ايه؟, ايه يعني الواد خرجك خروجة
وفسحك شوية, اوام كده نسيتي الي عمله فيكي.
همست ميسون لنسمة.
ميسون: قومي نروح نعد في اوضتك عشان يعرفو يتكلمو براحتهم.
قالت نسمة بصوت عالي.
نسمة: يعني انتي شايفاهم مكسوفين منك اصلا, يا بنتي دول وشهم مكشوف كده
عــــادي .
اعتدلت ندى وهي تقول لهايدي.
ندى: انتي بتقولي فيها, طب والله العظيم نسيت حتى اني كنت متضايقة منه.
قالت هالة وهي تتنهد.
هالة: ماهو احنا كده بوردة وكلمتين حلوين بنتنح وننسى.
هايدي: انتي يابنتي انتي مبتحرميش انا مش قلتلك امه متتطاقش.
مالت نسمة على اذن ميسون.
نسمة: اصلها كانت ماشية معاه قبلها.
ازداد احمرار وجه الفتاة وهي تنظر اليهما في دهشة.
نسمة: منا قلتلك احنا عيلة عادي.
ميسون: انا مقلتش حاجة.
نسمة: انا قلتلك بلاش تتعرفي عليهم هيلخبطولك كل الي انتي اتربيتي عليه في
حياتك.
بينما همست هايدي لهالة.
هايدي: مين فيلم الخطايا الي قاعدة دي؟.
هالة: شششش, دي انتيمة نسمة, بس ايه, خام خام خام.
هايدي: هو لسه فيه بنات كده اصلا.
هالة: اديكي شفتي.
هايدي: اهي اختك نسمة دي الي غريبة, غيركو خالص, طب انتي واتحجبتي عشان اخت
عمرو بتتكلم عليكي, دي ايه الي جابرها دلوقتي؟.
هالة: بس لحسن ندى الي دلوقتي بتفكر , شادي لاعبلها في دماغها, عزومة تانية
ومش بعيد نلاقيها لابسة اسدال.
هايدي: يــــع.
هالة: اه والله العظيم, الواد قاعد يزن عليها , عيب واعدلي لبسك واختك
اتحجبت, انتي مش صغيرة, وانا بغير عليكي وشغل الولاد دا بقى.
هايدي: دي تبقى مجنونة.
هالة: منا قلتلك انا في عيلة المورستان, واحدة مجنونة والتانية شيخة جامع,
وانا , تخيلي بقى.
هايدي: الله يكون في عون امكو وابوكو.
بينما قالت نسمة لميسون في نفس اللحظة.
نسمة: اهو انا عايشة في مستشفى المجانين, اتنين حبيبة ودماغهم اتلحست,
وماما طراوة خالص, وبابا ولا هو هنا اصلا.
فاحمر وجه ميسون في اندهاش , وهي تدير وجهها في الفتيات حولها بخوف.

[b][b][b]الحلقه الخامسه عشر[/b][/b]

ندى: شادي يا
حبيبي انت بجد عسل, ايه دا كله؟.
نظرت ندى حولها لاصدقائها واصدقاء شادي , واختها وصديقاتها , الذين التفو
حولهما في الكافيتيريا مجتمعين مع اطفاء النور, وخروجهم منشدين اغنية عيد
الميلاد لندى, مع دخول التورتة وتصفيق الحاضرين.
قام شادي يقف , ليغني مع الجميع اغنية عيد الميلاد, بينما هي متوقفة واضعة
كفها على فمها من السعادة.
شادي: ايه رأيك في المفاجئة دي؟.
عانقت ندى صديقاته وصديقاتها وهي تحيي الشباب, وتبتسم بسعادة لشادي, الذي
نظر اليها مبتسما, بينما مالت ريهام على سلمى.
ريهام: انتي الي ظبطتي دا كله طبعا.
سلمى: بس يا ريكا.
ريهام: وانا اقول قاعدين تخططو لايه انتي وهو بعد ما الامتحانات خلصت,
وتلاقيه هو ولا كان واخد باله اصلا, وانتي الي خلتيه يعملها كل دا.
قالت ريهام بنفاذ صبر.
سلمى: ايوة يا ريكا, انا الي خليته يعملها العيد ميلاد, ايه يعني؟.
ريهام: انا مش فاهمة انتي بتضحي ليه وعشان مين, يا بنتي هو مش حاسس بيكي.
سلمى: بس يا ريهام متناقشنيش في الموضوع دا بقى تاني, انا معرفتش اكون
حبيبة ليه, سبيني يا ستي اكون صاحبة, انا مرتاحة كده, طول منا قريبة منه
مرتاحة.
ريهام: كمان بتقوليلي ريهام, انتي كده هتخليني ابدأ اكرهه.
وفي احد الاركان قال سامح لشادي, وهو يتابع هايدي بعينيه وهي تتبختر.
سامح: انت مقلتش يعني انك صالحت هايدي.
رد شادي بانكار.
شادي: هايدي مين دي الي اصالحها؟, بلا قرف.
سامح: امال ايه الي جابها؟.
شادي: تلاقيها هالة, انا قلتلها جيبي اصحاب ندى مش اصحابك انتي.
فمرت هايدي من امامهما وهي تنظر اليهما باستخفاف.
هايدي: هاي.
ردا برتابة.
سامح: هاي.
شادي: هاي.
فنظرت الى شادي تقول بسخرية.
هايدي: ماحنا اتنطقنا وفهمنا اهه, وبقينا بنعرف نعامل البنات ازاي.
فقال شادي ببرود.
شادي: من بعض ماعندكم.
هايدي: يعني علمناكو اهه؟ وكسبنا فيكو ثواب.
شادي: طب حاسبي بس لحسن شعرك هيدخل في الطبق, مش تتحجبي بدل مانتي منكوشة
كده, اهو تكسبي فينا بجد ثواب وترحمينا من شعرك الي كل شوية لون.
هايدي: هقلك ايه مانت طلعلك لسان على كبر, الله يرحم ايام مكنتش بتعرف تجمع
كلمتين على بعض.
وانصرفت في برود وهي تدفع شعرها الى الخلف بيديها, بينما قال سامح.
سامح: هي..... هايدي دي فاضية؟.
شادي: معرفش, ليه؟.
سامح: يعني.
شادي: كانت ماشية باين مع واد اسمه السلاموني.
سامح: كانت ولا لسه؟.
شادي: معرفش, ابقى اسألك.
عدل سامح من هندامه, وهو يترك صحن الجاتوة على المنضدة قائلا.
سامح: مالوش لزوم, انا هعرف.
وتوجه صوب هايدي, بينما وقفت هالة بجانب عمرو صديقها.
هالة: عينك يا عمرو.
نزع عمرو عينيه بصعوبة من على فتاة مارة امامه وهو يلتفت الي هالة قائلا في
"استهبال".
عمرو: ايه يا لولو ؟, انا كنت ببص بس, بشوف ايه الي مكتوب على البادي من
ورا.
هالة: كان مكتوب متبصش عيب هالة جمبك.
قال عمرو بمزاح سخيف.
عمرو: ايه دا؟ كل دا كان مكتوب؟, استني اما ابص تاني كده.
ادارت وجهه ناحيتها بيدها وهي تقول بحزم.
هالة: عمرو, اتلم بقى, كل دا وانا معاك امال لو كنت لوحدك تعمل ايه؟.
قال في براءة مصطنعة.
عمرو: عمري ما هعمل حاجة, انا ببص اصلا عشان انتي جمبي, لومكنتيش جمبي كنت
هبص في الارض.
هالة: يا سلام.
امسك يدها وقبلها وهو يقول.
عمرو: انا اقدر برضه ابص على حد ومعايا القمر دا, دانا لازم ابقى اعمى.
هالة: ماشي يا اعمى.
ثم قال بمزاح.
عمرو: بس برضة مقلتليش, هو الكلام كان مكتوب من ضهر البادي ولا من وشه.
ضربته هالة على وجهه بمزاح غاضب, فأمسك يدها وقبض عليها وهو يضحك, بينما
اقتربت ندى من شادي, تقول له.
ندى: حبيبي دا احلى عيد ميلاد قضيته في حياتي, دا حتى احلى يوم قضيته في
حياتي.
شادي: عشان تعرفي ان حبيبك مبينساكيش.
ندى: انت تقدر تنساني اصلا.
شادي: غمضي عنيكي.
فامتثلت , فاخرج شيئا في علبة مغلفة من جيبه.
شادي: فتحي.
ندى: هاااااه, شادي ايه دا.
فتحها شادي واخرج سلسلة في اخرها حرف ن بالانجليزية.
ندى: شادي,.......دي ...جميلة اوي.
شادي: عشان انتي جميلة اوي, لفي البسهالك.
فالتفتت ندى ورفعت شعرها بينما البسها شادي السلسلة.
شادي: عشان متنسنيش ابدا.
ندى: انا عمري ما بنساك ولا هنساك, انا بحبك اكتر من اي حاجة او اي حد في
الدنيا.
اشاحت سلمى بعينيها عن منظر ندى وشادي, وهي تتألم.
ريهام: مهما عملتي عشان تقربي منه, هو هيقرب منها هي, احسنلك ابعدي عنه.
سلمى: انتي مش فاهمة, هو مسيره في يوم يعرف مين الي بيحبه بجد, وهيبص مش
هيلاقي حد جمبه الا انا.
*********************
انحنت ندى على امها وهي تمسك بالسلسلة الذهبية, وتريها لها.
ندى: شفتي حلوة ازاي.
امسكت الام بالسلسلة تنظر اليها وهي تبتسم.
الام: جميلة يا حبيبتي.
فقالت نسمة, وهي تقف في منتصف الحجرة واضعة كفيها في وسطها.
نسمة: ومفكرتوش تعزموني حتى يعني, مجتش على بالكو.
قالت هالة وهي تمشط شعرها .
هالة: مكانش هيعجبك الجو, فيه ناس كتير مبتحبيهاش.
نسمة: وانا اصلا مكنتش هاجي, عشان فعلا فيه ناس كتير مبحبهاش, بس مش عيب
يعني انك متعزمنيش, دنا اختك, دنا اقربلك من عمرو.
الام: معلش يا نسوم, اختك محبتش تضايقك وتجيبك غصب عنك.
نسمة: يعني يعملولها عيد ميلاد وميقولوليش حتى, استغفر الله العظيم.
قامت ندى تقبلها في وجنتها وتقول.
ندى: خلاص بقى يا نيسو متزعليش , انا والله مكنت اعرف حاجة وبعدين انتي
عندي بميت عيد ميلاد.
نسمة: لا ياستي مانتي كفاية عليكي سي شادي, بتاعك, على العموم كل سنة وانتي
طيبة.
وتركتهم خارجة متوجهة لغرفتها.
الام: اصل نسمة دي بتموت فيكو, فبتغير عليكو اوي.
هالة: قصدك بتغير مننا , عشان هي مش لاقية حد يبصلها.
ندى: بس يا لولو متقوليش كده, هي صحيح ناشفة شوية بس نسمة امورة.
الام: انا مش عارفة هي طالعة كده ليه؟, كلامها عامل زي الطوب, ومدهولة على
طول, مش تترقق زي البنات, لا دايما واخدة الحياة جد, دي حتى مشيتها عاملة
زي العسكري.
جلست ندى في حضن امها وهي تقول.
ندى: سيبك منها, شوية وهتصفى , بس اليوم النهاردة يامام كان عسل, كان عايزك
بجد.
الام: يا بنتي انتو شباب في بعضيكو انا كنت هاجي اعمل ايه؟.
هالة: شفتي ياندى, مش سامح قعد يشتغل هايدي النهاردة.
ندى: يووووة, هي هايدي دي مبتعتقش.
هالة: وعمرو برضه كان مخنوق منه, اصله مبيحبوش.
الام: هو عمرو الي وصلكو النهاردة يابنات؟.
هالة: ايوة طبعا, كان لازم عربية , هنشيل الهدايا في ايه؟.
الام: انا مش قلتلك متركبيش معاه العربية تاني يا هالة, افرضي حد شافك
دلوقتي او قال لباباكي .
قالت هالة بعصبية.
هالة: انا مكنتش لوحدي كان معايا ندى, وبعدين احنا كان لازم حد يرجعنا عشان
الهدايا, وانا اصلا مبقتش اركب معاه العربية خالص من ساعة ماقلتيلي, انا
معملتش حاجة الولد كتر خيره وصلنا لحد البيت ولو بابا كان شافني او اي حد
كنت هقوله عادي , يعني لو كان مهند ابن خالتي الي وصلنا برضه كان هيبقى نفس
المنظر.
الام: انا مبقلكيش كده عشان تزعلي, انا بقلك بس خدي بالك, عشان عربية عمرو
معروفة, وباباكي لو عرف هيعملهالك شغلانة.
ندى: احسن حاجة ان شادي معندوش لسه عربية, محدش هيعملي مشاكل.
قالت هالة بغضب.
هالة: انا محدش يقدر يعملي مشاكل ومش عشان منى اخت عمرو اتكلمت عليا شوية ,
يبقى خلاص اسيبه عشان خاطرها, لأ دانا اعد على قلبها واعرف اتعامل مع عشرة
زيها.
ندى: هو مش خلاص معادلوش الا سنتين ويتخرج مش هيجي يتقدم بقى.
هالة: كل واحد يخليه في حالة, خليكي في شادي بتاعك الي لسه قدامه خمس سنين
دا.
ندى: والله انا لسه صغيرة ومش مستعجلة, وهو كمان يشوف مستقبله ,وبعدين احنا
اتفقنا اول ما يخلص هيجي على طول هكون انا في تالتة كلية.
الام: ربنا يكرمك يا بناتي ويفتح في وشكو, وينور ليكو طريقكو,ويبعد عنكو
الناس الوحشة .
عادت ندى الى حضن امها في اطمئنان.
ندى: يارب يا ماما.

[/b]

[b] [b][size=21][b][b]الحلقه السادسه عشر[/b][/b]

شادي: اقفلي كلام في الموضوع دا
خالص, احنا اتكلمنا كتير وانتهينا منه خلاص, عايزة متتحجبيش انتي حرة لكن
انا بقى انسيني, وانا قلتلك الي عندي.
قال شادي هذا الكلام بصوت حاد في التليفون.
ندى: انت ليه بتهددني كده على طول؟, انت بتحط دي قصاد دي ليه؟,
شادي: عشان انا كلمتك في الموضوع دا ميت مرة , مبتسمعيش الكلام.
ندى: طيب منا بطلت البس اللبس الي بيضايقك اهه, وسمعت كلامك.
شادي: انا مقلتش كده وبس, احنا اتفقنا انك هتتحجبي.
ردت ندى بشيء من العصبية.
ندى: والله انت بس الي اتفقت مع نفسك, انا ماتفقتش مع حد.
شادي: يعني ايه؟.
ندى: يعني انت الي كنت بتتكلم وترد على نفسك, انا مكنتش بقولك حاجة, انت بس
الي اتعودت انك تقول وانا انفذ.
قال شادي بغضب.
شادي: امال ايه المفروض ؟, المفروض ان سيادتك الي تقولي بقى وانا انفذ؟.
ندى: لو سمحت متتريأش ,انا مقلتش كده ,انا قلت....
شادي: ماهو الي كان ناقص تقولي كده, بصي ياندى انتي بقيتي تتعبيني في
المناقشة كتير ,وبتجادلي على طول, وانا امتحانات اخر السنة قربت ومش طايق
نفسي.
ندى: اااااه , داحنا رجعنا تاني لتطنيش الامتحانات, انت بقى مش مشكتك
الحجاب , انت بس بتطهقني عشان ابعد عنك ايام الامتحانات عشان تفضى
للمذاكرة,انا مش فاهمة هي المذاكرة دي ضرتي ولا ايه؟.
شادي: افهمي الي تفهميه, انتي اصلا دماغك دي مريضة.
ندى: مش انا دماغي مريضة يا شادي؟, طيب ايه رأيك بقى انا مش هتحجب, واهلى
سايبني بشعري وموافقين ,وانت ملكش كلمة عليا.
شادي: طيب, خليكي بقى مع اهلك.
واغلق الهاتف بغضب.
ندى: الو,.....شادي ,......الو.
نظرت ندى للهاتف بحنق وهي تغلقه, ثم دخلت غرفة نسمة بعنف.
ندى: هالة ,عايزاكي.
قامت هالة من جانب نسمة ,وهي تغلق الكتاب الذي بيدها تتساءل.
هالة: خير , شكلك متهزأة.
امسكت نسمة بيد هالة تجلسها ثانية.
نسمة: ماتتكلمو هنا , لازم يعني تختفو انتو الاتنين في الاوضة بتاعتكو.
عادت هالة لجلستها بجانب نسمة, بينما جلست ندى بجانبهما وهي تقول.
ندى: انا اتخانقت انا وشادي.
نسمة: احسن.
هالة: ليه؟.
ندى: عايزني اتحجب برضة.
هالة: طب ماتتحجبي يا بنتي وتريحيه, انتي مش بتحبيه؟.
ندى: بحبه , بس هو بيطلب الحاجة كأنها امر, انتي عارفة لو كان بياخدني
بالراحة واحدة واحدة, والله كنت وافقت, لكن اسلوبه دايما زبالة كده, يخلي
الواحد مش عايز يسمع الكلام.
اعتدلت نسمة وهي تقترب من ندى .
نسمة: بصي يا نودي, هو عنده حق في حاجة, انتي لازم تتحجبي, وتتحجبي عدل مش
زي البت دي الي لبسها كله هوهو, مزادش عليه الا ايشارب من فوق وهدومها
صايعة, لا تتحجبي صح, عشان ربنا يرضى عنك, وعشان دا المفروض, انما لو
هتعملي دا علشان خاطر شادي,... متعمليهوش احسن.
ضربتها هالة على كتفها وهي تتكلم.
هالة: اسمعيني انا سيبك من البتاعة دي, يا بنتي ريحيه, الولاد مبيجوش الا
لما بيحسو انك بتسمعي الكلام وخلاص, يعني عمرو كده ساعات بيركب دماغه في
حاجات هايفة, متنزليش الشارع الفلاني, او متكلميش فلان, وبيبقى من غير سبب ,
لمجرد انه يحس انه ولد, انتي ساعة القرف دا تكبري دماغك خالص, وتعملي الي
هو عايزه, وبعدين تبقو تتكلمو, ومتسيبيهوش يمسك عليكي حاجة, بالعكس داهو مش
هيقدر يرفضلك طلب بعد كده لانك بتسمعي كلامه.
نسمة: لاحول ولا قوة الا بالله, بقى بالله عليكي دا كلام, يعني تفضلي قاعدة
رابطة نفسك بواحد بيتحكم فيكي, وماشية على مزاجه عشان يثبت رجولته وبس وهو
في الاول وفي الاخر عيل لاراح ولا جه,, يابنتي ربنا بيحاسب قبل كل شيء على
النية, يعني لما تعملي حاجة لله, بتتحسب, لو لحد تاني مبتتحسبش , لما
البنت دي تتحجب وهي نيتها ترضي شادي, يبقى خلاص زي قلته, انا مش عارفة ربنا
الي اهم عندك ولا شادي.
ردت ندى بسرعة.
ندى: ربنا طبعا.
نسمة: مش باين, اهو كلام وبس.
هالة: انتي عايزة ايه يعني؟.
نسمة: انا نفسي انتو الاتنين كده تفوقو وتعرفو ان الله حق, يعني انتي وهي,
المشكلة عندكو مش في الصبيان الي بتعرفوهم, المشكلة في انكو بتعملو حاجة
حرام ومش مقتنعين اصلا انها حرام.
هالة: يابنتي انا وعمرو في حكم المخطوبين, اهله عارفين واهلي عارفين ,احنا
مبنعملش حاجة غلط.
نسمة: مفيش حاجة اسمها في حكم, فيه حاجة اسمها اه احنا مخطوبين قدام ربنا
وقدام الناس, ساعتها تقولي احنا مبنعملش حاجة غلط.
هالة: خلينالك الحلال والحرام يا ست نسمة لما نشوف هيوديكي لفين.
فقالت ندى بشرود.
ندى: طب انتي ومامته عارفة وموافقة وبتكلميها وبتكلمك, انا بقى اعمل ايه في
مامته المرعبة دي.
نسمة: والله ام شادي دي ست محترمة جدا, انا لو منها اعمل اكتر من كده, ماهو
لما تفضلو تكلمو بعض وفي الاخر يجي يقول هيخطبك, هتبقى امه مش طايقة تسمع
سيرتك اصلا, ومحدش يقدر يلومها.
هالة: انتي بتتكلمي في حاجة لسه بدري عليها, يا نيسو يا حبيبتي انتي
بتتكلمي كده بس عشان لسه مجربتيش, لما تحبي هنبقى نشوف, ماهي كانت بقول زيك
والله.
نسمة: مش ضروري اجرب عشان اعرف الصح من الغلط, مش لازم احط ايدي جوة الفرن
واقول لازم اجرب عشان اعرف بيحرق ولا لأ, الحلال بين والحرام بين.
هالة:ااااه, دا كلام ست ميسون بقى, ولا كلامك انتي ,مانتي مصاحبالي شوية
بلاوي.
نسمة: انا مش إمعه زيك عشان كلامي يبقى كلام حد, وعلى الاقل لو ميسون الي
قايلاه فانا باخد كلامي من بنت ومحترمة كمان, مش كل كلامي, عمرو قال لأ
شادي قال, ولاغية شخصيتي خالص.
ندى: يعني اعمل ايه دلوقتي؟, انا زعلته مني.
هالة: اعملي اي حاجة الا انك تكلمي البت الي اسمها سلمى دي زي كل مرة, انا
بصراحة مبستريحلهاش.
ندى: انا اصلا مش هكلمه ومش عايزة اصالحه , عشان يحس بقيمتي شوية.
هالة: ايوة كده اتقلي عليه ,وهو هيجيلك مدلوق على وشه.
هزت نسمة رأسها في اسف وهي تقول.
نسمة: ربنا يهديكو, بجد, ربنا يهديكو.
**************************
جلس شادي بجانب سلمى في الكلية وهو يقول.
شادي: دماغها ناشفة ومبتسمعش الكلام, انا مش فاهم ليه مش راضية تتحجب,
مبسوطة هي كده وهي ماشية بشعرها.
سلمى: معلش يا شادي , اعذرها برضة ,هي لسه صغيرة.
شادي: يعني هي غلطتي اني بحب واحدى اصغر مني, اعمل ايه بس انا مش فاهم.
سلمى: ممكن برضة.
شادي: ممكن ايه؟.
قالت بحذر.
سلمى: ممكن تكون غلطتك فعلا انك بتحب واحدة اصغر منك, يعني ندى واضح ان
تصرفاتها عيالي اوي.
شادي: بس هي مكانتش كده يا لومي, العند دا جديد.
سلمى: انت لازم تاخد موقف عشان هي تاخد بالها, وتعرف ان الي بتعمله دا غلط,
ومتتعودش انك بتعدي.
التفت اليها يقول.
شادي: مش كده برضة؟.
سلمى: وبعدين لو مابقتش كويسة معاك, لازم تتصرف بقى وتحط حدود.
شادي: لا يابنتي مش للدرجة دي انا بس هقرص ودنها عشان تتعلم تتعامل معايا,
بس انا مبفكرش اسيبها ,انا بحبها.
تراجعت سلمى.
سلمى: وانا مقلتش سيبها خالص, انا قلت بس يعني ابقى ...خد بالك بقى.
شادي: اه, ربنا يستر, والله موضوع ندى دا معصبني دايما, يعني كمان في البيت
ماما مبتسبنيش في حالي, على طول بتدخل الموضوع دا في الكلام, ومبترحمنيش,
انا زهقت, لا عارف اذاكر ولا عارف اركز.
سلمى: ملكش انت دعوة بس وركز في مذاكرتك ومصلحتك , مامتك عندها حق, لو شلت
مادة محدش هينفعك, ولاحتى ندى نفسها هتتأذي,انت لازم تخاف على نفسك اكتر من
كده.
شادي: عندك حق يا لومي, والله انا مش عارف من غيرك كنت هعمل ايه؟.
سلمى: مكنتش هتعمل حاجة.
شادي: لا والله بجد, انتي من اقرب الناس لقلبي هنا, وصاحبة بجد, وخايفة
عليا وعلى مصلحتي دايما.
خفق قلب سلمى وهي تستمع الى هذا الكلام منه, فقالت بصوت خافت.
سلمى: بس انت تقدر.
شادي: ايه؟.
سلمى: بقول انت تقدر تنكر خيري, دانا لولايا مكنتش نجحت.
شادي: يا سلام, بأمارة اني كنت انا الي مخلصلك مشروعك الاخراني.
سلمى: ياراجل.
واخذا يمزحان بينما قلب سلمى يخفق بعنف لكلامه الرقيق السابق,وعقلها يتمنى
ان يترك ندى.[/b][/size]

[/b]

الحلقه السابعه عشر

شادي: شفتي شكلك في الحجاب حلو ازاي ,مش وحش ولا حاجة.
تأففت ندى وهي تربت بيدها على رأسها تعدل حجابها للمرة الالف, وهي تقول.
ندى: ومين قال ان انا وحشة؟.
شادي: يعني ماكانش له لزمة بقى كل الزعل والقمص والمشاكل الي حصلت, والناس
تتدخل وسلمى وهالة, والي حصل دا كله.
ندى: والله مش انا الي دخلت الناس ,وبعدين الخصام كان جاي على مزاجك, كنت
عارف تركز في امتحاناتك ولا ايه؟.
شادي: انا قلتلك ميت مرة متقوليش كده تاني, انا مكنتش عارف اركز خالص,
بالعكس , الموضوع دا كان على طول مضايقني.
ندى: هنشوف لما تطلع الاول على الدفعة , هعرف اد ايه كنت متضايق ومش عارف
تركز.
شادي: ايه يا ندى, انتي تكرهي اني اطلع الاول على الدفعة؟.
ندى: لا يا حبيبي , دانا اتمنى, بس كان نفسي تجيب امتياز في حبنا الاول.
شادي:طب قفلي على الموضوع دا بقى , احنا مصدقنا اتصالحنا.
ندى: صحيح احنا مستنيين مين ؟, هتوديني فين النهاردة؟.
شادي: مستنيين سامح وريكا, هيعدو علينا بالعربية, هنروح نركب خيل.
ندى: اللـــــه, بجد يا شيدو, انا كان نفسي في كده من زمان.
شادي: شفتي , انا بعملك كل الي انتي عايزاه ازاي, عقبال ما تعمليلي كل الي
انا عايزة, والقصة دي تدخل لجوه بقى.
ابعدت ندى يده عن وجهها ,وهي تعدل شعرها البارز من اسفل الايشارب.
ندى: ملكش دعوة بقى, انا مش خلاص عملت الي انت عايزة.
شادي: ماشي يا ستي, اهو سامح وصل اهه.
اوقف سامح السيارة امام الكافية, فذهب شادي لدفع الحساب, ثم عاد اخذا ندى,
وتوجها للسيارة وركبا بالخلف, بينما التفتت ريهام تقول في سعادة.
ريهام: ايه دا يا نودي؟, مبروك على الحجاب.
ندى: الله يبارك فيكي.
سامح: ازيك يا ندى؟.
ندى: الحمد لله يا سامح.
شادي: اتأخرت ليه يا بني؟.
سامح: ريكا يا سيدي, كانت رايحة ترجع بلوزة , وقعدت سنة في المحل وفي الاخر
مرجعتهاش.
ريهام: وانت ايه الي مضايقك, دانا حتى منزلتكش معايا, انت مش كنت قاعد في
العربية في التكييف.
سامح: ياستي فداكي, ولو مش قاعد في تكييف برضة.
ضربته ريهام على يده, وهي تقول.
ريهام: ولما هو كده, بتتريأ ليه؟.
لف سامح يده على كف ريهام ,وهو يقول برقة.
سامح: انا اقدر اتريأ برضه.
فنظرت اليهما ندى بدهشة , والتفتت الى شادي وهمست بأذنه.
ندى: هما مرتبطين ولا ايه؟.
فأومأ شادي برأسه ايجابا .
ندى: من امتى؟.
شادي: من قبل الامتحانات كده.
فأرجعت ندى رأسها للخلف وهي تتذكر كيف كانت هايدي تحكي لها ولاختها, عن
سامح واتصالاته الهاتفية بها, ودهشت قبل ان تشرد قليلا, وبينما هي شاردة
لمحت سيارة متوقفة بجانب سيارتهم في اشارة المرور, وتعرفت على السيارة في
الحال, فقالت دون ان تفكر.
ندى: ايه دا؟, عربية عمرو اهي.
ثم تجمدت الابتسامة على شفتيها وهي تلمح بجانبه فتاة في السيارة, تضحك وهو
يضع كفه على شعرها, فتسمرت وهي تقول.
ندى: ايه دا؟, مين دي؟.
فالتفت الجميع ينظرون حيث تنظر.
سامح: مش دا عمرو مجدي؟, هو معاه فردة جديدة, الواد دا ابن لذينة, كل اسبوع
بشوف معاه بنت شكل, فاكر يا شود لما شفناه في ال..........
فالتفتت ندى تنظر اليه في حدة, بينما نظر اليه شادي من خلال مرآة السيارة
بلوم, فابتلع بقية حديثة وهو ينطلق بالسيارة.
سامح: الاشارة فتحت.
فالتفتت ندى بجسدها كله تتبع حركة سيارة عمرو, وهي تبتعد عنهم في سرعة,
والفتاة تضحك لعمرو في دلال, ثم قالت لشادي بغضب.
ندى: مقلتليش يعني انك شفت عمرو مع بنت.
قال شادي في ارتباك.
شادي: انا قلت يمكن تكون قريبته ولا حاجة, وقلت اكيد هالة عارفة.
ندى: لا طبعا مكانتش عارفة.
وتعكر مزاجها وابتعدت عن شادي قليلا لتلتصق بالنافذة.
شادي: خلاص بقى يا حبي, مالك مزاجك باظ ليه؟.
ندى: مش عارفة هقولها ازاي دي؟, دي كانت تشيط فيها.
شادي: مش لازم تقوليلها.
التفتت اليه وهي تقول.
ندى: مينفعش, لازم تعرف.
شادي: خلاص, قوليلها بس بالراحة عليها.
ندى: ربنا يستر.
************************
قالت هالة بصوت عال وهي تتحدث في الهاتف مع عمرو, في غرفتها هي وندى, بينما
جلستا نسمة وندى تراقبانها في قلق.
هالة: وانت بقى مشكلتك مين الي قالي؟, ..........الي قالي قالي يا سيدي,
......انت متجاوبش سؤالي بسؤال, رد عليا, مين البنت الي كانت معاك في
العربية؟.
ثم صمتت قليلا وهي تدور بالهاتف في الغرفة ووجهها يزداد احمرارا وغضبا.
هالة: ولما هي بنت خالة اشرف , ايه الي ركبها معاك في
العربية؟,......ياسلاااااام

, ...وعايزني انا بقى اصدق الفيلم الهندي دا.
قضمت ندى اظافرها وهي ترقب اختها في توتر, فقالت لها نسمة.
نسمة: بصي بصي, اهي هتطلع تطلع وتنزل على الفاضي, هيثبتها بكلمتين.
هالة: انت بتزعق ليه؟,...انت بتزعقلي انا وانت الي غلطان,....لا مبرميش
وداني للناس, بس انا قلتلك كام مرة لو حد جه قالي تاني انك بتركب بنات معاك
في العربية يا عمرو مش هيحصل طيب.
نسمة: ومش بعيد تطلعك انتي الي غلطانة.
هالة: الي شافك متأكد انها عربيتك.
همست ندى وهي تنظر لهالة.
ندى: والله العظيم هو.
هالة: لا مش هيعدي, انا كل مرة بعدي, بس لحد كدة وكفاية,....لا مش
ههدى,....خلاص ياعمرو انت حر.
واغلقت الهاتف في عنف.
ندى: قالك ايه؟.
هالة: بيقولي بنت خالة اشرف.
نسمة: هو هيغلب اعذار.
هالة: اخرسي يا نسمة عشان انا مش طايقة دبان وشي.
قالت ندى بتردد.
ندى: ما يمكن... عنده حق.
هالة: انتي هتستهبلي انتي كمان؟, انتي مش قلتيلي كان حاطط ايده على كتفها؟.
اومأت ندى برأسها في حذر, بينما رن هاتف هالة .
هالة: ودا مين دا كمان.
وقامت لتلتقط الهاتف , ونظرت اليه, ثم امتعضت وهي تقول.
هالة: يييييه, امه, انا ناقصاها انا كمان, تلاقيها متصلة تصالحني عليه.
واخذت الهاتف وخرجت من الغرفة وهي ترد.
هالة: الو,...ايوة يا طنط , ازي حضرتك عاملة ايه؟, عاجبك الي عمرو عمله
دا....
بينما قالت نسمة لندى.
نسمة: بصي خارجة شايطة ازاي, هترجع مصدقاه بعد عملية التثبيت الي
هتعملهالها امه, ومعلش يا حبيبتي وهو مبيحبش الا انتي وكل الصبيان كده.
التفتت نى تقول في خوف.
ندى: بس هالة بتحبه اوي, انا خايفة يسيبو بعض بسببي.
نسمة: لا متخافيش, هالة دي معمولها عمل الربطة الابدية في عمرو مجدي, يعني
هي دي كانت اول مرة يتشاف مع واحدة, وبرضة بترجعله زي الهبلة.
ندى: بس هي عشان بتحبه بتسامحه, وبتديله فرصة تانية.
نسمة: يا حلاوتك, وهي الفرص دي بقى مبتخلصش, ولو اتجوزو , هتفضل تديله فرص
برضه؟.
ندى: انا حاسة بيها اوي, ازاي تبقى بتحب واحد الحب دا كله, وبتستحمل معاه
الحلو والوحش, وهو بارد كده, ومبيتغيرش عشانها.
نسمة: انتي بقى بتتكلمي عن هالة, ولا بتتكلمي عن نفسك؟.
ندى: انا بتكلم عن الصبيان عموما, كلهم خاينين وبايظين, يعني انتي عارفة
سامح؟, طلع مرتبط بريكا, ولما كلمت شادي قلتله دا كان بيتصل بهايدي يكلمها
بالساعات, وانا شفت بعيني ,قالي عادي, وفيها ايه يعني, هو بيحب ريكا, بس
هايدي دي تضييع وقت وبس.
نسمة: بيحب ريكا وهايدي تضييع وقت!, ياعيني عليكي يا هايدي, مفيش حد عمره
هياخدك جد ابدا.
ندى: انا خفت ليكون شادي كمان بيحبني انا وبيكلم واحدة تانية تضييع وقت.
نسمة: ممكن طبعا.
ندى: لا يا نسمة متقوليش كده,دانا كنت اموت فيها ,.....هما ليه الصبيان
كلهم كده؟.
نسمة: عشانهم لسه صبيان زي ما بتقولي, شوية عيال, وانتو كمان شوية بنات
عيال برضة.
ندى: لا يا نسمة, الحب مالوش سن, يعني قوليلي انتي لؤي ابن طنط سمية بيحبك
ليه.
نسمة: يــادي الغباء, يا بنتي لؤي دا عيل فاضي, وعشان وهو صغير كانو بيعدو
يقولوله هنجوزك نسمة هنجوزك نسمة, صدق وكبر الموضوع في دماغه, اصبري عليه
شوية كده لما يدخل تالتة ثانوي هتلاقيه بيكلم بدل البنت عشرة.
ندى: لا يانسمة, هو بيحبك انتي وانتي عارفة دا , ومبيكلمش حد .
نسمة: والمفروض اني اعمله ايه؟, واحد رايح تالتة ثانوي وانا رايحة تانية
ثانوي.
ندى:بيقولو خدي الي بيحبك ومتاخديش الي بتحبيه.
نسمة: دا على اساس انه متقدملي؟.
ندى: انتي مش عاجبك لؤي؟.
نسمة: الله يخرب بيت الحب الي انتو فاهمينه غلط دا, يا بنتي قلتلك انا مش
عايزة , انتي ليه مش فاهمة.
ندى: انتي ازاي اصلا عايشة من غير حب كده عادي, انا بستغرب, بقى مبيبقاش
نفسك ان فيه حد يسأل عليكي, ويهتم بيكي, ويقولك كلام حلو, وتلاقيه كده خايف
عليكي من الهوا حتى.
نسمة: طبعا بيبقى نفسي, بس لو بيحبني هيسأل عليا من بعيد ,وهيهتم بيا انه
ميأذنيش في سمعتي وفي نفسي , ويخاف عليا من نفسه ومن انه يبقى عايز يرتبط
بيا, ومن كلامه الحلو الي هيقولهولي, انه ممكن يجرحلي مشاعري ويخليني يوزد.
ندى: يوزد؟؟؟, ايه يا بنتي انتي هتلبخي ولا ايه؟.
نسمة: اه يوزد, زي الموبايلات كده,اول ماتحطي فهيا خط بتتباع يوزد,والبنات
كده, من كتر ما البنت بيتقالها كلام حلو, بتتقل ودانها ومبتبقاش مستطعماه
بعد كده, وبعدين الحاجات الي زي مسك الايدين والنظرات والحاجات دي, عشان
حرام , ربنا بيعاقب الي بيعملوها بعدين, بيشيل منها البركة بعد الجواز
بتبقى ماسخة وبايخة.
ندى: ايه ايه ايه؟, ايه الكلام دا يا بنتي, متعديش مع البنت ميسون دي تاني,
هي بتاخدك فين المحاضرات الي بتحضروها دي سوا, الله يخرب بيتك, هتتمسكو
امن دولة ان شاء الله, كده غلط يا نسمة.
نسمة: احنا مبنعملش حاجة غلط, انا محتاجة حد يقف جمبي ويشجعني, لاني خايفة
ابقى زيكو في يوم من الايام, ولا انتو بقيتو بتقلبو الحقايق , بقي الي انا
بعمله غلط والي انتو بتهببوه هو الصح.
ندى: طيب مبتقوليش لماما ليه انك بتروحي؟,لما هو صح.
نسمة: عشان هتقولي بلاش , وانا بقى بصراحة مش مستعدة اتخانق معاها.
ندى: على فكرة انتي كدة غلطانة؟.
نسمة: بس غلط اهون من غلط, انا عشان اعجبكو لازم اكون ماشية مع ولد,
وبصراحة كده انا مش عايزة اعجبكو, انا قدمي مستقبل افكر فيه, ربنا بس يستر
عليكي انتي ونتيجتك الي هتطلع, لما نشوف اخرة الحب بتاعك دا ايه.

الحلقه الثامنه عشر

دخلت والدة شادي من بلكونة البيت وهي
تقول له, وهو جالس في غرفة المعيشة امام التلفاز مع اخيه.
الام: هي ندى اتحجبت؟.
نظر اليها مندهشا من السؤال.
شادي: اه, وانتي عرفتي منين؟.
الام: اصلي شفت امبارح بنت معصعصة كدة , شبهت عليها بس شكيت عشانها كانت
لابسة طرحة.
شادي: لا ,ممكن تكون هي.
وصمتت قليلا ثم قالت.
الام: وهي مالها كده مطلعة نص شعرها برة؟,انا عارفة انت عاجبك فيها ايه؟.
قال شادي بنفاذ صبر.
شادي: وبعدين بقى ياماما , احنا مش اتفقنا تبطلي تلقيح كلام, والي عايزة
تقوليه قوليه على طول.
الام: وانا القح ليه يا خويا انت حر, انتي مش كبير وعارف مصلحتك, لما نشوف
هتطلع من الاوائل على الدفعة ولا لأ, ونشوف ست الننوسة بتاعتك هتجيب كام في
الثانوية العامة.
قام شادي وهو يرتدي خفه.
شادي: انا غلطان اني برد عليكي اصلا, انا هقوم خالص من هنا, عشان مانمسكش
في بعض زي كل مرة.
وبعد انصرافه التفتت الام لاخيه المتضجع بجانبها على الاريكة.
الام: هو انا كلمته دا؟.
هاني: وهو انتي بتعملي حاجة ابدا.
لطمته على ساقه وهي تقول.
الام: قصدك ايه يازفت انت؟.
اعتدل وهو يقول.
هاني: مقصديش يا فريدة ياقمر, بس انتي ارضي عني الله يرضى عنك, هو جزمة
قديمة وانا اصلا طالع اضربهولك.
وذهب خلف اخيه في سرعة ليتخلص من رفقة امه.
هاني: انتي خلعت وسبتني لوحدي.
شادي: مش احسن مااتخانق معاها.
هاني: تقوم سايبني عشان تاكلني انا.
شادي: والله ماعارف احلها ازاي دي, امي هتفضل تكرة ندى لحد امتى.
هاني: هههه, لحد ماتسيبها وتكلم واحدة تانية , هتتشغل وتطلع عين التانية.
شادي: مبهذرش يا هاني, انت لسه مش فاهم عشان صغير, لما تكبر وتحب, وتلاقي
ماما بدأت تخنق عليك هتفهمني.
هاني: انت محسسني انك خلاص رايح تتقدم بكرة, عادي يا بني فكك, على ما
المواضيع دي ما تبقى رسمى هتكون امك نسيت اصلا, وابوك عايز يخلص منك , ومش
هتبقى فارقة معاها ندى ولا فتكات حتى.
شادي: وهي امك دي بتنسى برضة.
هاني: بس يا شود انت الي ع الحجر, يعني لما اتشجنت لها شوية بقت تخاف منك, و
يادوب بتلقح كلام من بعيد, بس مبتعملش حاجة, امال انا الي اعمل ايه, دي
خدت الموبايل ومشيت على نمر البنات بنت بنت تتصل بيها تهزأها, وخلت شكلي
زبالة قدامهم في الدروس.
شرد شادي ثم قال.
شادي: انا بجد مش عارف اعمل ايه؟, هي صحيح ندى طيبة وبتسمع كلامي, بس لو
حصلت مشكلة في مرة بينها وبين ماما, مش عارف هقف في صف مين.
**********************
ندى: الو , ايوة لقيت حاجة؟.
شادي: لا , المواقع كلها مش راضية تفتح, انا قاعد عليهم بقالي ساعة, النت
تقيل جدا النهاردة.
ندى: ربنا يستر , انا خايفة اوي يا شادي.
شادي: هي هالة لسه بتدور.
ندى: هي يادوب عرفت تفتح الموقع وحطت رقم الجلوس, وبيحمل من ساعتها وخايفة
لاتقفله منعرفش نفتح الموقع تاني.
شادي: لا ان شاء الله خير, دانتي نودي برضة , طبعا جامدة.
ندى: والله يا شادي مرعوبة, انا اعصابي باظت, خايفة اوي من درجة الرياضة.
شادي: لا متخافيش , ان شاء الله درجاتك جامدة كمان.
ندى: ليه هو انا زيك, الاول على الدفعة مستريح.
شادي: الله اكبر, انتي بتقري يا بنتي ولا ايه؟.
ندى: يعني بذكائك كده, انا ممكن اقر عليك؟, انا غيرك يا شادي, انا يهمني
مصلحتك اكتر من مصلحتي انا حتى.
شادي: اهو كلام.
ندى: يعني ايه كلام؟, لا طبعا مش كلام.
شادي: لا كلام, محدش بيحب حد اكتر من مصلحته.
ندى: افهم من كده انك مبتحبنيش اكتر من مصلحتك؟؟؟.
صاح شادي فجأة.
شادي: اهه,.....اهه,....الموقع فتح اهه, رقم الجلوس, قلتيلي كام.
نست ندى الحديث السابق وهي تمليه رقم جلوسها في سرعة,فصمت قليلا ثم قال في
لهفة.
شادي: فتح فتح هاتي ورقة وقلم.
*************************
جففت ندى دموعها وهي جالسة في حضن امها , بينما قال ابوها في غضب.
الاب: انا قلت من الاول, علوم ايه وزفت ايه الي هتدخله دي, لو كانت اخدت
كيميا, كان زمانها فلحت, وكملت ودخلت هندسة, حتى لو هندسة خاصة.
الام: ازاي يعني؟ , اذا كانت كل الي موقعها الرياضة والعربي وجايبة في
الاحياء 49 من 50.
الاب: برضه هي غيبة , كانت المفروض تمسك العصاية من النص, دلوقتي هتعمل ايه
هي بال 93 بتاعتها دي, دول ميودوهاش حتى تمريض, وياريتهم 93 دول 92 وستة
من عشرة.
عادوت ندى البكاء وهي ترتجف لسخرية والدها, بينما قالت نسمة في هدوء.
نسمة: ملحوقة يابابا, هي اصلا مبتحبش الرياضة ولا الفيزيا, تحول ادبي.
التفت الجميع اليها ,وكانها قالت شيئا نكرا.
نسمة : ايه فيه ايه مالكو؟, انا قلت حاجة غلط؟, بتبصولي كده ليه؟.
هالة: لا طبعا انتي هبلة, هتكمل علمي, ادبي ايه دا الي تحوله؟.
نسمة: وماله الادبي؟, وبعدين دي حاجة هي الي تقررها, متضغطوش عليها.
هالة: مالكيش دعوة انتي, خليكي في نفسك, قال تحول ادبي قال.
نسمة: وتعمل ايه لما الفيزيا تجيبها ورا؟.
هنا صاح الاب.
الاب: بس انتي وهي, لما نشوف هنعمل ايه في المشكلة دي, ابقى اسألها في فنون
تطبيقية ولا جميلة , ممكن تدخل من علمي علوم ولا لأ.
نسمة: هو كل الي مدايقك انها مش هتطلع مهندسة, مايمكن هي عايزة حاجة تانية.
هالة: هي مش عايزة حاجة تانية, هي عايزة الي احنا عايزينه.
قالت نسمة بسخرية.
نسمة: صحيح , يعني هي كانت اول مرة حد يفكرلها, ما هي على طول حد بيفكرلها,
حتى نسيت ان عندها مذاكرة من قلة التفكير.
لكزتها هالة في ذراعها وهي تقول.
نسمة: لسانك دا ايه , عايز القطع.
فقالت الام تنهرهما.
هالة: بس يابنات, سيبو اختكو , مش كفاية هي زعلانة, خلاص بابا هيعمل الي
قال عليه وان شاء الله ربنا يقدم الي فيه الخير.
**************************

**
شادي: يسأل ,فنون جميلة ديكور ولا تطبيقية ديكور , تقريبا عادي يكون علمي
علوم.
ردت ندى بتكاسل.
ندى: والله انا لسه مش عارفة يعني امبارح البت نسمة قعدت تلعب في دماغي,
بتقولي احول ادبي, انا طول عمري شاطرة في التاريخ والحاجات دي.
قال شادي مفزوعا.
شادي: ايه , اوعي, ادبي ايه انتي اتجننتي, وفي الاخر تدخلى ايه, دانتي
تكملي علمي ان شالله حتى تدخلي علوم.
ندى: ان شالله حتى تدخلي علوم, على اساس ان علوم دي كده سهل ان اي حد
يدخلها ولا من غير مجموع, طب ياريت.
شادي: يعني ايه يا ريت, لا ياندى بقلك ايه, انتي السنة دي تذاكري باديكي
وسنانك, لازم تجيبي مجموع كبير, تعوضي مصيبة السنة دي.
ندى: الله يا شادي؟,ايه مصيبة دي, انا مش ساقطة, انا جايبة مجموع كويس ناس
كتير معرفتش تجيبه, وجايبة في البيولوجي 49 , متحسسنيش بقى انك دكتور واني
صنايع.
شادي: لا ياندى, انتي السنة دي قضيتيها لعب, واهملتي فعلا في مذاكرتك كتير.
ندى: تصدق بالله, انت ماتستاهل فعلا اني كنت اضيع وقتي عليك, يعني انا مين
الي كان شاغلني عن مذاكرتي وايام الامتحانات كان مقرفني في عيشتي
ومبيكلمنيش, وفي الاخر تطلع انت امتياز ,وانا 93 ميدخلونيش بيطري حتى,
عموما انا فهمت فعلا اني لازم اعمل زيك, اشوف مصلحتي قبلك, وقبل اي حد.
شادي: طب كويس اديني علمتك حاجة.
ندى: انت بارد كدة ليه؟, ...انا حاسة انك متغير من ساعة النتيجة ما طلعت.
شادي: ندى , متفوقيش عليا انتي كمان, انا لسه خلصان من اشتغالات ماما, ومش
طايق نفسي.
ندى: طيب, هتخرجتي بكرة ولا لأ؟.
شادي: مش فاضي, عندي بكرة امتحان سواقة, وهبقى متيس بقيت اليوم, انا عارف
نفسي.
ندى: طيب بعد الامتحان, ولو حتى شوية صغيرين , انت واحشني اوي , وانا
مشفتكش من ساعة مارحنا نركب خيل.
شادي: هبقى اشوف ياندى ان شاء الله, يلا بقى , انا هقفل عشان انام, عايز
ابقى فايق بكرة.
ندى: ماشي يا حبيبي, بس عشان خاطري تحاول نخرج بكرة.
شادي: ربنا يسهل, خدي بالك من نفسك.
ندى: وانت كمان يا حبيبي.
شادي: سلام.
ندى: مع السلامة.
مرت نسمة من خلفها ,وهي تدندن ساخرة.
نسمة: بكرة تندم تندم, ياحبيبي.
ندى: اطلعي منها يارخمة.
نسمة: طب اعرفي انتي تطلعي منها الاول.
في هذه الحظة دخلت هالة كالاعصار من باب البيت, وتخطتهما بالصالون وعبرت في
ثوان الى غرفتها, فنظرتا الى بعضهما في دهشة.
نسمة: عمرو عمل مصيبة تاني.
اندفعتا في سرعة خلف هالة ,ودخلتا تنظران اليها وهي تبدل ملابسها بعصبية.
نسمة: لا, كدة مش كفاية, قطعي الهدوم احسن.
لم تجبها هالة, انما اندفعت لدورة المياة في عنف,ثم عادت واطلت برأسها.
هالة: ارجع ملاقيش ولا واحدة فيكو هنا.
وبالفعل امتثلتا لانها قالت الكلمة دون مزاح, وظلتا تتسائلان عن سبب غضبها ,
حتى انتهى المقام بها في فراشها, فقالت نسمة لندى قبل ان تدخل غرفتها.
نسمة: ابقي اعرفيلي ايه الموضوع واحكيلي بكرة.
ندى: مش دا لو قالتلي اصلا.
ودخلت ببطء الغرفة, ولم تضيء المصباح, بل تسمعت قليلا الى ان تاكدت ان هالة
تبكي,فاقتربت وجلست على طرف سريرها, وقالت بهدوء وهي تضع يدها على رأسها.
ندى: لو مش عايزة تحكيلي مش هسألك.
قامت هالة واعتدلت وهي تبكي.
ندى: فيه ايه الي حصل؟, عمرو برضه؟.
اومأت هالة برأسها ايجابا.
ندى: حد شافه مع بنت برضه؟.
اومأت هالة برأسها نفيا.
ندى: امال ايه الي حصل؟.
هدأت هالة قليلا وهي تقول.
هالة: انا كنت معاه في العربية, وبكلمه في موضوع البنت الي انتي شفتيها
معاه, وبعدين جت سيرة اسمه ايه الصاوي دا ,الي في خدمة اجتماعية بقاله ميت
سنة هناك, معرفش ايه الي جاب السيرة المهم وقع بلسانه انه كان خارج معاه,
قمت بهدلته.
ندى: مش الصاوي دا الواد البايئة البايظ خالص دا.
هالة: ايوة يا ستي, وانا متأكدة انه لما بيخرج معاه بيشربه زفت حشيش , وانا
قلتله ميت مرة مايصاحبوش, دا واد بيئة ومش من قيمته خالص, وبعدين مبوظه
على الاخر.
ندى: ياخبر حشيش, وبعدين.
هالة: قام قعد يزعقلي ويقولي انا حر, وانتي مش هتنقيلي اصحابي ,وانا امشي
مع الي عايزة, وقعد يقل ادبه كتير كده, قلتله انت مش عايز واحدة تخاف عليك
انت عايز واحدة تسيبك تموت نفسك, وبعدين انت مش قلتلي انك بطلت تشرب
الحاجات دي,قعد يقولي, هو انا بشرب الا كل فترة , ووالله كنت مبطل, راح
موبايله رن, ومرضيش يرد, قلتله رد مرضيش, قلتله طب هات ارد انا برضة مرضيش,
قلتله دي بنت ولا ايه؟, قعد يزعق ويتوة في الكلام, جيت اخد الموبايل شده
مني, قمت اتخانقت معاه جامد وشتمته وسبتله العربية ,واخدت تاكسي وجيت.
ندى: وبعدين؟.
هالة: مفيش بعدين, فضل ماشي بالعربية ورا التاكسي لغاية ما وصلت البيت وكنت
قافلة الموبايل , اكيد كان بيتصل.
ندى: يعني هو دلوقتي تحت؟.
هالة: لا مشي من شوية, منا بصيت ملقتوش.
ندى: طيب انتي بتعيطي ليه؟.
هالة: انا مبقتش عارفة اعمله ايه يا ندى, هيجنني , مش ملاحقة عليه من هنا
ولا من هنا, الاقيها من البنات ولا البلاوي الي بيشربها, ولا من كدبه عليا
ولا من ايه؟, انا تعبت معاه خلاص, عمرو دا خلاني ماشية عنيا في وسط راسي من
كتر مصايبه.
ندى: انتي مش بتحبيه, معلش سامحيه.
هالة: لحد امتى؟؟, لحد امتى ,دا مبيتغيرش ابدا, انا تعبت معاه وامه تعبت
معاه, وخالد صاحبه تعب معاه, مفيش مبيحسش.
ندى: خلاص يا لولو, مسيره يعقل.
هالة: انا مبقتش عارفة اعمل معاه ايه, وكل مرة يرجعلي يقولي اخر مرة,
ومامته تقولي هو مبيحبش الا انتي, منا عارفة انه مبيحبش الا انا, بس انا
تعبت.
ندى: بصي يا لولو, انتو ابعدو عن بعض فترة, اهدو فيها, وبعد كده فكرو ازاي
هتحلو مشاكلكو دي, دا هو خلاص بقى على وش تخرج وان شاء الله انتو على وش
خطوبة, ربنا يهديكو.
هالة: انا زعلانة منه اوي يا ندى , اوي.
ندى: متزعليش نفسك, بكرة ان شاء الله تتصالحو,... لااااا دا الحمد لله على
شادي, شوفي كنت بقول عليه بارد ومتحكم وبتاع, بس دا ملاك بالنسبة لعمرو,
على الاقل انا واثقة من انه مبيبصش لحد تاني , لانه بصلي انا بالعافية
اصلا.
مسحت هالة عينيها وهي تقول.
هالة: شادي دا حمى اصلا, دا لو قرب على سيجارة امه تاكله, انتي بتهذري,
عامل عليكي انتي بس راجل.
ندى: ربنا يهديه يا ستي, دا مؤدب ومحترم , وبيخاف عليا, وخلاني اتحجب
ودايما بيزعقلي لما بقطع في الصلاة, لا شادي, يتشهدله بجد.
هالة: بكرة تيجي الي تفتح عنيه وتاخده منك, وساعتها مش هتعرفي تتلمي عليه.
صاحت بها ندى.
ندى: اخص عليكي يا كلبة, اهو انتي.
***********************
سلمى: الو, ايه عملت ايه في الامتحان؟.
شادي: موقعتش ولا قرطاس.
سلمى: ايه الشطارة دي؟, يعني نقول مبروك على الرخصة؟.
شادي: اكيد ان شاء الله.
سلمى: دنا كلمتك من شوية لقيتك مشغول, ايه كنت بتكلم ندى؟.
شادي: لا دنا كنت بكلم ماما بطمنها, ندى مين يا بنتي, ندى تلاقيها نايمة
دلوقتي, وقال ايه كانت عايزة تخرج دلوقتي, شوفي انا الي فضيت وهي لا.
سلمى: خلاص ولا تزعل نفسك, افوت عليك انا وريكا نتغدا برة النهاردة.
شادي: ماشي, اكلم الواد سامح اشوف نظامه ايه.
سلمى: قشطة, هصحي ريهام واكلمك بقى.
شادي: اوكاي يا قمر , هكلمك تاني.
سلمى: سلام.
شادي: باي.

[b][size=16][b][b][b] [b][b][b]الحلقه التاسعه عشر[/b][/b][/b][/b][/b][/b][/b]

ندى: انت فين؟.
قام شادي من
المنضدة يبتعد بالهاتف عن سلمى وريهام وسامح, اللذان انخرطا في حديث جانبي,
بينما تتبعت سلمى شادي ببصرها بعصبية, وهو يهمس.
شادي: انتي
متنرفزة ليه طيب؟.
ندى: عشان لا
كلمتني ولا اهتميت اصلا, وانا افتكرتك روحت تنام , الاقيك في الاخر خارج مع
اصحابك يا شادي.
شادي: مانتي
كنتي نايمة اعمل ايه يعني؟.
ندى: انا مش
قايلالك انا عايزة اخرج معاك؟, تخرج مع اصحابك ليه؟.
شادي: خلاص يا
ستي, قومي البسي وتعاليلنا.
ندى: انت
مبتفهمش يا شادي؟, انا كنت عايزة اكون معاك لوحدي, عايز تخرجني مع اصحابك؟.
شادي: خلاص يا
حبيبتي, بكرة ان شاء الله اخرج معاكي لوحدنا خالص انا وانتي, ومن الصبح
كمان.
ندى: انت كداب,
بكرة هتتحججلي بميت حجة.
شادي: لا
ياحبيبة قلبي ان شاء الله هنخرج سوا, بس متزعليش بقى, انا مقدرش ازعلك مني.
ندى: ماهو انت
تزعلني وبعد كده تضحك عليا,تقولي انا مبقدرش ازعلك, فاكرني هبلة.
اخذ شادي يصالح
ندى فترة حتى هدأت ,واتفقا على الخروج سويا في اليوم التالي,وانهى
المحادثة وعاد لاصدقائه,فتسائلت سلمى بلهفة, وهو يجلس.
سلمي: ايه؟,
هتيجي؟.
شادي: لا مش
جاية, زعلت عشان انا مخرجتش معاها, وخرجت معاكو.
لاح في عينيها
شيء من السعادة,ثم قالت متصنعة الضيق.
سلمى: لا طبعا
مش من حقها تزعل.
شادي: منا
قلتلها كده, قالتلي انت طنشتني وكلام فاضي كده.
سلمى: ايه شغل
العيال دا؟.
رمقتها ريهام
بنظرة جانبية, ثم قالت لشادي.
ريهام: معلش يا
شادي , هي بس اكيد كانت متعشمة تخرج معاك النهاردة.
ثم نظرت الى
سلمى وهي تقول بلهجة ذات مغزى.
ريهام: وكده
يبقى عندها حق.
في نفس الوقت
وضعت ندى هاتفها على المكتب بغرفتها ,وهي تهز ساقها في توتر.
هايدي: ايه يا
بنتي انتي؟, روشتينا , هزيتي الاوضة ارحمينا.
ندى: خارج مع
اصحابه بيتغدا بره, قال ايه اتفق مع سلمى وريهام ومينفعش بعد ما نزلهم
يسيبهم , الاستاذ بيقولي تعالي انتي.
هالة: البنات
دي خنيقة اصلا, انا مش عارفة انتي بتطيقي تشوفي وشهم ازاي.
قالت هايدي في
تساؤل, وهي تقشر موزة.
هايدي: سامح
معاهم؟.
ندى: ايوة يا
ستي.
هايدي: الواطي,
وقال ايه بيقولي رايح اصلح العربية.
ندى: على فكرة
يا ديدي ,فيه موضوع كدة كنت خايفة اقلك عليه, بس انا مش عارفة انتي لاحظتي
ولا لأ.
ردت هايدي
بسرعة, وهي تأكل الموزة.
هايدي: عارفة,
مش موضوع ريهام وسامح؟, عارفاه.
نظرت اليها ندى
بدهشة.
ندى: يعني ايه
عارفاه؟, دول مرتبطين يا بنتي, انتي ازاي ساكتة على كده.
ردت هايدي
ببساطة, وهي تأكل.
هايدي: عادي يا
بنتي, فكك, انا وسامح اصلا مش مرتبطين اوي يعني.
في نفس اللحظة
دخلت نسمة ,يتبعها صوت والدها هاتفا في غضب.
الاب: اصل انا
كنت ناقصك انتي كمان.
أغلقت الباب
خلفها في احكام, واستندت عليه.
هالة: ماله
بيزعق ليه؟.
توجهت نسمة
لفراش ندى, وجلست على طرفة وهي تقول.
نسمة: اصل انا
قلتله.
هالة:
ههههههههه, والله تستاهلي.
تعجبت هايدي.
هايدي: قالتله
على ايه؟.
هالة: اصل
الهانم عايزة تدخل ادبي, بابا طبعا مش هيرضى.
قالت هايدي
لنسمة في هتاف.
هايدي: قشطة يا
بنتي , ريحي دماغك بلا مذاكرة بلا قرف, اديني ذاكرت وطلع عيني كيميا
وفيزيا شفتي الي حصلي, في الاخر تجارة انجلش.
نسمة: ومين قال
ان الادبي مش مذاكرة, بس مش لازم العيلة كلها تدخل هندسة يعني, انا اصلا
كرهت الهندسة دي من كتر مانتو هتموتو عليها,على فكرة انتو دماغكو تعبانة
خالص.
هالة: والله
ماحد دماغه تعبانه الا انتي, طب جربي حظك طيب في العلمي الاول. وابقى
اتنيلي حولي بعدين.
نسمة: هي حلة
محشي؟, جربي حظك الاول, طب انتي ودلوعة بابا وكنتي طول عمرك عايزة هندسة,
والتحفة التانية انتو الي بتمشوها , انا بقى سيبوني اختار انا عايزة ايه
وبحب ايه.
هالة: انتي
اصلا مبتسمعيش كلام حد, ماشية بدماغك.
نسمة: مش احسن
ما امشي بدماغك انتي, وانتي تمشي حافية.
قامت هالة في
سرعة وخطفت الوسادة والقتها على نسمة وهي تصيح.
هالة: انا
دماغي جزمة يا جزمة.
فارتطمت
الوسادة بوجه ندى التي كانت شاردة, فصاحت بضيق.
ندى: ايه ؟,
ايه الغباء دا؟.
نسمة: انتي هنا
يا كتكوتة, مكانش طالعلك صوت يعني , مالك؟.
هايدي: سبيها
سبيها, هتموت من ساعة ماعرفت ان شادي خارج مع اصحابه وقلبها.
قالت ندى بحزن
وهي شاردة.
ندى: كده يا
شادي, اخص عليك.
**********************
سارع شادي
بخطاه وهو يسير مع سلمى , يسبقان ريهام وسامح في طريق عودتهم لركوب سيارة
سامح, فتوقفت امامهما فتاة صغيرة رثة الثياب, تبيع الورد.
الفتاة: ورد يا
بيه؟, ورد للامورة.
قال شادي
بعفوية.
شادي: مهيش
امورة.
وحاول تخطيها
في سرعة وهو يبتسم لسلمى قاصدا المزاح, فتبعتهما الفتاة.
الفتاة: لا يا
بيه, دي امورة وزي العسل كمان, خدلها وردة عشان متزعلش.
شادي: مش
هتزعل.
فالتفتت الفتاة
تقول لسلمى في الحاح.
الفتاة: خلى
حبيبك يا ابلة يشتريلك وردة, هو مبيحبكيش ولا ايه؟.
احمر وجه سلمى
في سرعة من جراء الكلام, فقال شادي.
شادي: احنا
اخوات يا ستي, ريحي نفسك.
الفتاة: لا
ازاي؟, مش اخوات, انت اسمر , وهي بيضة زي القشطة.
شادي: خلاص بقى
خلصنا.
الفتاة: يابيه,
والنبي يا بيه تاخد وردة يا بيه , والنبي لحسن الامورة تزعل.
شادي: ماقلتلك
ماحناش حبايب, بصي ارجعي ورا شوية هتلاقي اتنين حبيبة بجد, غلسي عليهم,
هيشترو منك.
الفتاة: انت مش
عايز تنفعني ليه يا بيه؟.
شادي: متتعبيش
نفسك مش هتكسف منها اقوم اشتري منك , دا هي حتى لسه مسلفاني عشرة جنية.
الفتاة: طب
اشتريلها وردة منهم.
قال وقد بدأ
يشعر بالضيق منها.
شادي: ماخلاص
بقى قلنا مسلفاني, روحي بجد ورا هتلاقي اتنين اصحابنا اشتغليهم.
شعرت سلمى بشيء
من الخجل لانكاره الشديد والمتكرر ,لفكرة ان يكونا معا لسبب اخر غير
الصداقة, وشعرت بضرورة انهاء هذا الوضع المحرج لالحاح الفتاة الشديد, فقالت
لها في رفق.
سلمى: استني يا
شاطرة, انا هاخد منك وردة.
قالت الفتاة
لشادي في انتصار, وهي تضحك.
الفتاة: انا مش
قلتلك هي جميلة وزي العسل.
واعطت الوردة
لسلمى وهي تأخذ النقود,وقالت ناظرة الى شادي بغضب طفولي بريء.
الفتاة: هو
وحش, مش واخد باله منك يا ابلة, اوعي تسلفيه تاني.
وانصرفت عنهما
ركضا, بينما ازداد احمرار وجه سلمى .
شادي: اشتريتي
منها ليه؟, دول عيال نصابة.
سلمى: حرام يا
شادي شكلها غلبان, وبعدين مكانتش هتسيبنا الا لما نشتري منها.
شادي: برضة
مكانش لازم نساعدهم على الغلاسة دي.
قالت سلمى
بمزاح خجول.
سلمى: انت مش
عايزني اشتريلك وردة بقى؟.
شادي: ايه دا؟,
انتي شارياهالي؟.
ناولته سلمى
الوردة.
سلمى: عشان
تبقى تفتكرني.
شادي: انا
هنساكي ازاي ,وانتي ليل نهار وشك في وشي مش عارف اخلص منك اصلا.
سلمى: ياسلام.
وصلا في هذه
اللحظة الى السيارة فتوقفا امامها يتحدثان.
شادي: يا لومي
انتي اعز صاحبة عندي في الدنيا كلها, هو انا حد بيحللي مشاكلي الا انتي؟.
سلمى: ماشي يا
سيدي, اضحك عليا اوي.
اقبل عليهما
ريهام وسامح يحمل كلا منهما وردة.
ريهام: ايه
دا؟, انتو معاكو ورد انتو كمان.
شادي: شفتي يا
ستي, البت الغلسة ما سابتناش الا لما اشترينا منها.
وترك الوردة
على سقف السيارة وهو يركب, فالتقطتها سلمى وهي تركب, وقالت له بلوم.
سلمى: وردتك يا
استاذ, اوام نسيتني, وقال ايه انتي وشك في وشي طول النهار.
شادي:
اه,معلش,هاتي يابت الوردة, انتي الي نستيهالي عشان تغلطيني, دانا هحطها في
كتاب.
نظرت ريهام الى
سلمى بتحذير وهي تقول بسخرية ذات مغزى.
ريهام: دا ايه
الحب دا كله؟.
فرد شادي
ممازحا.
شادي: اه
واخدين بعض عن حب.
فهمست ريهام في
اذن سلمى بغضب.
ريهام: اتلمي
بقى يا مفضوحة.

[/size]

الحلقه العشرين

لؤي: مش كنتي
تقوليلي انتي هتلبسي فستان لون ايه عشان اظبط التاي معاه.
نظرت نسمة للشاب الطويل المنحني عليها في حفل زفاف قريبتها , وهي تقول
بدهشة.
نسمة: ليه؟, على اساس اننا متجوزين مثلا!.
اندهش لؤي من جرأتها في الرد ,فقال.
لؤي: وليه لأ؟, مش يمكن ؟.
نسمة: يا بني اعقل بقى يا بني, انت عايز مني ايه؟.
لؤي: انتي مش عارفة انا عايز ايه؟.
نسمة: لا عارفة,الي انت بتقوله كل مرة تشوفني فيها, يا لؤي يا بابا مينفعش
الي في دماغك دا يحصل, انا مينفعش اصاحبك, افهمها بقى.
لؤي: بس انا بحبك يا نسمة.
نسمة: بيتهيألك, انت ما بتحبنيش ولا حاجة, انت بس موهوم صدقني.
لؤي: انتي هتعرفي الي جوايا اكتر مني؟.
نسمة: لا, انا اعرف انا اقدر اعمل ايه, والي مقدرش اعمله اني ارتبط بيك بأي
شكل من الاشكال في وضعنا دا, داحنا حتى في وضع ميسمحش لينا اننا نفكر في
حاجة زي كده اصلا, شوف انت اد ايه وانا اد ايه, احنا عيال يابني.
لؤي: افهم من كده انك بتحبي حد تاني.
نسمة: ماهو انت كده تبقى مبتفهمش اصلا, يعني انا اقلك ايه وانت تقولي ايه,
يا بني افهم, انا مبصاحبش, حلوة كده؟, فهمتها كده؟.
لؤي: اااه, انا بقى مش عاجبك عشان سني؟, ولا مش عاجبك عشان ايه بالظبط؟.
قالت نسمة باستسلام.
نسمة: بص يا لؤي , انا مش هتناقش معاك, عشان انت مش ناوي تفهم باين.
وانصرفت عنه في غضب.
لؤي: رايحة فين يا نسمة,......نسمة.
قالت هالة لنسمة التي اقبلت عليها تجلس بجانبها في حنق.
هالة: ايه؟, مالك؟.
نسمة: لؤي يا ستي, كان زانقني برة بيقولي بحبك كالعادة.
هالة: ههههههه,طب والله واد عسل,هيموت نفسه عليكي, انا مش عارفة مش عايزاه
ليه؟.
نسمة: هقولك ايه ,مانتي زيه.
هالة: والله انتي بس الي مكبرة الدنيا اوي, مع ان عادي.
نسمة: يخرب بيت كلمة عادي دي, الي بتخلي الناس تعمل حاجات غريبة وتقول
عليها عادي.
**********************
سارت ندى بجانب شادي ويدها في يده, يتحدثان.
شادي: بس انتي شدي حيلك في الفيزيا اول باول, وانا مش هسيبك, الي
متفهميهوش, هساعدك فيه.
ندى: لا هي لذيذة لغاية دلوقتي.
شادي: برضة , ذاكريها من الاول عشان متتقلش عليكي.
ندى: لا بس المستر مش سايبنا ,من اولها نازل امتحانات كده على طول.
شادي: كويس, عشان تتعودي.
وبينما هما يسيران,استوقفه صوت فتاة صغيرة.
الفتاة: ورد يا بيه؟.
التفت ينظر اليها وهتف.
شادي: يخرب بيـــــتك, انتي مكتوبالي يا بت انتي.
هللت الفتاة في دهشة.
الفتاة: ايه داااا؟......مش انت يا بيه الي...؟؟؟,.... انت الي كنت مستلف
من البت؟,...بتاع الاسبوع الي فات؟.
شادي: ايوة الله يخرب دماغك, انتي طلعتيلي منين؟.
الفتاة: انت الي ماشي في مطرحي يابيه, دي منطقتي انا.
ضحكت ندى للحوار في دهشة.
ندى: ايه دا؟, انت عارفها يا شادي؟.
الفتاة: بس مش هي دي يا بيه المزة الي كانت معاك المرة الي فاتت.
نظرت ندى الى شادي في استنكار وشك,فقال لها بسرعة بلهجة عادية.
شادي: قصدها على سلمى.
الفتاة: الحقي يا ابلة كان بيقول عليها اخته,الا هي اخته بجد يا ابلة؟.
نظرت اليها ندى بحذر, وهي تنقل بصرها بينه وبينها,فقال شادي.
شادي: خدي يا بت وهاتي وردة واطلعي من دماغنا, لحسن مش هنخلص منك.
الفتاة: شفتي يا ابلة , اهو انا صدقت انه بيحبك, هيجيبلك وردة, المرة الي
فاتت مرضيش ابدا, مع ان البت كانت احلى منك لامؤاخذة يعني.
شادي: اقطعي لسانك دا بقى واخرسي, ولا ما خدش منك ورد.
الفتاة: لا يا بيه خد, وابقى تملي تعالى, هتلاقيني ملقحة هنا على طول.
اخذ شادي الوردة وجذب ندى من امام الفتاة جذبا, وظلت صامتة قليلا, فمد يده
بالوردة.
شادي: احلى وردة لاحلى بنوتة في الدنيا,....مالك؟.
ندى: ممم, انت بقى بتعد تتمشى مع سلمى.
شادي: وايه المشكلة؟.
ندى: قولي انت ايه المشكلة.
شادي: مفيش مشكلة طبعا, انتي مجنونة يا بنتي هتتضايقي من سلمى, دي زي اختي,
لا اختي ايه؟, دي زي اخويا كمان.
ندى: وانت بقى بتتمشي ليه مع اختك, زي ما بتتمشى معايا؟.
شادي: ياعبيطة دا يوم ما خرجت معاهم, يوم امتحان السواقة, وكنا سايبين سامح
وريهام لوحدهم شوية ورانا, بس, انتي هبلة يا ندى؟, هتغيري عليا من اصحابي.
ندى: واغير عليك من اخواتي كمان, انت متعرفش انا بحبك اد ايه ولا ايه؟.
شادي: يا بنتي الي في دماغك دا اسمه هبل, انا بحبك اكتر ما انتي بتحبيني
اصلا.
ندى: بس انت مبتغيرش عليا.
شادي: دا عشان واثق فيكي.
ندى: لا دا عشان انا مبعملش حاجات تخليك تشك فيا, وانت ماشاء الله مش
مخليني ليا اصحاب ولا حتى اصحاب بنات, عشان كده مطمن, لكن انا اصحابك
مشاركني فيك, كأنهم متجوزينك عليا,لا ومش اصحابك وبس,ومذاكرتك كمان,وشوية
مامتك وشوية مزاجك الي كل شوية بحال.
اكفهر وجه شادي في ضيق وقال بضيق.
شادي: اتخانقي, اتخانقي ياندى اتخانقي, اصل احنا بقالنا مدة كويسين
متخانقناش وانتي عايزة تتخانقي.
ندى: انت بتتريأ عليا كمان؟, ربنا يسامحك.
شادي: يلا يا ندى نروح, احنا كنا مروحين اصلا, يلا يا بنتي لحسن احنا
مبقيناش نعرف نتكلم خلاص من غير نكد.
قالت ندى بعصبية.
ندى: احسن برضة, انت مبقتش تطيقلي كلمة اصلا.
*******************
ردت والدة ندى على الهاتف في هدوء.
الام: الو,..... اه اهلا ازيك يا شادي يا حبيبي, عامل ايه؟ ,....واخبار
مامتك ايه؟,....الحمد لله,....ندى, موجودة,.... انتو زعلانين ولا ايه يا
حبيبي؟,......ممم,....يا شادي يابابا بالراحة عليها شوية, انت عارف ان ندى
بنتي حساسة شوية, ....منا عارفة انك معملتش حاجة, ....حاضر, ...حاضر...طب
استنى هاندهالك.
وقامت لتنادي ندى من غرفتها.
الام: قومي كلمي شادي.
تململت ندى بضيق.
ندى: مش عايزة.
الام: قومي يا بنت بلاش هبل, قافلة موبايلك ليه؟, هو قالي على كل الي حصل
,والموضوع مش مستاهل غبائك دا كله.
ندى: يا ماما انتي مش فاهمة حاجة , اصحابه دول انا مبقتش اطيقهم خلاص.
الام: بس بطلي نرفزة وقومي , الولد على التليفون, عيب.
قامت ندى مضطرة وهي تأفف.
ندى: يووووووووووووه.
قالت الام وندى تمر من امامها.
الام: واتصالحو بقى, بطلي هبل.
قالت نسمة باستنكار ساخر.
نسمة: يــــــا حلاوة.
فالتفتت اليها الام بعصبية.
الام: فيه ايه يا بنت؟.
نسمة: هو بقى فيه حاجة؟, ماخلاص, معادش فيه حاجة, ماكنتي تعزميه يتغدا
عندنا احسن.
الام: خليكي في نفسك يا ست نسمة, بكرة نشوفك.
نسمة: يارب مايجي بكرة دا, ولا تشوفوني في موقف زي دا ابدا.
والتفتت الام لهالة العاقدة حاجبيها في غضب.
الام: وانتي مالك انتي كمان.
هالة: مفيش.
الام: مال اختك يا نسمة؟.
قهقهت نسمة قبل ان تقول في تهكم.
نسمة: هههههه, اصل عمرو مش عايز يخطب السنة الجاية, بيقلها نستنى شوية لما
يستلم الشقة,.... هههه بيخلع من قبل ما ييجي اصلا.,عايز يتعرف عليها الاول
اصله لسه معرفهاش.
صاحت بها نسمة.
هالة: احترمي نفسك يا حمارة انتي, وقومي ذاكري يا ادبي.
نسمة: انا هقوم خالص, بدل ما اتشل م الي بيحصل حواليا دا كله.
وبعد ذهابها قالت الام لهالة.
الام: متخافيش يا حبيبتي , انا ومامته اتفقنا خلاص, اول ما يخلص هيجي, دا
مش بمزاجه, دا غصب عنه, وبعدين شقة ايه وبتاع ايه, ما تستنو الشقة تيجي
براحتها وانتو مخطوبين.
هالة: انا مبقتش عارفاله يا ماما, دا بقى مجنون.
الام: معلش يا حبيبتي, بكرة يعقل,كلهم بيبقو كده, الشباب كلهم طايشين , ولو
على حكاية الخطوبة, مش عايزاكي تقلقي, احنا متفقين على كل حاجة, متخافيش
خالص.
هالة: يارب يا ماما ’يارب يعقل بقى عشان انا زهقت.
***************
سلمى: انا خلاص هتجنن يا ريهام, ندى ندى ندى, على طول بيحكي على ندى,
مبيخلصش, انا زهقت.
ريهام: مانا قلتلك ابعدي عنه احسن,انتي الي مصممة تعملي فيها مديحة يسري
,وعايشة فيها الدور.
سلمى: يا بنتي والله العظيم حاولت مش قادرة, اعمل ايه؟, انا بقيت زي ما
بيقول مبقدرش اعدي يوم من غير ما اشوفه, جوه الكلية بشوفه, برة الكلية
بشوفه, في البيت على طول بنتكلم في التليفون, وكل دا هو بيتعامل عادي, ومش
حاسس بيا اصلا.
ريهام: بصي بقى, انا نصحتك والي انتي عايزاه اعمليه, هتخسري ايه يعني,
عرفيه انك بتحبيه.
سلمى: لا طبعا, لانه هيقولي احنا اخوات وساعتها هخسره هو.
ريهام: وهو انتي كده كسباه يعني؟.
سلمى: لا , بس على الاقل انا لسه معاه.
ريهام: ربنا يشفيكي.
******************
سامح: بص اديني قلتلك وانت حر يا معلم.
سادي: ايه يا ابني , لأ طبعا, انت بس الي مجنون, لا طبعا,...سلمى؟؟,...طب
ازاي؟.
سامح: والله يا بني شكلها واقعة فيك بجد.
شادي: يا موحا دا بس عشان احنا قريبين اوي من بعض ,فالناس بتحس كده.
قال سامح بلهجة غير مقتنعة.
سامح: يمكن.....
وصمتا قليلا, فقال شادي في توتر.
شادي: انت هتشكك امي ليه؟, يخرب بيت دماغك يا سامح.
سامح: انا مش متأكد بس انا حسيت كده, قلت اقلك, وانت اتصرف, شوف انت
بطريقتك.
شادي: لا لالا لالا, ولا عايز اشوف اصلا, حتى لو هي كده فعلا, مش عايز
اعرف.
سامح: يا سلام.
شادي: اه يا ابني انت اهبل, لو طلع فعلا فيه حاجة, هيبقى موضوع محرج جدا,
وانا بعز البنت دي فعلا ومش عايز اخسرها, لا انسى , مفيش حاجة اصلا, صح,
مفيش حاجة , انت بس بيتهيألك.
سامح: ممكن.
وصمتا ثانية, قبل ان يعود شادي للحديث وكأنه يكلم نفسه.
شادي: سلمى؟؟؟,..لا لا لا لا لا , مينفعش اصلا.
سامح: الله , ماتسكت بقى, خلاص يا سيدي انا غلطان, مفيش حاجة , انا الي
اعمى,نقطنا بسكاتك بقى.
قال شادي في اكبار.
شادي: طبعا هسكت وهنسى كمان الي انت قلته, قال سلمى معجبة بيك
قال,....سلمى؟.

شكرًا يا بنت النيل على الحلقة السابعة وباقى الحلقات
ننتظر الباقى

شكرأأأأأأأأأأأأأأأأأأأأأأأأأأأأأأأأأأأأأأأأأأأأ

أنا أتابع القصة باستمرار
أين باقى الحلقات؟

أنا آسفة يا Dizzy Girl على تأخير الحلقات
لكن أنا كنت مشغولة جدًا

الحلقه الواحد والعشرين

ندى: ماهي سلمى
كلمتني امبارح تسأل على امتحان العربي.
شادي: بجد؟,
البنت دي جدعة اوي والله, ابقى اسألي عليها برضة يا ندى, عشان كانت عيانة.
ندى: منا عارفة ,
ماهي كلمتني بقلك, بس هي خفت دلوقتي.
شادي: لا عيب
برضه , ابقى اسألي عليها.
ندى: حاضر.
شادي: اهي البنت
دي غريبة جدا, طيبة اوي, وجدعة ولا الرجالة, وسبحان الله, عمري ما شفتها
مع ولد, شخصية محترمة جدا, مع انها جميلة ودمها خفيف.
ندى: ولما هي
جميلة ولذيذة وظريفة اوي كده, مارتبطتش ليه لغاية دلوقتي؟.
شادي: منا بقلك
محترمة.
ندى: ممم, يعني
انا مش محترمة؟.
شادي: انتي
هترجعي تاني تحطي سلمى في دماغك, احنا مش كنا خلصنا, انا مش عارف انتي
شاغلة دماغك بيها ليه؟.
ندى: وانا اشغل
دماغي بيها ليه؟.
شادي: منا مش
عارف, يمكن عشان ريهام مصاحبة سامح وهي الي فاضية, وانتي بقى مستلماها
اشتغالتك.
ندى: بصراحة
,انت علاقتك بالبنت دي اوفر يا شادي , مش معقول, دي بقت صاحبتك اكتر من
سامح, دي بتشوفك اكتر مني.
شادي: طبيعي
يابنتي احنا في كلية سوا,بصي يا ندى, مش انتي الي هتحددي علاقتي باصحابي
تبقى عاملة ازاي, انا بدأت اتخنق.
ندى: تتخنق
مني؟.
شادي: من اسلوبك
الشكاك دا على طول, وغيرتك الي ملهاش أي مبرر, يعني احنا بقالنا سنتين مع
بعض اهه, انا عمري ما شفتك كده, بطلي غيرة وخليكي واثقة في نفسك اكتر من
كده.
ندى: لا انا
واثقة من نفسي أوي كمان.
شادي: مش باين.
ندى: خلاص يا
شادي , انا مش عايزة وجع دماغ ايام الامتحانات, انا مش هكلمك في الموضوع دا
تاني, بس انت متحطش في دماغك اني بغير عليك ومخنقة عليك.
شادي: حاضر يا
نودي.
ندى: انا هقفل
دلوقتي عشان ادخل اذاكر, ادعيلي يا شيدو بكرة اوي.
شادي: متخافيش
يا حبي, الي تخافي منه ميجيش احسن منه.
ندى: ربنا يستر.
شادي: ان شاء
الله يستر.
*******************
سارعت هالة
بخطواتها شبه راكضة وهايدي تحاول اللحاق بها في سرعة.
هايدي: انتي يا
بنتي استني, اكيد مش هو.
دفعت هالة يد
هايدي التي مدتها محاولة ايقافها , وهي تسير بسرعة وتقول بغضب عارم.
هالة: لا هو, هو
انا هتوه عن عربيته يا هايدي؟.
هايدي: طيب انتي
بتجري ليه؟, يعني كده هتلحقيه؟.
هالة: ايوة
هلحقه.
وانطلقت راكضة
بالفعل متوجهة للمكان الذي ظنت اختفاء سيارة عمرو به, وهايدي تتبعها في
ضيق, حتى توقفت تنظر في غضب, فتوقفت خلفها هايدي.
هالة: عشان لما
اقلك انه هو, تصدقيني.
نظرت هايدي حيث
تنظر هالة, فرأت عمرو موقفا سيارته , مترجلا منها, بينما فتاة تترجل من
الجانب الاخر,فهاجت هالة.
هالة: دا انا
هقتله.
واندفعت في
ثورة,تهتف.
هالة:
عــــمــــرو.
انتفض عمرو ذعرا
حين رآها تقبل عليه كالاعصار, حتى توقفت امام السيارة تصيح.
هالة: مين دي يا
عمرو؟.
عمرو:
دييي....دييييي.
هالة: انت
هتهته؟, انطق قولي مين دي؟, قريبة مين المرة دي؟.
عمرو: اهدي بس
انتي مش فاهمة,...هتفهمي,...اهدي...

.ددديييي....دييي.
هالة: دانت مش
عارف حتى تألف كدبة.
خرجت الفتاة من
السيارة ببطء وهي تنظر اليهما في دهشة,ونظرت الى هالة بمزيج من الخوف
والازدرداء.
الفتاة: مين دي
يا عمرو؟.
هالة: انا الي
عايزة اعرف انتي مين, قوليلي انتي مادام هو مش عارف يتكلم.
الفتاة:
عمرو..., هي بتتكلم كده ليه؟.
هالة: كلميني
انا هنا , وانتي بقى جابك من تحت انهي داهية؟.
هتفت الفتاة
باستنكار.
الفتاة: احترمي
نفسك, ماتقول حاجة يا عمرو.
قال عمرو بذعر.
عمرو: اهدي يا
هالة.
هالة:
اهدا؟؟؟,دانا هسود يومكو النهاردة, انا قلتلك يا عمرو قبل كده ان مسيري
هقفشك بنفسي, بس ساعتها مش هتشوفني تاني.
عمرو: هالة
,استني افهمك.
هالة: انا مش
عايزة افهم, ما كل حاجة باينة خلاص, هفهم ايه بقى؟,هتبقة قريبة مين المرة
دي, اصلك بتخلص الكلية وبتشتغل شوفير خميس وجمعة لقرايب اصحابك.
عمرو: لا يا
هالة ديييي,....افهمك بس,رايحة فين,... متمشيش وانتي كده ,..استني.
هالة: ليه؟,
عشان اكمل معاكو السهرة, لا وعلى ايه؟, اتفضلو انتو كملو,مش هعطلكو, بس بجد
يا عمرو, انا مش عايزة اشوفك تاني ابدا, عشان انت فعلا طلعت واطي ومعندكش
دم زي كان الكل بيقولو عنك, وخاين وزبالة,وانا مش طايقة حتى ابص في وشك.
وجذبت هايدي وهي
توقف تاكسيا بعصبية, بينما تسمر عمرو في مكانه لا يدري ماذا عساه يفعل,
وهو ينظر اليها بعجز.
*********************
نسمة: هتفضلي
متنحة كده كتير وحاطة ايدك على خدك,خلاص ركزي,انتي عندك امتحان بكرة.
ردت هالة وهي
لاتزال شاردة.
هالة: انا مش
متنحة.
نظرت اليها بحزن
وقالت.
نسمة: ياشيخة؟,
دانتي مقلبتيش الصفحة بقالك نص ساعة,......ماخلاص بقى يا لولو, انتي
المفروض تحمدي ربنا مش تزعلي, يعني اهو ربنا بينهولك من قبل ما تتورطي معاه
في خطوبة وجواز, انتي كنتي عارفة من الاول انه مينفعش بس كنتي بتكابري,
فربنا حب يوريهولك بعنيكي, عشان متقدريش تطنشي زي ما كنتي بتعملي كل مرة.
ردت هالة بنغمة
غير مبالية شاردة, ولم ترفع عينيها عن الكتاب.
هالة: مممممم.
نسمة: انا عارفة
ان قلبك مكسور, بس والله ما يستاهل منك انك تضيعي مستقبلك علشانه.
هالة: حاضر يا
نسمة بقى, قومي انتي ذاكري ملكيش دعوة.
نسمة: ماليش
دعوة ازاي يعني؟, انا مش هعرف اذاكر وانتي عاملة كده.
هالة: لا
متخافيش عليا, قومي انتي بس شوفي نفسك, وانا هذاكر متخافيش.
قبلتها نسمة على
جبهتها وهي تدعو لها ثم انصرفت, فالتفتت ندى عن مكتبها تنظر لهالة التي
عادت لشرودها في اسف , فقالت وهي تتوجه اليها.
ندى: هالة, انتي
لسه معيطتيش؟.
هالة: واعيط
ليه؟.
ندى:
يعني,....انتي اكيد مخنوقة يعني.
زفرت هالة وهي
تقول بضيق.
هالة: انا نفسي
تريحو نفسكو وتريحوني بقى, انا زعلانة طبعا وبموت, ومش قادرة اذاكر طبعا,
فمتبقوش عاملين زي الي واحد متعور في وشه والناس رايحة جاية تقوله على فكرة
انت متعور على اساس انه مش عارف, طب منا عارفة اني زعلانة واني لازم اذاكر
واني لازم اركز عشان عندي امتحانات وانسى عمرو, بس انا مش قادرة لا اعمل
دا ولا دا, فسيبوني في حالي ربنا يخليكو عشان انا بجد تعبانة.
ندى: خلاص يا
هالة, هنسيبك في حالك.
**********************
سلمى: وهي
النتيجة بتاعتها هتطلع امتى؟.
شادي: والله لسه
مش عارف, بس لما بتطلع يعني بتبقى الدنيا مقلوبة على النت, هبقى ادور
معاها زي السنة الي فاتت.
سلمى: ابقى
جيبلي رقم جلوسها برضه عشان ابقى اجيبهلها وانا بدور لولاد خالتي.
شادي: ان شاء
الله.
سلمى: صحيح هي
هالة عملت ايه في النتيجة؟.
رد بأسف.
شادي: شالت مادة
بس الحمد لله انها نجحت اصلا,البت دي السنة دي كانت ملطشة معاها اوي.
قالت ساخرة.
سلمى: مش معاها
لوحدها, فيه واحد صاحبنا كان هيضيع السنة دي ومش هيطلع الاول,لولا ربنا
ستر.
شادي: اههه ,
متفكرنيش, البنت الي اسمها منى دي, انا مش عارف جاتلي منين, الناس المحولة
من جامعات تانية دول بيبقو خطر, الواحد مبيبقاش عارف قدراتهم الا بعد
الامتحانات.
سلمى: بس انت
عديتها على الحروكروك, بينكو بتاع نص درجة في المية.
شادي: الحمد
لله, اصل هي عندها مشكلة شوية مع النظري, بس يخرب بيت دماغها في العملي,
انتي مبتشوفيش يا بنتي مشاريعها, دي جبارة, مش ممكن ,كرييتف بشكل رهيب.
سلمى: انت معجب
ولا ايه؟.
رد بسرعة.
شادي: معجب
مين؟, دي شبة سامي العدل, بقولك شغلها شغلها.
كتمت ضحكتها وهي
تنهره.
سلمى: بس يا
شادي متتريأش على البنت.
شادي: يا شيخة
هي دي بنت, بقى شبهه ولا مش شبهه؟.
ضحكت وهي تقول.
سلمى: عيب يا
شادي اتلم.
شادي: حاضر
هتلم.
سلمى: ان شاء
الله يا شادي انت ربنا هيكرمك دايما ,عشان انت تستاهل كل خير, انا دايما
بدعيلك والله العظيم.
شادي: ولله انتي
الي تستاهلي كل خير يا سلمى , انا مش عارف انتي ازاي كده عايشة ومحدش
بيخطبك ولا بيتجوزك, انا مش فاهم الصبيان دول اتعمو ولا ايه؟.
نظرت اليه في
حسرة وهي تقول.
سلمى:
باين....قصدي, انا مبفكرش في حاجة دلوقتي, احنا في هندسة يا بني, يعني يا
نذاكر يا نحب.
شادي: منا بذاكر
وبحب اهه والحمد لله, ماشي تمام, انا بس بستغرب, انتي ازاي محدش واخد باله
منك كده, اصل انتي بجد ,زي مابيقولو كده جوهرة, يا بخت الولد الي هتحبيه
بجد.
سلمى:
.............
شادي: ساكتة
ليه؟.
سلمى: عادي.
شادي: انتي مش
مصدقاني؟, طب والله انتي بنت اجدع من أي بنت, ربنا اكيد شايلك خير كتير
اوي, انا شخصيا لو مكنتش بحب ندى كان زمانك اول واحدة افكر فيها.
شعرت ندى
باختلاج قلبها مع حديثة,فقالت باضطراب.
سلمى: شكرا.
شادي: طب ايه
رأيك بقى انا مش هستريح الا لما اجوزك, انا الي هجيبلك عريس, لو كان الواد
هاني اخويا دا كبير كنت جوزتهولك.
توترت سلمى اكثر
,فنهرته بعصبية.
سلمى: بس بقى يا
شادي, بطل كلام غبي, خلينا في الي احنا فيه, هتعمل ايه في الهدية الي انت
كنت عايز تجيبها لندى؟, مقلتليش اجيبهالك منين؟

الحلقه الثانيه
والعشرين

اخذت ندى تبكي , وهي تردد صارخة امام ابيها الغاضب.
ندى: لا , لا , لا .
صاح الاب بدروه.
الاب: يعني ايه لا؟, مفيش حاجة اسمها لا.
ندى: انا مش هروح المنيا, ولو كان على طب حتى, انا مش عايزة اسافر, لا يا
بابا لا.
الاب: امال انتي عايزة تدخلي ايه ان شاء الله؟.
ندى: معنديش مشكلة, احول علوم هنا.
الاب: انتي جالك التنسيق صيدلة المنيا خلاص وانتهينا, مفيش تحويل , هتروحي
يعني هتروحي ,انتي فاهمة.
ندى: بس انت قلتلي هتدخلني خاص.
الاب: ادخلك خاص ليه وانتي جالك كلية؟, وبعدين ماهو الي هصرفه عليكي في
الخاص هصرفه عليكي سفر , متبقيش غبية, روحي الكلية وعدي سنة بتقدير وبعدين
حولي هنا وارجعي.
ندى: لا بقى,انا مش عايزة, ولو مدخلتونيش صيدلة خاصة, انا هروح علوم ,هروح
تجارة ,ومش هروح المنيا.
الاب: طب والله لانتي رايحة المنيا , وابقي وريني مين الي هيحولك بقى.
وخرج الاب من الغرفة غاضبا وتبعته الام, بينما اخذت ندى تبكي, ونسمة وهالة ,
ينظران اليها في صمت,وهي تردد بعصبية.
ندى: انا مش هروح المنيا, هو غصب يعني؟, مش عايزة اسافر انا.
نسمة: انتي ايه الي مضايقك انا مش فاهمة, انتي يا بنتي جالك صيدلة, مش دا
الي كان نفسك فيه؟.
ندى:ايوة , بس انا قلت هتبقى هنا ولا في اسماعيلية ,ولا يوم ما تتنطط تبقى
في المنصورة , لكن في المنيا انتو عارفين احنا بينا وبين المنيا قد ايه؟,
يعني هسافر وارجع كل قد ايه؟؟.
نسمة: نعم؟؟, انتي كل مشكلتك هتسافري قد ايه؟, يعني هنوحشك مثلا؟,على اساس
اننا نفرق معاكي, ما كل الناس بتسافر عشان كلياتها وبتنجح وبترجع, ايه
يعني؟, ما لاميس كانت هناك في ألسن وحولت, وايمن ابن طنط شادية لسه هناك,
ومحدش بيشتكي,انا مش عارفة انتي مكبراها ليه,ماهو كله في مصر, متحسسنيش انك
طالعة الخليج.
قالت هالة بهدوء بعد ان تفرست في وجه ندى.
هالة: هي مش مشكلتها احنا خالص, هي مشكلتها شادي, مش كده يا ندى؟.
نسمة: اااااااااااه.
عادت ندى تبكي.
ندى: هعد ازاي بالشهر ما اشوفوش, المنيا مش قريبة عشان اجي كل اسبوع او
اسبوعين, على الاقل هعد بالشهر, انا كده يحصلي حاجة, انا عايزة ادخل علوم
هنا, هو مش بابا كان واعدني قدامكو ادخل صيدلة خاصة.
صاحت بها نسمة.
نسمة: انتي بتستهبلي يا بنتي انتي, مانتي جالك صيدلة خلاص, وبعدين انتي
خلتيه يعند عليكي, ويحلف , عمره ما هيدخلك حاجة تانية خلاص انتهي.
ندى: لاااا,انا كده هموت,انا مش هقدر ابعد عن شادي كل دا,دا كان لما
بيوحشني كان بينزل من بيته اشوفه تحت البيت, دا ساكن جمبنا اقوم اسيبه
واروح المنيا, لا انا كده هموت هموت بجد.
**********************
شادي: وفيها ايه يا حبيبتي؟ , انتي مصعبها علينا ليه كده, امال الموبايلات
معمولة ليه؟.
ندى: انت بتهذر انت كمان؟, لا يا شادي, انا قلبي مش جامد زيك, انا مقدرش
اعد كل دا بعيد, وسفر وقرف كل شوية, وجامعة معرفهاش, يعني هنا كنت هلاقي
الف مين معايا في نفس الجامعة والكلية, بس هناك مش هلاقي حد, ,هسافر مع مين
وهروح مع مين.
شادي: يا ندى يا حبيبتي , المستقبل ما يقفش قدامه الحاجات الهايفة دي, انتي
مكبرة الموضوع بغباء, انا شايف ان الموضوع مفيهوش حاجة , كلها يادوب سنة
,وانتي شاطرة ان شاء الله تجيبي تقدير وتحولي, ومتتأخريش عليا.
ندى: انت كمان هتقولي زيهم, وافرض ما جبتش تقدير.
شادي: هتجيبي يا ندى ان شاء الله, متبقيش متشائمة كده.
ندى: انا مش متشائمة , انا زعلانة.
شادي: لا متخافيش, ان شاء الله كل حاجة هتمشي تمام, البت سلمى ليها اصحاب
في جامعة المنيا, هقولها واسألها ساكنين فين وكده, ,هيظبطوكي متخافيش.
ردت ندة بسرعة.
ندى: انا مش عايزة حاجة من ناحية سلمى.
شادي: مش وقت غباء يا ندى, انا بتفق معاكي انتي ليه اصلا, انا هبقى اجيب
نمر الناس الي هناك واظبط مع مامتك, انتي اصلا متشائمة ودماغك زي البطيخة.
******************
عادت ندى ووالدها من السفر وهي تشعر انهاك شديد ,بعد ذهابهما للتقديم
بالكلية وتجهيز مكان لسكنها, الا ان اختاها ابتا الا ان تسمعا منها تفاصيل
الرحلة قبل ان تستريح.
هالة: عملتي ايه؟.
ندى: طلع عندهم حق, دار الراهبات بعيد جدا عن الجامعة, وفي حتة مقطوعة, هو
نضيف اوي , بس بعيد, انا قلت اشوف برضه قبل ما احجز في حتة تانية, والبنت
صاحبة سلمى بصراحة ما سابتناش من ساعة ما رحنا, ورجعت معانا في القطر كمان,
بس المشوار ايه , ميت ساعة, انا جالي صداع من القطر.
نسمة: بكرة تتعودي.
هالة: وحجزتي في الشقة؟.
ندى: اه, هي العمارة اصلا اغلبها مغتربات يعني, فأمان, وانا هيبقى معايا
اتنين اخوات واحدة في هندسة والتانية اول سنة معايا صيدلة.
نسمة: طب كويس, لقيتي حد معاكي في الكلية.
ندى: ومعانا واحدة رابعة طب, هي دي الي هتبقى معايا في الاوضة.
نسمة: انتي شفتيهم كلهم النهاردة؟.
ندى: مشفتش ولا واحدة فيهم اصلا, يارا هي الي قالتلي, هي هتبقى ساكنة في
الشقة الي قصادي,انا صحيح مكنتش عايزة من سلمى حاجة, بس يارا دي شكلها جدعة
أوي, ربنا يستر بقى, البلد نضيفة وجميلة, بس الجامعة تتوه.
هالة: دانتو لفيتو اهه يعني.
ندى: اه , بابا حب يشوف كل حاجة , ويعرفني الطرق يعني.
نسمة: ايوة يا عم, حسستي الراجل بالذنب , بقى هيموت ويعوضك,وناقص ينقل
معاكي المنيا, يا عيني عليا انا الي جبت 94 ادبي ومحدش عبرني ببونبوناية
حتى, قال ايه بيقولي وهو انتي كنتي عايزة تجيبي اقل من كده في ادبي.
هالة: وهو انتي كنت عايزة تجيبي اقل من كده في ادبي؟.
نسمة: رخمي على اهلي انتي كمان ,اصلها ناقصاكي.
ندى: اما اروح اكلم شادي اطمنه اني وصلت , لحسن معرفتش اكلمه خالص النهاردة
مع بابا.
**************************

**
هالة: الو , ايوة يا هايدي خير؟, بعتالي بليز كول مي ليه؟.
هايدي: معلش يا لولو اصلي لسه مخلصة الكريدت بتاعي, بس حاجة مهمة حصلت.
هالة: خير.
هايدي: عمرو لسه قافل معايا دلوقتي.
هالة: عمرو مين ؟, عمرو عمرو بتاعنا.
هايدي: اه والله, هو انا لقيت نمرة غريبة بتتصل , رديت قالي انا عمرو مجدي
وبتاع,ماهو لو كان كلمني من نمرته مكنتش هرد مانتي قايلالي, وقعد يقولي
عاجبك الي حاصل دا, هالة بقالها شهر ونص مبتردش عليا, ومامتها هزأتني في
التليفون ومبتردش على مامتي, ايه يعني انا غلطت, بس انا دلوقتي مش قادر
اعيش من غيرها, وكلميها وبتاع, دانا مبقتش عارف اخرج في أي حتة, حتى كريم
ونيرة معادوش بيطيقوني انزل معاهم,....الا مين كريم ونيرة دول؟.
هالة: دول كابل اصحابنا كنا بنخرج سوا على طول احنا الاربعة.
هايدي: اه افتكرتهم, المهم يعني, بس, وقعد يقولي انا كل اسبوع بحاول اوصلها
مش عارف, انا اسف , وقوليلها وبتاع, وحاولي تقابليني بيها, انا بحبها
وحاجات من دي كتير بقى انا مش فاكرة, بس المهم , قلتله هشوف , وبعتلك عشان
تكلميني , اعمل ايه بقى؟.
هالة: ولا حاجة؟.
هايدي: يعني ايه ولا حاجة؟.
هالة: يعني ولا حاجة, انا وعمرو خلاص انتهينا , هي دي اول مرة يغلط فيها؟,
هو بيستهبل حضرته, فاكرني هبلة , هفضل طول عمري اسامحه, لا خلاص , دا كان
زمان, انا مش عايزة اسمع اسمه اصلا, على اد ما لسه بحبه, على اد ما هو كاسر
قلبي وجارح كرامتي, ابدا ما هقدر اسامحه.
هايدي: طب لو اتصل تاني؟.
هالة: قوليله هالة نسيتك وتلاقيها ارتبطت اصلا خلاص.
هايدي: مابلاش الكلام دا يا هالة,افرضي رجعتو لبعض.
هالة: لا بجد, قوليله انا سمعت انها مرتبطة دلوقتي متكلمهاش تاني, انا مش
هرجع لعمرو دا تاني ولو بموت.
هايدي: خلاص,....انا هقله وانتي حرة

[b]الحلقه الثالثه والعشرين[/b]

[b]
نظرت ندى الى الفتاة التي تقف امامها في تفحص ,وقالت.
ندى: لا انا في صيدلة مش في طب.
قالت الفتاة وهي تجر حقيبة سفر وتدخل احدى الغرف.
مروة: احسن يا بنتي, انتي الي كسبانة على فكرة,انا زي مانتي شايفة اهه طالع
عيني فيه, ...تعالي هي دي اوضتنا, ....اهو انا مكنتش كده انا كنت مليانة
زمان قبل ما اجي هنا, بس فيه ناس الغربة بتيجي معاهم بتخن,و ناس بتبهدلها
زي مانتي شايفة كده.
تبعت ندى الفتاة للغرفة وهي تقول.
ندى: انا بقى لو خسيت اكتر من كده هختفي.
مروة: اه, هههههه, لا متخافيش فيه بنات بتتخن من السفر عشان الاكل في
الغالب من برة.
ندى: اه, بس فيه تلاجة هنا مش كده؟.
مروة: ايوة طبعا بس بعد كده هنرجع من الكلية مطحونين, مفيش دماغ نطلع حاجة
نقليها حتى, فبنستسهل ونطلب دليفري.
ندى: مممم,....امال اية والاء فين؟.
مروة: اهي الاء دي قمة الروقان, بتموت في التأخير , انا كنت قاعدة معاها في
الاوضة السنة الي فاتت, بس هي هتعد مع اختها السنة دي, والله هنجرب , لو
بقيتي انتي واختها اصحاب وحبيتو تعدو مع بعض نبقى نبدل, عادي ,انا وهي
واخدين على بعض.
ندى: ممم.
ابتسمت مروة وهي تنظر اليها بشفقة.
مروة: انتي شكلك لسه مخضوضة, احنا كلنا كنا كده في الاول, متخافيش يا بنتي,
هتاخدي على الجو بسرعة, هيبقى ليكي اصحاب , وهتلاقي ناس كتير زيك, الجامعة
هنا لذيذة مش رخمة.
ندى: يارب .
مروة: قومي قومي,كلمي اهلك وطمنيهم انك وصلتي بالسلامة.
ندى: اه صحيح.
نذكرت شادي,فخرجت في سرعة ودخلت دورة المياة بالهاتف.
ندى: الو , ايوة يا حبيبي.
شادي: انا مش قايلك يا ندى اول ما توصلي تكلميني, طب على الاقل ردي عليا
لما اتصل ,ليه تحرجيني وتخليني اكلم مامتك واسأل وصلتي ولا لأ.
ندى: والله يا حبيبي كنت ملبوخة اخر لبخة, انا لقيت مروة دي مستنياني في
المحطة واخدتني وجابتني, والله لسه باخد نفسي دلوقتي .
شادي: خلاص يا حبيبتي, المهم انك وصلتي بالسلامة, شفتي يارا ولا لسه؟.
ندى: لا ,انا مش قلتلك انها هتيجي من تاني اسبوع مش من اول اسبوع.
شادي: اه صحيح نسيت,معلش,..المهم انتي مرتاحة يا ندى؟.
ندى: والله انا لسه واصلة مش عارفة حاجة لسه.
شادي: لا يا حبي متعصبيش نفسك, خليكي عادي ,هتفرق ايه عن هنا يعني,
واتصاحبي على البنات عادي, وخدي بالك بس من نفسك, بطلي قلق.
تسمعت قليلا الى الضوضاء الصادرة من غرفة الجلوس, فقالت.
ندى: شكل اية والاء دول وصلو, انا هروح اشوفهم وابقى اكلمك باليل يا حبيبي.
شادي: ماشي يا حبيبتي, خدي بالك من نفسك.
ندى: وانت كمان يا شادي , بحبك.
شادي: وانا كمان بحبك اوي.
ندى: باي.
شادي: باي.
وخرجت في سرعة, فقالت مروة.
مروة: اهم يا ستي وصلو, كنتي بتسألي عليهم, دي الاء ودي اية.
سلمت عليهما ندى في حذر ,فقالت الاء لاختها.
الاء: يلا يا ستي, اهي ندى معاكي في الكلية , يعني هتروحو سوا وتيجو سوا ان
شاء الله, عشان انتي كنتي قلقانة وخايفة.
ندى: اذا كان ع القلق متخافيش يا اية ,انا خايفة اكتر منك على فكرة, احنا
هنروح نخبط بكرة سوا.
اية: لا ماهي الاء هتودينا بكرة وتعرفنا على اصحابها هناك, متخافيش ولا
حاجة.
الاء: ايوة مانتي جاية باشا ومعتمدة عليا, مش انا الي جيت لوحدي معرفش
صرصار هنا لغاية ما اتعرفت على المصري, الي لففني على الجامعة كلها.
ندى: مين المصري دا؟.
مروة: علي المصري دا حتة سكر, اسكندراني زيي, بس اصغر مني بسنة ,في طب
اسنان بس ايه هيظبطكو متخافوش, احنا هنسلمكو ليه وهو هيتصرف.
اية: مش علي دا الي جالنا لما كنا في رحلة اسكندرية السنة الي فاتت؟.
مروة: ايوة مانتو كنتو في رحلة وانا هنا متثبتة مبنزلش, دراسة متواصلة مفيش
اجازات ولا كأني في الجيش.
الاء: ايوة هو,الي كان بيغلس عليكي.
ثم التفتت الى ندى.
الاء: اهم حاجة جبتي سن بلوك ولا لأ, الشمس هنا الصبح فظيعة.
شعرت ندى بالغربة بين الفتيات على الرغم من ترحابهم الحار بها, ولكنها شعرت
بالفراغ والحزن, وانتظرت بالكاد حتى جاء وقت النوم, لتحادث اختيها وشادي,
وتبكي قليلا قبل ان تنام.
*******************
هالة: قالك ايه؟.
هايدي: مش لما اعد طيب, ايه قلة الذوق دي؟, هاتيلي مية.
هالة: نسمة قومي هاتيلها مية.
هالة: يعني هي طلبت منك انتي, ايه الغلاسة دي.
هالة: قومي بجد يا نسمة.
نسمة: حاضر.
هالة: هه؟, قالك ايه؟.
هايدي: قلتله دا انا معرفش عنها حاجة من زمان, قافلة موبايلها وكده, سألت
ندى , قالتلي مش عايزة تفتكر حاجة من ناحية عمرو, كويس كده؟.
هالة: لا, قلتيله ان انا مرتبطة؟.
هايدي: معرفتش اقله ازاي, قلتله باين انا اسمع انها مع واحد دلوقتي.
هالة: احسن كده, وقالك ايه؟.
هايدي: قعد يزعق الاول وقال ازاي, وهو مين وعرفته منين, قلتله ايه ايه انت
بتكلمني انا كده ليه؟, قام هدي شوية , وبعدين قال على العموم ربنا يوفقها
ويارب تكون مرتاحة بس, وبعدين سألني هي بتحبه , كنت هضحك , عايزة اقله هو
مفيش حد اصلا......
قاطعتها هالة باقتضاب.
هالة: ومين قال ان مفيش.
هايدي: بتهذري؟, ومقلتليش يا كلبة؟, مين؟.
هالة: هو مش حاجة يعني, عارفة اسلام؟.
هايدي: اسلام منصور, بتاع الجيم ؟.
هالة: اه.
هايدي: اه ايه يخرب عقلك, انتي هتلعبي بالواد يا هالة, عايزة تنسي عمرو
باسلام؟.
هالة: انا مش بلعب بيه ولا حاجة, احنا بس بنتكلم على التليفون.
هايدي: بتتكلمو وانتي متأكدة انه بيموت فيكي , يبقى مبتلعبيش بيه ازاي
يعني, انتي لسه بتحبي عمرو وانتي عارفة, انتي هتفضلي مربوطة بيه لحد امتى؟.
قالت هالة بحدة متوترة, دون ان تفكر.
هالة: انا برضة الي مربوطة بعمرو؟, شوفي بقى نفسك وربطتك بالسلاموني بتاعك,
بيروح يروح ولما بيشاورلك بترجعيله, يعني هو خطب دلوقتي واول ما كلمك في
التليفون نزلتي قابلتيه, وسبتي سامح وسبتي الدنيا عشانه, بتعيبي عليا انا
في ايه اني عايزة اشوف حياتي , انا مش عايزة يعاملني زي ما حمادة بيعاملك.
اتسعت عينا هايدي في صدمة.
هايدي: قصدك ايه يا هالة؟, قصدك ان حمادة بيلعب بيا؟.
هالة: ماهو الي ميشوفش دا يبقى اعمى يا هايدي.
هايدي: انتي عارفة ومتأكدة ان حمادة لولا باباه كان زمانه خاطبني انا.
هالة: دا بقى الي هو بيقولهولك وانتي لسه بتصدقيه, وانا مكنتش بحب اجرحك,
بس انتي لازم تشوفيه على حقيقته بقى, مش معقول كل الناس شايفة وانتي لا.
دخلت نسمة في هذه اللحظة بالمياة والفاكهة.
نسمة: اتفضلي يا ستي, مية وموز كمان, مش حارمينك من حاجة.
فلاحظت الوضع المتوتر بينهما ,فقالت هايدي لهالة بغضب.
هايدي: انتي عشان سبتي عمرو, عايزة كل الناس تفركش زيك ولا ايه؟.
هالة: هو انا عشان خايفة عليكي, ابقى عايزاكي تفركشي؟.
هايدي: انتي عارفة انا بحب حمادة اد ايه.
هالة: بس هو مبيحبكيش, وواخد باباه حجة, بقى بالله عليكي واحد كانت كل
مشكلته انا ظروفي متسمحليش اخطبك معلش سامحيني ويسيبك, وبعدها بشهرين يكون
خاطب, دا كلام يرضي مين يارب, وبعد كده يجي يقلك انا بحبك بس بابا خطبلي
غصب عني, هو فيه راجل بيخطب غصب عنه دا البنات مبيعملوهاش, وبعدين خاطب
واحدة بنت عيلة غنية, وجايبلها شيء وشويات , يبقى مشكلته ظروفه منين,
واشتغل عند باباها, دا واحد وصولي مايتلككش في باباه بقى.
احمر وجه هايدي غضبا من الكلام.
هايدي: خدي بالك انتي بتغلطي فيا وفيه, وانا مش هستحمل حاجة زي كده, فانا
همشي بدل ما ارد عليكي.
فتدخلت نسمة بسرعة.
نسمة: لا تمشي تروحي فين, عيب يا هايدي,انتي لسه جاية, اعدي استني.
وحاولت ايقاف هايدي عن جمع اشيائها.
هايدي: معلش يا نسمة, اصل هالة مبقاش يهمها مشاعر الناس خلاص.
نسمة: يا بنتي سيبك منها دا بيتك.
هايدي: منا عارفة انه بيتي ,ابقى اجي وقت تاني.
اشارت نسمة لهالة في الخفاء ان تقول شيئا فلم تفعل,فعادت تقول لهايدي.
نسمة: طب استني معانا داحنا كنا لسه هنكلم ندى , نشوف عاملة ايه هناك في
الغربة.
هايدي: هبقى اتصل بيها انا لما اروح, باي باي.
وانصرفت رغم الحاح نسمة,فعادت نسمة لهالة بعد توصيلها هايدي لباب البيت.
نسمة: ينفع كده ياهالة؟, عيب صاحبتك تخرج من بيتك بالشكل دا.
هالة: سبيها دي غبية مش عايزة تفهم, الواد بيستقفاها عيني عينك, كل ما
يجيله مزاجه يتفسح او يسافر ياخدها وبعد كده يرميها, ولا بيحبها ولا بيتنيل
من يومه, وكل الناس شايفة دا وعرفاه وهي بس الي مش شايفة , الواحد كان
فاكرها صغيرة وهبلة, بس عيب يعني دي كبرت , المفروض تفهم, ايه؟, لما يتجوز
برضه هيفضل يكلمها كده, مش بعيد تتجوزه عرفي بالشكل دا بعدين.
نسمة: برضه مكنتيش تسيبها تمشي من بيتك غضبانة, دي مش اصول.
هالة: سيبك انتي من الاصول والكلام الفارغ دا, هاتي التليفون يا بنتي نكلم
ندى لحسن واحشاني, بدل الفقعة الي فقعتهالي هايدي دي, اما بنت غبية صحيح[/b]

[b][b][b]الحلقه الرابعه والعشرين[/b]

[b]
[/b][/b]

جذبت ندى اية لظل قريب ,وهي تقول.
ندى: تعالي يا بنتي من الشمس دي, احنا مش ناقصين, انا مش عايزة اسمر.
اية: انا بقى مش فارقة معايا, السمار نص الجمال.
ندى: طب وضربة الشمس؟.
اقبلت عليهما فتاة رقيقة ذات شعر قصير وعينين سوداوتين.
كارمن: هاي يا بنات؟, مشفتكوش جوة.
اية: داحنا شفناكي قبل المحاضرة ,وعدينا من قدامك,وقلنالك هاي يا كارمن,
وبسبسنا ,وانتي حلقتيلنا ولا كأننا هنا.
كارمن: الصبح؟؟,....ااااهه.
اية: ايوة,...ااااه, كنتي واقفة مع قائد الحرس.
ندى: وانتي مالك يا رخمة؟.
اية: انتو هتتفقو عليا ولا ايه؟, عشان كل واحدة مظبطة يعني.
كارمن: بس انا مش مظبطة حاجة, انا وهو اصحاب عادي, وبعدين هو كبير اصلا .
اية: اصحاب عادي؟, حرام عليكي يا شيخة داحنا كنا قصاد عينك ومشفتيناش.
كارمن: وبعدين مينفعش اصلا, انا كريستيان وهو مسلم.
اية: يعني هي بتفرق معاه, انا اسمع انه مدوبهم دفعات, ولو كان لقى يهود كان
داس برضه, بس هو بصراحة عليه حتة موتوسيكل وغمازة في وشه لما بيضحك,
يهبلو.
استوقفهم صوت الاء مقبلة عليهم, بصحبتها شاب.
الاء: انتو فين يا عيال قلبت عليكو الدنيا على ما شفتكو, ازيك يا كارمن؟.
كارمن: شفتو عشان تعرفو ان مش انا بس الي مبشوفكوش.
اية: اه, اصل احنا مخفيين النهاردة, ازيك يا باشا.
وسلمت على الشاب دليل معرفة قديمة,فتكلم لاول مرة.
علي: انتي لسه رغاية زي مانتي؟.
الاء: اه, اعرفكو ,دا بقى علي المصري,تالتة طب اسنان معلش كان المفروض
نعرفكو بيه من اول يوم, بس الاستاذ باشا ومبيجيش الا بعد اسبوع.
علي: اهلا.
الاء: ندى وكارمن.
سلم عليهما علي, وهو يقول.
علي: اهلا, وانتو كلكو ساكنين سوا؟.
الاء: لا, كارمن من هنا من المنيا.
علي: انا بقى اسكندراني.
ندى: ماحنا عرفنا من مروة.
علي: اه صحيح يا الاء, ابقي فكريني اديكي حاجة مروة, مامتها بعتاهملها
معايا.
الاء: ابقى تعالى معانا واحنا مروحين , انا هشيلها كل دا ليه؟, خسارة فيها.
علي: طب منا شايلهم على قلبي من اسكندرية, على العموم ماشي.
الاء: انتو وراكو محاضرة تاني يا ولاد؟.
كارمن: لا , بعد ساعتين.
الاء: طب تعالو معانا, احنا رايحين طب اسنان الشباب كلها هناك, الواد دا
هيعرفكو على العيال, روحو معاه عشان انا مش فاضية.
اية: طيب اوكاي, اتفضل يا استاذ قدامنا, لما تخلصي يا الاء كلمينا عشان
نروح سوا.
الاء: ان شاء الله.
********************
شادي: والله انا خايف اوي, مش عايز ابينلها صحيح ,بس انا قلقان عليها يا
لومي.
سلمى: من ايه؟.
شادي: اصل ندى دي انا اعرفها من وهي قطة مغمضة, انا الي مربيها على ايدي,
ملحقتش تشوف الدنيا, ملحقتش تبعد عني, يعني هي لما كل يومين تكلمني, تقول
فلان عمل كذا وفلان معايا في السيكشن, وفلان...., يعني لما انا اسمع اسامي
كل الولاد دي وانا مش شايفهم ومش عارفهم, مش تحت عيني, طبعا لازم اقلق.
سلمى: انت مش واثق فيها؟.
شادي: طبعا واثق فيها, بس هي ندى حلوة, ويتطمع فيها عشان بتاخد على الناس
بسرعة, هو مفيش حاجة تقلق من نحيتها , بس انا خايف عليها.
سلمى: مالطبيعي انها تقابل صبيان وتتعامل معاهم, هي رايحة جامعة مش رايحة
جامع, وبعدين انت متشكش فيها عشان متخنقهاش, انتو بعدكو بس الي تاعبكو, هي
راجعة امتى؟.
شادي: اخر الاسبوع دا, هتعد اربع ايام بس.
سلمى: طيب متحسسهاش بحاجة عشان متزعلش.
شادي: لا , هي مش حاسة بحاجة خالص اصلا.
**************************
***
نزلتا نسمة
وميسون بعد انتهاء درسهما , واثناء نزولهما, قالت ميسون.
ميسون: مش ميادة
اختي جالها عريس؟.
نسمة: لا والله؟,
وحلو بقى ولا ايه؟.
ميسون:
مشافتوش,..هو مجالهاش يعني جالها اوي, بس هو باباه صاحب بابا, وكانو
بيتكلمو, فهو بيدور على عروسة لابنه, عشان هو هيتخرج السنة الجاية.
نسمة: ههههه,
ابوه الي بيدورله, وهو لسه نونو متخرجش؟.
ميسون: اه والله,
وقال لبابا انت مش عندك بنوتة حلوة, كان شافها في فرح قريب, فانا بقولها
يمكن غلط وشافني انا مش انتي.
نسمة:
هههههههههه, ممكن برضه, بس بجد اختك طيبة , تستاهل كل خير.
ميسون: هو عمو
مجدي كان بيتكلم مع بابا على اساس انه اول ما يخلص هيخطب, فالي فهمه انه
ممكن يشوف نسمة وكده, اصل الولد ظابط , في فنية عسكرية اخر سنة, فلما ينزل
اجازة , كنا هنروح نخرج معاهم, اصل باباه صاحب بابا من ايام المدرسة,
واتقابلو قريب, مش من زمان يعني, بس هو بقى دلوقتي صاحب شركة سياحة و.....
قاطعتها نسمة في
حدة.
نسمة: استني
استني, عنده شركة سياحة وابنه ظابط؟؟؟,...اسم شركة السياحة الرحمة صح؟؟.
اندهشت ميسون
فقالت باستغراب.
ميسون:
....اه....عرفتي منين؟.
نسمة:اااااه ,طب
قولي لاختك تهرب بجلدها بقى , الولد دا اسمه عمرو مجدي صح؟ ,مبيفكركيش
الاسم بحاجة خالص؟.
ميسون: لا مش
واخدة بالي.
نسمة: عارفة عمرو
الي مها سمير بتتكلم عنه في المدرسة ....الي بيركبو معاه العربية يا بنتي ,
هو دا بقى, وفوق كدة وكدة, هو عمرو الي كان مرتبط بهالة اختي, وسمعته زي
الزفت, واخرتها الحمد لله سابته عشان قفشت معاه بنت في عربيته, فلو باباكي
يعرف يقاطع الراجل ابوه نفسه ياريت يقاطعه.
***************************
قالت هالة
باندهاش مصدوم.
هالة: الله عليك
يا عمرو, داحنا ملحقناش نكمل تلات شهور, عايز تخطب؟؟.
نسمة: دا بالصدفة
كدة انا فهمت انه هو, سبحان الله, انا قلتلها الحقي اختك.
قالت هايدي بحدة.
هايدي: عشان لما
اقلك انه كان بيلون عليا وقت ماكنا انا وانتي متخانقين مصدقتنيش, وكان قاعد
يقولي نتقابل برة عشان نحل المشكلة, وانا من زمان بحس انك قريبة مني,
وفاهمة دماغي, وانتي الي باقية من ريحتها , بستريح لما اشوفك, بصراحة انا
كنت مخنوقة منك اصلا ولو كنت عايزة اعملها فيكي كنت عملتها فيكي صح, بس انا
برضة لسه صاحبتك وبحبك, واقسم بالله مارضيت انزل ابدا اشوفه مع انه كان
بيزن كتير.
هالة: انا مش
مصدقة, الولد دا مجنون, منين بيحبني وهو بيعمل كل دا؟.
هايدي: مش انتي
الي وصلتيله انك مرتبطة , تستاهلي.
هتفت نسمة.
نسمة: تستاهل
ايه؟, احسن هي كده كويسة دنا مصدقت سابته, وبعدين واحد تاني مين يا استاذة
هالة, وانا نايمة على وداني.
قالت هايدي
بعفوية.
هايدي: دا اسلام
بتاع الجيم.
زجرتها هالة.
هالة: انتي
مبيتبلش في بقك فولة كده على طول.
فتراحعت هايدي في
دهشة.
هايدي: انا
اشعرفني انك مش قايلالها.
نسمة: وياترى
ماما عارفة المرة دي ولا .....
هالة: لا, ولو
نطقتي وقلتيلها هقطع لسانك, انتي سامعة.
نسمة: انا مالي,
يعني وهو انتي لو قلتيلها اصلا هيفرق معاها, هتقلك شاطرة يا حبيبتي, لحقتي
تعوضيه, عرفيني عليه اشوفه روش ولا لأ.
********************
علي: بس انا عمري
ماكنت اتخيل ابدا ان انتي مرتبطة, يعني انتي بالذات.
ندى: اشمعنى
يعني؟.
علي: يعني انا
كنت متخيل ان كارمن وأية ممكن , شكلهم يجيب على كدة, بس مطلعوش مرتبطين,
وانتي شكلك كتكوتة صغنتوتة كدة, مكنتش متخيل ان ليكي حد يعني.
ندى: لا , ليا.
علي: هو معانا في
الجامعة هنا؟.
ندى: لا خالص, دا
جاري, هو في هندسة مع هالة اختي.
علي: انتي عرفتيه
عن طريقها؟.
ندى: لا مش اوي
يعني.
ابتسم على.
علي: وهو سابك
تيجي كده عادي, مش خايف عليكي؟.
ندى: هههه, يخاف
عليا ليه؟, هتاكل؟.
علي: لا يعني
عشان مش هيشوفك الا كل فترة.
ندى: والله انا
الي كنت زعلانة, هو الي قالي عادي ومصلحتك ومستقبلك.
علي: هو عنده حق
فعلا.
ندى: دا كلام
واحد بارد زية,وهو انت بقى مش مرتبط؟؟.
علي: حاليا ؟؟,
تقريبا لا.
ندى: يعني ايه
تقريبا لا دي؟.
علي: يعني والله
احنا شكلنا هنسيب بعض, مبتسمعش كلامي خالص ياندى, ومطلعة عيني, وانا تعبت
منها جدا.
ندى: اعرفها
انا؟, شفتها؟.
علي: لا هي في
فنون , هبقى اوريهالك, اسمها غادة.
ندى: ابقى عرفني
عليها.
علي: اكيد ان شاء
الله, رايحة فيه ؟,...انتي هتقومي ولا ايه؟.
قامت من على
السلم وهي تنفض ملابسها.
ندى: اه عايزة
اروح بقى عشان أية هتستنى الاء, وانا مش قادرة استنى عايزة اروح انام, هنام
على اخري اصلا.
علي: طب استنى
انا هوصلك, ماحنا جيران وانتي في اخر الشارع.
قالت بسرعة في
دهشة.
ندى: لا بلاش.
لاحظ هو تراجعها
,فقال بابتسامة.
علي: عيب يا بنتي
الدنيا هتضلم ومينفعش تمشي لوحدك كده, لو اية والبنات معاكي كنت سيبتك, بس
مش ممكن اسيبك لوحدك,انتي هبلة.
ترددت ندى ,فقال.
شادي: ندى,
متتكسفيش , احنا هنا كلنا اخوات في بعضينا , لو اي واحدة من البنات كنت
هوصلها برضة,متخافيش.
قالت على مضض.
ندى: طيب ماشي
,.. يلا

[/b]

[b][b]الحلقه الخامسه
والعشرين[/b][/b]

[b][b]
[/b][/b]

جلست ندى امام شادي بالمطعم,وابتسمت في
سعادة.
ندى: وكمان ورد؟, انت مدلعني على الاخر.
شادي: عشان تعرفي اد ايه انتي وحشاني.
ندى: على كدة بقى انت مش واحشني, انا مجبتلكش حاجة وانا جاية.
شادي: ياروح قلب شادي, انتي كفاية عليا, انتي كنتي وحشاني لدرجة اني كنت
هجيلك المنيا.
ندى: ياريت يا شادي, ياريتك كنت معايا, والله كنت هتتبسط اوي, كنت هعرفك
على اصحابي, واية وكارمن.
شادي: هي كارمن دي الي من هناك, واية من هنا صح؟.
ندى: اه, اية والاء , ومروة والمصري اسكندرانية, وصفا من المحلة, ومحمد
صلاح من كفر الشيخ,احنا عاملين كوليكشن جامد,فيه ناس كتير اوي مش من هناك.
شادي: مممم, اوعي تكوني يا ندى بتعدي مع الصبيان لوحدك.
ندى: ههه, ايه يا شادي, انت هتبتدي تغير ولا ايه؟, والله كويس, اخيرا حسيت
ان المفروض تغير عليا؟.
قال مقتضبا محاولا اخفاء غيرته.
شادي: يا ندى يا حبيبتي انا على طول بغير عليكي, بس مببينش عشان مضايقكيش.
نظرت اليه ندى مطولا ثم قالت بشوق.
ندى: تصدق كل حاجة فيك وحشتني, انا مش مصدقة اني قدرت ابعد عنك شهر كامل.
شادي: ربنا يصبرنا يا حبيبتي , وان شاء الله تجيبي تقدير السنة دي وتحولي
بقى, عشان انا من دلوقتي تعبت, امال لما ابعد عنك تاني هعمل ايه؟.
قالت بدلال.
ندى: بجد بتحبني يا شادي؟.
شادي: لا, غاوي وجع دماغ وبس.
ندى: انا خايفة تنساني لما امشي.
شادي: انا الي خايف انتي الي تنسيني لما تمشي, واصحابك والمنيا تاخدك مني.
ندى: محدش يقدر ياخدني منك.
تمعن فيها النظر وقال.
شادي: ربنا يستر.
********************
نظر عمرو من بعيد الى هالة التي وقفت تضحك للشاب المفتول العضلات الذي
يرافقها, وعقد حاجبيه في غضب, وشعر بالدم يفور في رأسه, فاقترب منهما,
والقى عليهما تحية مقتضبة, فالتفتت هالة تنظر اليه بدهشة ,ثم بازدرداء بعد
ان تعرفته.
عمرو: انا عايز اكلمك.
ردت ببرود.
هالة: انت مش شايفني مشغولة؟.
رد بعصبية مكتومة.
عمرو: متستفزنيش يا هالة ,انا عايز اكلمك.
قالت بحدة.
هالة: وانا مش عايزة اكلمك.
تدخل الشاب الواقف معها, فقال بخشونة لعمرو .
اسلام: خلاص يا بشمهندس, قالت مش عايزة تكلمك.
التفت اليه عمرو هاتفا.
عمرو: انا مش بشمهندس, ومبكلمكش انت اصلا.
اسلام: وهي بقى مش عايزة تكلمك, يعني اي كلام بتقوله يبقى ليا, واتفضل بقى
دلوقتي هوينا.
استشاط عمرو غضبا ونفرت عروق رقبته.
عمرو: انت مش عارف انت بتكلم مين, احترم نفسك.
ودفع كتف اسلام في غضب, فنظر اليه اسلام من اعلى وقال.
اسلام: لا بقى انا هعرفك انت الي بتكلم مين.
فتراجعت هالة الى الخلف حين بدأ الشجار, واخذت تبكي في خوف, ولم تجد بدا
الا ان تنصرف.
*****************
نسمة: طب انتي بتعيطي ليه دلوقتي؟, عشان عمرو اتضرب؟.
هالة: انا ...مكنتش عايزة..اشوفه خالص..
نسمة: انتي لسه بتحبيه يا مجنونة انتي؟, دا حيوان, وبعدين انا مش عارفة
انتي بتعملي ايه مع اسلام دا, يعني عمرو وكانت حجتك انه حب حياتك وان كل
الناس عارفة وعلى وش خطوبة زي ماكنتي دايما تقولي, تقدري تقوليلي دلوقتي
انتي بتكلمي اسلام دا ليه؟,بتملي فراغ مثلا؟.
هالة:.........
نسمة: بطلي عياط وردي عليا,....ولا خلاص مترديش, انا عارفة ,لازم يكون فيه
ولد وخلاص.
دخلت هايدي الغرفة, وهي تضع حقيبتها بعصبية وتهتف بهالة.
هايدي: بصي بقى, انا زهقت من عمرو بتاعك دا, انا هغير نمرتي منه, انا مالي
انا بمشاكلكو ودوشتكو ,......ايه دا انتي بتعيطي؟.
نسمة: زعلانة يا ستي انها شافت عمرو.
هايدي: ازيك يا نسمة, مخدتش بالي, انتي يا بنتي اهدي, دا واد جزمة ميستاهلش
تعيطي عليه, دا كلمني واعد يهددني , يقولي عرفيها انا مش هسكت, وهوديلها
اسلام دا في داهية, انا مش فاهمة انتي ليه مقلتليلوش انك عرفتي انه كان
ناوي يخطب.
هالة: انا مكنتش عايزة ارد عليه, فمسك هو واسلام في بعض.
هايدي: خلاص, اتصلي باسلام اطمني عليه, عيب برضه , دا كان بيتخانق بسببك.
هالة: انا لا عايزة اكلم اسلام ولا اكلم حد.
دخلت ندى الغرفة عائدة من الخارج.
ندى: السلام عليكم.
هايدي: ايه دا يا بنتي , حمد الله ع السلامة, انتي هنا ؟.
وقامت تعانقها بحرارة.
ندى: الله يسلمك, ايه مالكو؟, بتعيطي ليه يا هالة؟, ماما قالتلي ان عمرو
ضايقك النهاردة.
هايدي: اعدي اعدي وانا احكيلك.
*******************
شدت اية ملاءة سريرها عليها ,وهي تقول اندى التي تفرغ حقيبتها.
اية: دا حصل بلاوي وانتي مش هنا, غادة والمصري اتخانقو جامد , وتقريبا خلاص
كده سابو بعض خالص.
ردت ندى وهي تعلق ملابسها بالدولاب.
ندى: اهي غادة دي انا مبستريحالهاش اصلا من ساعة ما عرفني عليها.
اية: انا برضة, دا هو خسارة فيها اصلا, تنكة كده وشايفة نفسها على الفاضي,
والواد حتة سكرة , مش كفاية انه قاعدلها هنا مخصوص,ومبيحولش عشانها, مع انه
كان ممكن يحول كذا مرة.
ندى: وهو عامل ايه دلوقتي؟.
اية: هو كان متوقع, بس بيبان في وشه انه زعلان, انتي عارفاه مبيبطلش ضحك,
بس انا حاسة انه اتكسر.
ندى: يا حرام, الواد دا غلبان اوي.
تمعنت اية في ملابس ندى, وقالت بسخرية.
اية: بس ايه الحركات دي؟, الهدوم دي جديدة, تونيكات وبتاع.
ندى: شادي يا ستي, قالي بطلي بقى البنتاكورات, ولبس العيال الصغيرة الي
بتلبسيه دا, قلتله يابني دنا رفيعة جدا, ولو لبست ايه مش هيبان عليا, قالي
برضة لمي الدور شوية, ظبطت بقى من هدوم نسمة شوية.
اية: لا وامانة يعني وبتسمعي الكلام.
ندى: اهو شوية كده لغاية ما ينسى.
اية: مقلتليش , عملتي ايه معاه لما رجعتي؟.
ندى: جابلي ورد وخرجنا اتفسحنا , كان واحشني بشكل يا اية.
اية: واخبار البنت صاحبته سلمى دي ايه؟.
ندى: نطتلنا يا ستي في اخر الخروجة, قال ايه ,جاية تسلم عليا.
اية: ههههه, معلش استحمليها.
ندى: انا نفسي اخلص السنة, واحول بقى يارب بقى.
اية: انا مش مستعجلة, انا مبسوطة هنا.
ندى: مانتي معاكي اختك, هتستعجلي على ايه بقى.
اية: ومش كدة بس, انا مش قلتلك حاجات كتير حصلت في الاسبوع الي نزلتيه.
ندى: لا متقوليش,...رامي بتاع هندسة.
اية: مم,...يعني هو مقالش حاجة صريحة يعني, بس لمح اوي, وبان عليه.
ندى: ياعسل , الولد دا عسل اصلا, يارب يحبك وتحبيه.
اية: عشان يبقى انتي معاكي مهندس وانا مهندس.
*****************
سلمى: متكشرش بقى, يعني خرجناك وفسحناك وظبطناك, وعملنالك عيد ميلاد متعملش
لحد قبل كدة, وبرضة مبوز.
شادي: لا مش مبوز ولا حاجة.
سلمى: ياراااجل, يعني انا مش هعرفك, فك بقى.
شادي: انا بس صعبان عليا اني مش هشوف ندى.
سلمي: هي مش نازلة قريب؟.
شادي: لا, من ساعة اجازة العيد منزلتش, وكلمتني تقولي انها مش نازلة لغاية
امتحانات نص السنة, عشان لما بتيجي بتضيع وقت كبير اوي في السفر , وبتضيع
سكاشن وبتاع, عشان على الاقل بتعد اسبوع.
سلمى: طيب ماهي معذورة برضة, انت نفسك مش هتبقى فاضيلها لو نزلت ,عشان
امتحاناتنا احنا كمان.
شادي: انا حاسس ان ندى بتضيع مني يالومي, وانا مش عارف اعمل حاجة.
سلمى: ايه يا دودو , يا ابني انت حاسس كده بس عشان هي بعيد عنك,وانتو
اتعودتو تكونو على طول مع بعض, لما ترجع هتحس الفرق , سيبك بقى من التفكير
الوحش دا , وانا هاخدك بكرة, انا وسامح وريهام نركب خيل يا سيدي, زي ما
بتحب, ايه رأيك؟.
شادي: بس انتي مبتحبيش تركبي خيل , ومبتجيش معانا دايما.
سلمى: ملكش دعوة, انا عايزة اروح, بس انت متكشرش كده تاني.
شادي: انتي طيبة اوي يا لومي.
سلمى: دا عشان انت طيب , تستاهل كل الناس تبقى طيبة وحنينة معاك, وتحبك
كمان

[b][b][size=21]الحلقه السادسه والعشرين[/b][/b]

[b][b]
[/b][/b]

جذب عمرو ذراع هالة , وهي مسرعة لتبتعد عنه هاتفا.
عمرو: انتي بتجري ليه؟,استني هنا, البادي جارد بتاعك مش موجود عشان يحميكي.
دفعته هالة عنها في عنف ,وهي تقول بخوف غير واضح.
هالة: سيبني يا عمرو انا ماليش دعوة , انتو اتخانقتو مع بعض , مش ذنبي انا.
عمرو: وانتي بقى مش عايزة ترجعيلي عشان المعفن دا.
هالة: لو سمحت متشتموش, على الاقل بيحبني, وبيقدرني, وعمره ما فكر في واحدة
غيري مع ان انا وهو مش مرتبطين اصلا.
سكت عمرو قليلا ثم قال.
عمرو: يعني انتو مش مرتبطين؟,...امال...امال هايدي قالتلي غير كده ليه؟.
انتبهت هالة لذلة لسانها, فقالت بعدائية.
هالة: انت عايز مني ايه يا عمرو؟, انت مش هتخطب, سيبني في حالي بقى.
اندهش عمرو.
عمرو: انتي مين قالك الموضوع دا؟.
قالت باستياء.
هالة: يعني كان فيه موضوع.
وسارت مبتعدة عنه, فركض ليوقفها ثانية.
عمرو: والله العظيم دا بابا, مش انا خالص, وبعدين مفيش حاجة اصلا, دا كله
كلام في كلام, والله لتقفي وتسمعيني.
هالة: انت عايز مني ايه؟.
عمرو: انا لسه بحبك, ومحبتش في حياتي حد غيرك ابدا, ومعرفتش انساكي, انا
مفيش حاجة تتعمل معملتهاش, وبرضة مقدرتش ابطل احبك, يا هالة انا بحبك,بحبك
والله العظيم بحبك.
دمعت عينا هالة في حزن وقالت.
هالة: بس انت مبتتغيرش, معايا متغيرتش,وبعدي متغيرتش, ايه الي يخليني اثق
فيك تاني؟.
عمرو: انا مش هعمل حاجة تاني خالص, هبقى معاكي انتي وبس, احلفلك بايه.
نظرت اليه في قليلا في حنين, ثم تمالكت نفسها وقالت ,وهي تهز رأسها نفيا
بشدة, وكأ،ها تطرد الفكرة منه.
هالة: لا,...لا يا عمرو, انا سامحتك كتير, وانت مراعتش دا.
عمرو: طب تعالي بس , تعالي نروح حتة نتكلم فيها, مينفعش الوقفة دي.
هالة: لا يا عمرو, انا حالفة اني مش هركب معاك العربية تاني ابدا.
عمرو: منا لازم اتكلم معاكي, تعالي بس نروح نعد في مكان, وان شاء الله نوصل
لحل.
هالة: بس انا مش عايزة حل.
قال عمرو بضعف.
عمرو: اخر مرة يا هالة, عشان خاطر الحب الي كان بينا, عشان خاطر الايام الي
قضيناها سوا, اديني فرصة واحدة بس احاول ارجعك ليا , واحافظ عليكي, عشان
خاطري يا هالة.
نظرت اليه هالة في تردد , ثم قالت.
هالة: بس دي اخر فرصة ليك يا عمرو, بعدها مش هيبقى فيه فرص.
قال عمرو بسرعة.
عمرو: موافق.
وافقت هالة على مضض , وسارت معه الى السيارة, بينما التف هو ليركب, وانطلق
بالسيارة.
عمرو: نروح مكان ما كنا بنعد دايما.
هالة: لا ياعمرو, نروح اي مكان قريب هنا, انا مش عايزة اتأخر.
عمرو: عشان خاطري يا هالة, يمكن تحني وقلبك يرضى عني تاني.
هالة: يا عمرو انا فهمتك , انا جيت معاك مش عشان ارجعلك, انا جيت عشان
اعرفك انك مبقتش تأثر فيا خلاص.
بدأ عمرو يحتد.
عمرو: يعني ايه؟, يعني اسلام بتاعك دا عاجبك اوي كده.
هالة: احترم نفسك يا عمرو.
عاد عمرو ليهتف, وهو يقول بتعال.
عمرو: انا محدش يقولي احترم نفسك, اسلام الصرصار دا انا ادوس عليه, انا
اصحابي كلهم شرطة , متخلنيش احبسهولك.
هالة: تحبس مين يا بني ادم انت, تصدق انا غلطانة اني ركبت معاك اصلا
وامنتلك تاني, انت ملحقش الكلام يبرد في بقك, وبترجع زي مانت برضة.
ضغط عمرو على دواسة الوقود اكثر, وزاد سرعة السيارة,حين قالت بغضب.
هالة: اقف يا عمرو هنا نزلني.
عمرو: لا يا هالة, احنا لازم نتكلم.
هالة: هتقول ايه غير الي قلته؟, ماهو الي في قلبك بان كله خلاص,انت غيران
على نفسك, مش عايز بس حد غيرك ياخدني مش اكتر.
عمرو: ولا حد يقدر اصلا.
هالة: انا مش ملكك, ومش ملك حد, انت فاهم؟........,انت بتسرع ليه؟, هدي
السرعة شوية ياعمرو كدة هتموتنا.
عمرو: مش مهم.
هالة: عمرو, بطل جنانك دا بقى, شفت ازاي انك مبتتغيرش,انا تعبت منك ومن
دماغك دي بقى.
صاح عمرو.
عمرو: انتي الي مجنونة, عايزة تسيبيني عشان حتة صرصار, انا الي عمري ما
اتذللت لحد, بتتدلعي عليا, لا دا لاعاش ولا كان الي يرفضني.
هالة: لاااااااا,دانت مجنون واناني, بطأ شوية , ونزلني ياعمرو.
عمرو: لا مش هنزلك.
هالة: طب بص قدامك, وشوف انت سايق ازاي.
زاد من سرعة السيارة في عناد وهي يصيح.
عمرو: مش باصص.
صرخت هالة بشدة ,حين ارتطمت السيارة بسيارة مقبلة من الطريق الاخر في اتجاة
معاكس وبمنتهى العنف.
********************
ندى: ايوة يا نسمة, اهدي اهدي بس, فيه ايه؟...,مالها
هالة؟,.....ايه؟,..مالها؟.....مش فاهمة منك حاجة؟,....مستشفى ليه؟,......ياخبر
اسود,...ايه الي حصل؟.
ارتعشت يدا ندى على الهاتف بشدة, فانتبه لها علي , الجالس امامها في
الجامعة بين اصدقائه, فاقبل يقترب منها, بينما بدأت هي بالبكاءوهي تتكلم.
ندى: انا هاجي, لازم اجي,....,معرفش,...هحجز اول معاد,...هتصرف يانسمة,
يعني ايه ماما كانت قايلالك متقوليليش,....لا طبعا جاية, انا هروح احجز
دلوقتي على طول.
واغلقت الهاتف, فقال على بقلق.
على: ايه يا ندى, خير؟.
وضعت ندى كفها على فمها تتمالك اعصابها ودموعها الى ان استطاعت النطق.
ندى: اختي عملت حادثة وفي المستشفى.
وضعت يدها على رأسها ,وهي تدور حول نفسها لاتدري ماذا تفعل.
على: انتي هتنزلي دلوقتي؟, دانتي لسه جاية مبقالكيش اربع ايام .
ندى: لازم انزل طبعا, انا هروح احجز دلوقتي.
على: طب استني انا جاي معاكي.
انطلقت في سرعة.
ندى: مش هستنى.
هتف وهي يلحق بها.
على : طب خلاص انا جاي معاكي اهه, طز في السكشن.
وسار بسرعة يجاري خطواتها الراكضة.
***************
على: ممم....طيب عايز تذكرتين اول معاد بكرة.
قالت ندى باندهاش من خلفه, وهي لاتزال ترتعش.
ندى: تذكرتين ليه؟.
على: انتي مسمعتيش قال ايه؟, اول معاد خمسة الفجر, هتسافري ازاي لوحدك.
ندى: لا ,احجزلي انا بس.
قال بتصميم.
على: اسكتي بقى يا ندى.
ندى: انت ايه الي هينزلك دلوقتي؟, انت لسه جاي من السفر امبارح.
على: انا مش هنزل, انا هركب معاكي وهرجع تاني, هو استهبال؟, مينفعش تسافري
لوحدك.
وعاد يمد يده بالنقود لعامل قطع التذاكر, فجذبت ندى يده يعنف.
ندى: لا يا علي , احجز واحدة بس.
قال بصرامة.
علي: لا يا ندى انا جاي معاكي, خلاص انتهينا.
زفرت ندى والدموع تقاوم لتخرج من عينيها.
ندى: علي ,الله يخليك ما تتعبنيش عشان انا اصلا مش قادر اتلم على اعصابي.
رد بحسم.
علي: يبقى انتي متتعبيش نفسك, هي كلمة واحدة انا هاجي معاكي يعني هاجي
معاكي.
********************
ركضت هايدي في رواق المستشفي ,اوقفت نسمة بيدها وهي تهتف.
هايدي: ايه الي حصل؟.
نسمة: هيعملولها عملية في رجلها, هيركبولها مسامير.
هايدي: يعني هي فايقة وبتتكلم؟.
نسمة: هي مااغماش عليها اصلا, ربنا يستر.
هايدي: وعمرو؟.
نسمة: معرفش, بس هو لما جه كانت حالته زي الزفت.
هايدي: وهي عرفت ان حالته وحشة؟.
نسمة: لا طبعا محدش قالها ,هي في ايه ولا في ايه.
هايدي: ربنا يستر, هي طنط وانكل فين؟.
نسمة: انا جايبة لماما ميه بسكر ,اهه عشان عندها هبوط فوق.
هايدي: طب انا طالعة معاكي.
*****************
ندى: طيب يا نسمة اول ما هوصل هاجي على طول....لا معايا هاندباج
صغيرة,...هاجي بيها يا نسمة,....المهم انها خرجت من العملية, ...منا فاهمة
انها مافاقتش لسه,....خلاص خلاص بس عشان الباتري, وانا لسه قدامي
طريق...سلام.
قال على الجالس بجانبها في القطار.
علي: خرجت من العملية؟.
تنهدت بشبة راحة.
ندى: الحمد لله.
ثم شهقت.
علي: ايه ؟, خير.
ندى: دا شادي ميعرفش اني مسافرة اصلا.
صمت قليلا ثم قال.
علي: طيب كلميه.
ندى: لا عشان الباتري, ونسيت الشاحن اصلا, كان زماني شحنته في التواليت
حتى.
تردد علي قليلا قبل ان يقول.
علي: طب ممكن تكلميه من موبايلي.
ندى: بجد؟, شكرا اوي يا علي.
***************
شادي: موبايل علي مين؟,....ااه, طب وهو سافر معاكي ليه؟,.... مش وقته
ليه؟,......ماشي ماشي,....المهم هالة بقت كويسة,...متعرفيش بقت كويسة ولا
لأ؟,...طب انا هاجي اخدك من المحطة,....لا لا, استنيني لما توصلي,....سلام.
سلمى: ايه الي حصل؟.
قام شادي من جانبها يضع هاتفه في جيبه.
شادي: هالة عملت حادثة امبارح وعملت عملية, انا كنت حاسس ان فيه حاجة مش
طبيعية في بيتهم امبارح.
هم بالذهاب فقالت.
سلمى: انت رايح فين؟.
شادي: ندى قدامها ساعة وتوصل المحطة, هروح استناها.
سلمى: اجي معاك؟.
شادي: لا ملوش لزوم.
صاحت خلفه وهو يغادر مسرعا.
سلمى: طيب هبقى اكلمك عشان اطمن عليها,.....شــادي,.....مسمعنيش

[/size]

[b][b][size=21]الحلقه السابعه والعشرين[/b][/b]
[/size]

[b][b]
[/b][/b]

نظر شادي ببرود
لعلي الذي يحمل حقيبة ندى في المحطة, وسلم عليه بفتور حين عرفتهما ندى التي
التفتت تسأل علي في اهتمام.
ندى: انت هتعمل ايه دلوقتي؟.
علي: هحجز تذكرة المنيا وارجع تاني.
ندى: معلش يا مصري انا تعبتك معايا اوي , شكرا بجد, بس انا لازم امشي
دلوقتي ,عشان الحق اروح المستشفى انت عارف.
علي: ولا يهمك يا بنتي, ابقو بس طمنوني عليها, وفرصة سعيدة يا شادي.
قال شادي من بين اسنانه.
شادي: انا اسعد.
ندى: يلا يا شادي؟, باي يا مصري ابقى كلمني لما توصل.
علي: حاضر يا ندى ,سلام .
وانطلقا وشادي صامتا, بينما قالت ندى بسرعة وهي تخرج هاتفها.
ندى: يلا يا شادي بسرعة الله يخليك,....الو...ايوة يا نسمة انا
وصلت,...بابا عندك؟,...اصل انا جاية انا وشادي,...روح ينام طب كويس, ...لا
انا جاية اهه على طول,...طيب,..باي.
***************
ما أن رأت نسمة ندى حتى ركضت ناحيتها تعانقها وهي تبكي.
ندى: فاقت؟؟, قولي.
نسمة: لسه, بس الدكاترة قالو الحمد لله, حالتها كويسة.
ندى: وعمرو؟.
نسمة: هايدي راحت دلوقتي تسأل عليه , اصله المفروض يكونو خلصو العملية كده
لاني شفت الدكتور معدي من شوية.
ندى: هي مامته معاه فوق؟.
نسمة: مامته وباباه واخواته.
ندى: وبابا عرف ان الحادثة كانت في عربية عمرو؟.
مسحت نسمة دموعها وهي تقول بضيق.
نسمة: ايوة طبعا, وهي دي حاجة تستخبى,هو منطقش, بس انا عارفة انه اكيد
بيغلي.
ندى: ربنا يستر, ماما فين؟ , تعالي نطلع.
نسمة: انا مستنية هايدي تطمنا على عمرو.
هتف شادي حين لمح هايدي.
شادي: هايدي اهي.
التفت جميعم لهايدي التي اقبلت منتفخة العينين , والدموع لم تجف بعد عن
وجنتيها, تسير كالنائمة,فقالت ندى بذعر من مظهرها.
ندى: ايه ياهايدي؟, ايه الي حصل؟.
قالت بصوت متقطع.
هايدي: عمرو...مات يا ندى.
*****************
ندى: لا,..والله يا اية انا شكلي هطول هنا شوية,...هالة حالتها النفسية زي
الزفت بعد ما عرفت طبعا,....لا والله البيت كله زعلان,والناس كلها زعلانة,
انتي عارفة ما الموضوع انتشر.
وصمتت وهي تتنهد بحزن وتمسح عينيها المتورمتين.
ندى: والله يا أية البيت كله حالته صعبة, يعني ماما طبعا هتموت عشان
هالة,....ايوة كويسة بس هتاخد فترة على ما تقدر تمشي كويس تاني,وممكن
متمشيش كويس اصلا,...وبابا مبيكلمهاش خالص يا أية خالص,...من ساعة ماجابوها
من المستشفى وهو مبيوجهلهاش كلام وهي هتموت من كدة كمان,.....منا مش قادرة
اسيبهم وهما كدة,....اعمل ايه يعني,...ربنا يستر بقى,...يلا,...هبقى اعرفك
انا هجي امتى بالظبط اول ما اقرر ان شاء الله,..يلا مع السلامة.
اغلقت الخط والتفتت الى نسمة الجاثية على ركبتيها بجانب هالة النائمة.
ندى: قومي يا نسمة بقى ذاكري, مش هيفيدها حاجة قعادك جمبها كدة.
نسمة: انا بدعيلها.
ندى: طيب يا حبيبتي برضة قومي, مش انتي الي دايما تقوليلي كله الا مستقبلي
ومذاكرتي, قومي بقى كفاية كدة, بقالك يومين عاملة كدة, متخافيش ,انا معاها
خلاص.
قامت نسمة على مضض, وبكت وهي تعانق ندى.
نسمة: انا صحيح كنت بكرهه, بس انا زعلت انه مات وهو كدة لسه معقلش.
ندى: ربنا يغفرله يا نسمة, دا امر ربنا, مفيش في ايدنا حاجة.
نسمة: ونعم بالله, بس لو كان تاب...., انتي عارفة لو هالة كان حصلها حاجة
معاه؟.....
قاطعتها ندى.
ندى: ياستي الحمد لله ان ربنا لطف,ربنا يستر علينا كلنا, ....يلا امسحي وشك
وروحي ذاكري , ربنا يصبر اهله يارب, اذا كنا احنا عاملين كده , امال هما
عاملين ازاي.
*******************
دخلت هايدي غرفة ندى وهالة على مهل, فاعتدلت ندى حين دخلت, وقالت نسمة
بدهشة وهي تقبلها.
نسمة: ايه دا ؟, انتي اتحجبتي؟؟,مبروك.
هايدي: شكرا,هي هالة فين؟.
ندى: في الحمام, مالك؟.
هايدي: شفت اسلام النهاردة.
ندى: اسلام منصور؟.
هايدي: ايوة يا ستي , سألني عن حالتها, قلتله, وبعدين جه يمشي قلتله انت
بتحبها بجد ولا ايه؟, قالي ايوه بحبها بس معادش ينفع خلاص.
قالت ندى بأسف.
ندى: ماعنده حق فعلا, دي الحادثة كانت في عربية عمرو , ولو حلفتله على
المية تجمد ما هيصدق ان الموضوع مكانش فيه حاجة.
نسمة: هي المشكلة بقت في اسلام بس, دي الناس كلها عرفت , وياعيني هالة
تلاقي الكل بتتكلم عليها دلوقتي,ومحدش مصدق, دا كفاية بابا الي مبيكلمهاش.
ندى: بس هي ندمانة اوي يا نسمة متنكريش, وعايزة ربنا يغفرلها ويتوب عليها.
نسمة : يارب.
هايدي: اوعو حد يقول لها اني شفت اسلام.
دخلت هالة في هذه اللحظة, فقفزت نسمة تساندها, وهي تهتف بها.
نسمة: انتي برضة خرجتي لوحدك, انا مش قلتلك اندهيلي.
هالة: ازيك يا هايدي؟, ايه دا يا هايدي, ايشارب مرة واحدة, ...ايه يا بنتي
انتي سبيني انا مش مشلولة.
هايدي: والله الواحد اتغير اوي من ساعة ماعمرو مات.
جلست هالة على الفراش ونسمة تساعدها.
هالة: انتي رتبتي شنطتك يا ندى؟.
ندى: انا مكنتش جاية بحاجة اصلا, يادوب هاند باج, مش مستاهلة, ابقى ارتبها
بكرة الصبح ان شاء الله قبل ما اسافر.
هالة: انتي مسافرة بكرة؟.
ندى: لازم ,عندي عملي وشوية امتحانات كده, مينفعش اتأخر اكتر من كده, دنا
حتى شادي كان عايز يشوفني قالي استني يومين, بس مينفعش, لازم ارجع.
*****************
سلمى: انت ماشفتهاش برضة؟.
شادي: مش عارفة تسيب اختها وتنزل,مش عايزة كمان عشان باباها , اخد باله
منهم اليومين دول بعد حكاية هالة.
سلمى: وانت مكلمتهاش في موضوع علي خالص؟.
شادي: لا مكلمتهاش, مكنتش عارف وقتها اكلمها , دول كانو في محزنة يا بنتي.
سلمى: بصراحة بقى , انت عندك حق في موضوع علي دا, ازاي يعني تسافر معاه
لوحدها ,ويجي يوصلها بتاع ايه؟, هي مش صغيرة عشان يحميها.
شادي:..............
سلمى: والمفروض تراعي شعورك, يعني هي معتبرة الموضوع عادي, بس انت لازم
تبينلها انك مش فري زيها اوي كده.
شادي: انا مش زعلان منها, انا بس مش مستريح لعلي دا.
سلمى: مانت عندك حق, اصحاب ايه الي على طول سوا كدة؟, ويسافرو سوا, ويخرجوا
ويتفسحو , وهما اصحاب.
قال شادي بتساؤل.
شادي: طب ماحنا كدة.
انتبهت سلمى لما قال فتراجعت بسرعة.
سلمى: احنا....,احنا حاجة تانية,....انا وانت اصحاب بقالنا سنتين ونص ,
واخدنا على بعض خلاص, وبعدين هما لا من كلية واحدة ولا من سن واحد, انت ليك
حق تشك كمان.
شادي: لا لا يا سلمى موصلتش للشك.
سلمى: مش شك اوي, بس زي ما بيقولو ,حرص ولا تخونش.
اعترض طريقهما الفتاة بائعة الورد, فقال شادي مرحبا.
شادي: بسنت, تعالي هنا, دانا كنت لسه هدور عليكي.
بسنت: خدامتك يا شادي بيه, شفت جيتلك اهه من غير ماتنده عليا.
ضحكت سلمى.
سلمى: ايه دا ؟, هي اسمها بسنت كمان؟.
شادي: تخيلي, انا خايف اسألها اسم اخوها ايه تقولي شادي.
بسنت: لا يا بيه انا اخويا اسمه شحاتة ,على اسم جدي.
شادي: ماشاء الله, بسنت وشحاتة.
بسنت: وحشتينا يا ابلة, معونتيش بتيجي معاه ليه؟, الابلة التانية مش طيبة
زيك كدة, هي الابلة سافرت يابيه خلاص؟.
سلمى: لا ومتابعة كمان الاحداث ماشاء الله, دانتو اصحاب بقى.
بسنت: امال ايه يا ابلة؟, انتي بس الي مبتجيش, يلا بقى نفعوني ,هو مش انتي
يا ابلة بتحبيه؟, جبيله ورد.
ارتبكت سلمى, وقالت لتدارك الامر.
سلمى: ايه الكلام دا؟, احنا اخوات, انتي نسيتي ولا ايه؟.
قالت بسنت ببراءة.
بسنت: لا ياابلة انتي بتحبيه عشان انتي طيبة, متكدبيش, خدي وردة بقى.
جذبها شادي من ملابسها.
شادي: جرى ايه يا بسنت ؟,انتي هتبتدي تغلسي؟, خفي يلا, خدي فلوسك وامشي.
بسنت: مش عايزة يا بيه, الوردة دي مني للابلة, عشان انت وحش ومبتحبهاش.
شعرت سلمى بالحرج فتركتهما وابتعدت في توتر, فصاح شادي بالطفلة.
شادي: انتي يا بت غبية, خدي خدي واخلصي خدي.
وترك لها النقود قبل ان يلحق بسلمى, ليجدها دامعة العينين, فسألها بدهشة.
شادي: لومي, انتي بتعيطي؟.
مسحت عينيها وهي تقول.
سلمى: مفيش حاجة يا شادي.
شادي: لا بجد مالك, اوعي تكوني اتضايقتي من كلامها, دي بت هبلة.
ادارت وجهها له تقول في جدية.
سلمى: انا عايزة اروح يا شادي.
شادي: طب واللوح الي احنا رايحين نطبعها دي؟.
قالت بحدة.
سلمى: مش عايزة اطبع حاجة.
شادي: سلمى؟, فيه ايه؟.
سلمى: انا عايزة اروح يا شادي , تعالى وقفلي تاكسي.
نظر اليها شادي في شك ثم قال.
شادي: حاضر تعالي ,انتي مش عايزة تقوليلي براحتك, بس انا هعرف هعرف

[b][b][size=21]الحلقه الثامنه والعشرين[/b][/b]
[/size]

[b][b]
[/b][/b]

ندى: انت مش مصدقني ولا
ايه؟,.... ماتاخد بالك من كلامك يا شادي,انت هتلبخ؟؟.
هتف شادي في الهاتف.
شادي: انت الي شكلك ناسياني, الي واخد عقلك بقى.
ندى: ناسياك ايه يا ابني انت؟, انا مش قلتلك لما اروح هكلمك.
شادي: ولما الاقيكي مروحة 12 بقى المفروض اقلك ايه؟,دانا يا ولد معملتهاش,
دانا في البيت من 9.
ندى: انا مش فهمتك اني افتكرت اني لازم اروح اسحب فلوس عشان انا هعد لغاية
ما الامتحانات تخلص, وفلوسي خلصت.
شادي: برضة مفيش مبرر, ودا ياخد الوقت دا كله؟, ليه؟,المكنة كانت بتطبعلك
الفلوس وانتي واقفة؟.
قالت ندى بحدة ردا على لهجته الساخرة.
ندى: شادي بقلك ايه؟, انا عندي مذاكرة وامتحانات, وانت بدأت جنان
الامتحانات بتاعك بدري اوي, بس انا بجد عايزة اذاكر عشان اتنيل اجيب تقدير
واحول من هنا, وانت الي شكلك مش عايزني احول.
عاد للسخرية.
شادي: وتحولي ليه؟, مانتي مبسوطة عندك.
صمتت لحظة لكتم غضبها , وقالت بعصبية.
ندى: انت مالك يا شادي مقلوب عليا, وراجع مش طايق نفسك ليه؟, انت كنت مع
مين برة؟.
شادي: انتي هتحاسبيني؟, من امتى بتسأليني رحت فين وجيت منين؟.
ندى: انا مقلتش فين انا قلت مين, متلغبطش كلامي عشان تغلوش عليا.
قال شادي بسرعة.
شادي: روحي,..روحي ياندى عشان تذاكري ولا تنامي, انا برضة عندي شغل ومش
فاضي, يلا اتفضلي مع السلامة.
ندى: كده؟,....في ستين سلامة.
والقت بالهاتف في عنف, فتململت اية على مكتبها.
اية: خير اللهم اجعله خير.
ارتمت ندى على فراشها في ضيق.
ندى: هيجي الخير منين مانتي سامعة, دي بقت حاجة قرف, انا مش عارفة بيعمل
فيا كده ليه؟, يعني الترم الاولاني قلت معلش عشان احنا بعيد عن بعض, دلوقتي
بقيت اكلمه الصبح وهو كويس ,ارجع اكلمه باليل الاقيه اتغير حاله, متعرفيش
مين بيلعب في دماغه, والجديد الي طالعلي فيه, حاطط المصري في دماغه.
اية: وايه الي يخليه يحطه في دماغه؟, دا المصري دا زي اخونا.
ندى: انا عارفة بقى.
صمتت اية قليلا وخلعت نظارتها ووضعتها على سطح المكتب,ثم قالت.
اية: اقلك حاجة؟.....,انا اعرف ان الي بيعمل حاجة دايما بيشك في الناس انهم
بيعملوها.
ندى: يعني ايه؟, مش فاهمة.
اية: يعني الي بيكدب مثلا بيشك في الناس انهم بيكدبو, والي بيخون مراته
مثلا بيبقى شاكك فيها على طول.
قالت ندى بسخرية.
ندى: يعني شادي بيخوني؟, انتي بتقولي ايه ياهبلة انتي؟.
اية: انا بقلك نظرية , مش قصدي انه بيعمل حاجة.
صمتت ندى لتستوعب الحديث قليلا, ثم قالت في انكار.
ندى: لا لا يا شيخة حرام عليكي, دا هو كدة على طول, ماهي هي دي خناقات قبل
الامتحانات بتاعته, عايزاكي تتعودي عليها.
اية: المهم انتي الي تتعودي, لو ناوية تجيبي تقدير زي ما بتقولي, داحنا
بالشكل دا هننجح بالعافية اصلا.
********************
سامح: ايه يا شود؟, عامل كده ليه؟.
شادي: يعني مش عارف؟.
سامح: انت هتعلق مشاكلك عليا ياد من اولها.
شادي: مش انت الي قعدت تلعب في دماغ اهلي امبارح ,وتقولي سلمى بتحبك سلمى
بتحبك, اديني اتخانقت مع ندى.
سامح: وانا مال اهلي , هو انا اقلك الحاجة تجري تقولهالها؟.
لوح شادي بيده في توتر.
شادي: ولا قلتلها ولا حاجة , انا اصلا مش مصدق لغاية دلوقتي, انت....منك
لله.
سامح: انا مالي ياعم, انا ريهام قالتلي كلام جيت قلتهولك, انا الي غلطان
عشان هي كانت محلفاني, وانا الي قلت صاحبي لازم اعرفه.
شادي: انا مش عارف هشوفها ازاي النهاردة, انا نفسي مشوفهاش.
سامح: انت قلت لندى ايه بالظبط خلاكو تتخانقو؟.
شادي: ولا ندى دي كمان الي اتغيرت, مش عارف مالها بقت مستقوية عليا كدة
ليه, دنا كان زمان لو زعلت منها يوم ,كانت تموت نفسها لغاية مانتصالح قبل
ماليوم يعدي علينا, معرفش ايه الي بيحصلنا دا, البعد قساها ولا شافتلها
حاجة تانية ولا ايه,..استغفر الله العظيم.
سامح: انت شكلك اعصابك تعبانة, متفكرش يابني, ملعون ابو البنات كلها, خليك
في الترتيب الي هيضيع منك دا, انت هتسيب سامي العدل تطلع الاولى السنة دي
ولا ايه؟.
شادي: تصدق لو قلتلك اني مش قادر افصل المرة دي المشاكل عن مذاكرتي, انا
تعبــــــان يا سامح تعبان ودماغي تعباني.
سامح: لا, انت اتغيرت اوي من ساعة ما ندى سافرت.
شادي: لا وانت الصادق, من ساعة مانت اكدتلي ان سلمى بتحبني, فاكر, فاكر لما
قلتلي زمان وانا قلتلك انسى ونسيت فعلا دا موضوع اهبل, انا هتجنن, ازاي
انا مخدتش بالي اصلا؟, كنت مش فاهم ازاي؟.
سامح: انسى يا بني وسيبك , انت مش مرتبط, انسالي بقى سلمى خالص.
توجهت اليهما هالة تسير ببطء, وقالت لشادي.
هالة: شادي, معاك الفرنش كيرف بتاعي؟, انا نسيته معاك امبارح صح؟.
شادي: ايوة يا مسطولة, لقيته في حاجتي لما روحت, هتلاقيه فوق على ترابيزتي ,
بس متقلبيش الادوات, عارفين الحركات دي.
هالة: حاضر.
لم ترد هالة مزاحه , انما قالت الكلمة وانصرفت , وفي مشيتها عرج خفيف.
شادي: يااااااه على البنت دي , اتغيرت خالص, فاكر كانت عاملة ازاي؟, حتى
لبسها اتغير, والله صعبانة عليا اوي.
سامح: يا بني ميصعبش عليك حد, دي كلها حركات, دي عرفت ان سمعتها بقت على كل
لسان , انها كانت مع عمرو في العربية يوم الحادثة, فعاملة فيها بريئة
دلوقتي.
شادي: حرام عليك يا بني, دي البنت غلبانة فعلا, وبعدين انت مش شايف بقت
عاملة ازاي.
سامح: اهو كلهم بيعملو كده, اصبر عليها شهرين وهترجع اسخم من الاول, انت
مشفتش هايدي, ماهي اتحجبت, لزوم الحركات برضة, ومسيرها تقلعه, وابقى قول
سامح قال.
شادي: لا يا بني ندى قالتلي ان اختها اتغيرت خالص من ساعة الحادثة, بقت
بتصلي وبتلبس محترم, لا يا راجل دي حادثة عمرو دي غيرت عيال كتير اوي, فاكر
ممدوح وصلاح بتوع حربية, ماهم كانو اصحابه,ولا وزة الى مبقاش بيسيب
الجامع.
سامح: اهو كله هياخدله وقت وهيرجع زي الاول , صدقني.
سلمى: انتو مش فوق ليه؟.
التفت الشابان لها حين قاطعتهما, وقال سامح.
سامح: نزلنا نشرب نسكافيه .
سلمى: نسكافيه ولا نزلت تشرب سيجارة يا استاذ سامح؟, تحب اطلع اقلها؟.
سامح: خليكي محضر خير يا لومي, انا مش ناقص وجع دماغ, سبيني اشم نفسي شوية.
سلمى: وهو دا شم نفس؟, ولا طالع تاخد نفس, مش كده يا دودو؟.
شادي: هه؟,...معلش مخدتش بالي.
نظرت اليه سلمى بدهشة.
سلمى: انت مالك يا بني متنح ومبوز من الصبح ليه؟, تعالى معايا سيب الواد دا
يموت ناس تانية بسجايره, تعالى نجيب اكل من الكافيتريا ونطلع.
قال شادي دون تفكير.
شادي: لا.
سلمى: هو ايه الي لا, تعالى يا بني معايا انا رايحة , هجيب حاجات, امشي
قدامي.
تردد شادي قليلا ثم قال لسامح.
شادي: مش هتيجي معانا؟.
سامح: لا ياعم روحو انتو.
فنظر اليه شادي بغيظ بعد ان لمح نظرة سخرية بعينيه وصوته.
شادي: ماشي يا سامح.
وسار مضطرا مع سلمى التي سألته بعفوية.
سلمى: مالك يا شيدو؟, انت اتخانقت مع ندى تاني ولا ايه؟.
تردد شادي , قبل ان يرد كاذبا.
شادي: لا , عادي,انا بس عندي صداع.
سلمى: طب انا معايا بانادول, نجيب مية وخد حباية.
احتد شادي.
شادي: يا سلمى متعمليليش فيها زي ماما بقى, اطلعي من دماغي.
تفاجئت سلمى لنبرته المعادية ,فقالت بحذر.
سلمى: لا دانت مزاجك وحش فعلا,مالك يا دودو؟,يعني انا هتوه عنك ,دانا لومي,
يعني حفظاك وفهماك, ايه الموضوع؟.
شادي: مفيش يا لومي بجد, مصدع يا بنتي , منمتش امبارح, ومش عايز نسكافيه
شربت خلاص, ومش عايز مسكن , مباخدش ادوية انا.
سلمى: خلاص خلاص, بالراحة علينا شوية يا شادي, انت مزاجك فعلا وحش
النهاردة.
********************
اقبل علي على ندى واية وكارمن مبتسما.
علي: ايه؟, سامع ان الامتحان كان زي الفل.
كارمن: ودا سمعته من مين بقى؟, الامتحان كان زي الزفت.
علي: منا عارف, قلت اغلس عليكو, عملتو ايه؟.
قالت ندى بضيق لكارمن وهما تراجعان الامتحان.
ندى: يوووووووه,انا كنت عارفة اني لخبطت في السؤال دا.
نزع منها علي ورقة الاسئلة قائلا.
علي: متراجعيش يا بنتي, الي اتكتب اتكتب خلاص.
جذبت منه ندى الورقة مرة اخرى وهي تقول في ضي.
ندى: هات الورقة يا مصري بجد , انا ملخبطة في حاجات كتير.
اية: انت عملت ايه في الامتحان؟.
علي: عادي, العادي.
اية: والله شكلك هتعد فيها ومش هتحول السنة دي خالص.
قالت ندى بحسرة.
ندى: هو مش عايز يحول اصلا, الدور والباقي علينا احنا الي ورانا ناس هناك.
جذب علي الورقة من امام وجه ندى للمرة الثانية ممازحا وهو يقول.
علي: انتو حجزتو ولا لسه؟.
دفعته ندى بيدها وهي تجذب الورقة مرة اخرى, بينما قالت اية.
اية: الاء كانت هتحجز لنفسها بس اقنعناها انها تعد معانا الكام يوم
الباقيين بتوعنا ,عشان نبقى نتفسح هنا شوية بعد اخر امتحان.
علي: دانا هخلص قبلكو بيوم, انتو حاجزين امتى؟.
ندى: الجمعة الى بعد الامتحان, ما تستنى انت كمان, وتسافر معانا.
على: منا ممكن احجز معاكو القطر ,وانزل اركب اسكندرية من هناك.
ندى: لا مش قصدي تبهدل نفسك كدة على اخر السنة, لا انت استنى معانا عشان
نبقى نخرج نهيص بعد الامتحانات, صفا ومحمد جمال, وخالد هيعملو كده.
علي: طيب قشطة, انا اصلا محجزتش لسه.
ندى: طيب تمام, بس احنا نخلص على خير, ولو ان مش باينلها خير خالص

» طلب ارجو كبولي
» ارجو نشر موضوعي
» اقتراااااااااااحات ارجو من الاداره الدخول
» يلا يا مصممات (ارجو الدخول)
» ارجو دخول المديره